Hosia 6 - Intas Etipup

Nuarin tas alupas 6.

1 Intas ahugni ra mika eri adumoij an liinmopora. 4 Intas acaiji ra va nedo imipalea ura im nedo auatatimi ura.

¹ AKUMU apam aijaua, ti adumoij pan akaija ehele Ihova: et mun idim ces yi oplecoplec caija aieu, etpu lep ago cehcehe caija aien; et mun auud caija aien, etpu lep arore mocop iraija aien.

² Etu wit ti pan itac nadiat inyi ero etpu imianusjai caija aien: ja an nadiat dirt etpu imiatidai jai caija aien, intupu umumoh akaija an nuhup o un.

³ Ele ta merit alupas akaija par ato Ihova, intupu idim ato yin akaija: er idim ati natga o un et idivaig nathut u nadiat; etpu yetpam vai caija aien et idivaig incopda, maiya, et idivaig incopda apitac im incopda uhup an nobohtan.

⁴ Ak nup Ifreem, ki ago inhe iramia ainyak? ak nup u Juta, ki ago inhe iramia ainyak? et idivaig inmoso an nuhialeg nedo upene unyimia um idivaig nopoigmul an nuhialeg et auroauro um tiih.

⁵ Va nitai inigki ek mun auahas ra ainyak irai ilpu profeta; um atgei ra irai tas an nipjineucsek: et idivaig nauwainapit et ehcohos pam nedo aru iramia.

⁶ Kis idim merit alupas ainyak vai nedo aiheuc, ja kis merit tintin ainyak vai niji itai ahlap; kis merit alupas ainyak nato itai vai Atua, ja kis merit, tintin ainyak va niji itai ahlap atnamud.

⁷ Ja era idivaig natimi iji ig era imipalea intas etipup ara: eris ahcil vai nyak ara an nuarin iyehki.

⁸ Et maliyum u ilpu atimi auatatimi Cileat; er asjaaicnaig han irai ugnya eduei atimi atgei atmas.

⁹ Era idim atpaijinaig vaig tah natimi a ilpu atimi atoraliak itai, et idim uco, era atgei atimi niji ira atimi ahlap an nefalaig inig et yetpan irai Sikem: maiya, era idim tas jipe ara um atgei atmas.

¹⁰ Kis ecetai nitai has esjilid ehele nup Isreel ainyak: et eteuc ingeijid u nup Ifreem marom, era lep has a nup Isreel.

¹¹ Ak nup u Juta, et mun asaig vai caua nopan asjapicnaig ohwai itai.