Hosia 5 - Intas Etipup

Nuarin tas alupas 5.

1 Neruvaig u Atua irai ilpu atimi ahlap, im tup atimi, im ilpu atimi alupas u nup Isreel, va nedo has ura et ahinag, 15 erupu adumoij pam an liinmopora ara.

¹ AK ilpu atimi ahlap, akumu atahaijeg nitai inigki aijaua; ak nup Isreel, akumu atahaijeg aijaua; ak ilpu atimi amen au nimnim u natimarid, akumu atgeig pam intikgamia aijaua; uhpu idim aru iramia, akis itai apro itai an nedoon Mispa aijaua, im nopoig inig er elgelgei an nedoon Tebor.

² Era atgei niji itai ahlap et ahinag acen a ilpu atimi imipalea, ja ekpu aru nedo has ura asega ainyak.

³ Ek ato nup Ifreem ainyak, er lep eti adenaig nup Isreel vai nyak: ak nup Ifreem, eka ago ingeijid aijaua an nopan inig, era lep has a nup Isreel.

⁴ Era eti ago upene nauritai ura ara mika eri ahidai ra ara ehele Atua ura: et amen ehele ra inmerit van geijid, era eti ecen vai Ihova ara.

⁵ Et asuptecnaig itai an nuhup ura nedo ijinies u nup Isreel vanitai inigki erupu eropropse a nup Isreel im nup Ifreem an nedo has ura; erupu lep eropropse a nup u Juta ehele ra.

⁶ Erupu apan ara im siip ura im kurimatau ura par ahilek Ihova; ja erupu eti ecet yin ara; et mun apan aien an taka uarin vai ra.

⁷ Era mun ago nedo efaifa ara ehele Ihova: era mun idim apos ilpu halav vai tak atimi ara: ja uhpu auahas ra im lep ahaiji itai ura an nopan inig, an mohoc inyi ethi ache.

⁸ Akumu ahlai nipat u kurimatau aijaua an maliyum Cibea, im lep intoho an maliyum Rema: akumu aunyauwaig aijaua an maliyum Bedeven, ak nup u Benjamin, et apitac iramia aien.

⁹ Etpu umaruma inpece u nup Ifreem an nopan aru ira ra: ek mun idim asuptecnaig ainyak ehele niji ira nup Isreel itai iji ig etpu idim yetpam.

¹⁰ Eris idivaig ilpu atimi atipagki itai asjaaicnaig jipe irai uari obohtan a ilpu atimi alupas u nup u Juta ekpu atladwi nedemda unyak ira ra ainyak et idivaig inwai.

¹¹ Er agahas irai nup Ifreem, era ehtipidai ra ara an tas alep ura, eris idim ispara imiaiji intas inig ara eris asaig.

¹² Ekpu idivaig nages ainyak ehele nup Ifreem, um idivaig numugnyu ehele nup u Juta.

¹³ Eris wat almoi nemehe ura a nup Ifreem, um almoi inmocop ira ra a nup u Juta, eris apan a nup Ifreem ehele nup Asiria, eris lep abrai hal a nup u Juta par apan ehele natimarid ipjin eahki: ja is idim eti emda aien par ago cehcehe caua, um ika yi mah inmocop iramia.

¹⁴ Ekpu idivaig laion ainyak vai nup Ifreem, um idivaig laion tupko vai nup u Juta: ekpu ces yi oplecoplec ra ainyak, idim ainyak, ja par atga unyak; ekpu iknipagki ra ainyak, ja inyi eti imialep ra tah.

¹⁵ Ekpu apan ainyak um adumoij pan an nuarin amen iran unyak, um yetpan an nopan iyehki uhpu aru ira ra, erupu ahilek pam nyak ara: erupu auroauro ara um ahilek nyak an nopan ohocred ura.