Hosia 4 - Intas Etipup

Nuarin tas alupas 4.

1 Neruvaig u Atua ira atimi va nedo has ura, 6 im lep irai ilpu atimi ahlap, 12 im lep va nedo apat ura. 15 Er acaiji nup u Juta mika eri aktaktai nohocred u nup Isreel.

¹ AK nup Isreel, akumu atahaijeg intas o Ihova aijaua: et idim edemda a Ihova vai nup uran pece inigki, vaig inig nikavaig, et eti eteuc nedo inveijec an pece inigki, ka nedo aiheuc, ka nato itai vai Atua.

² Et eti eteuc nedo et eche ehele ra, nikavaig, era asan tas inig ache ara et itap, um asan tas ahcil, um atgei atimi, um ehnegitai, um ago ingeijid, era lep ago nedo ipjin ara, um atgei jipe ra.

³ Va nitai inigki etpu taigtaig inpece inigki, erupu auatialidi natimi asega era amen iran ara, im lep niji itai eklim edo irai pece, im lep niji man an nauanohatag: maiya, eri lep ti niji mu an jap.

⁴ Ja etmu jim imiisjisitai ehele etwan tah natimi, um jim acaiji tah: era idim idivaig ilpu atimi imiisjisitai ehele natimi ahlap a ilpu atimi unyum.

⁵ Va nitai inigki napu eropse aiek an nadiat, etpu eropse a naprofeta um tup et ethi ache pan iram an nepig, ekpu lep atgei risum ainyak.

⁶ Eh mun auahas ilpu atimi unyak va neti ato itai ura: as esjum aiek va nato itai, va nitai inigki ekpu lep esjum vai euc ainyak, napu eti atimi ahlap unyak aiek: as ahnag aiek an tas alep u Atua unyum, ekpu lep ahnag irai ilpu hal unyum ainyak.

⁷ Eris ahinag ara, is idim uco, eris ago nedo has vai nyak ara: ekpu ika ainyak yi auoh ehcamai ra nitai inig er imiahpas ra vaig.

⁸ Era caig nitai ahlap va nedo has u ilpu atimi unyak ara, era lep merit alupas ara va nedo auatatimi ura.

⁹ Va nitai inigki erupu apapa natimi pan irai ilpu atimi ahlap ura: ekpu aru ira ra ainyak et idivaig nedo ura, ekpu aru ira ra ainyak va nitai iji ig eris ago ara.

¹⁰ Erupu hag ara, jam eti geije: erupu ago ingeijid ara, jam eti lep asvalav: vaig inig nikavaig, era mun eti lep atahaijeg vai Ihova ara.

¹¹ Et auahas inliinmopoi atimi ingeijid, im waina, im kava itoga.

¹² Era ahodai itai ehele atmasimai auicai ura a ilpu atimi unyak, et asjaaicnaig irai itai imi ra niseuc ura: et mun imiahnag ra inmerit ura vai ingeijid, era mun udei Atua ura ara um ago ingeijid.

¹³ Era ahlap ara irai iji lola au, um atnamud nitai auanipin upene irai iji lola edoon, ithai pak im inyat im neijiv, nikavaig, et esjilid naiyu iran: va nitai inigki era ago nedo has a ilpu halav atahig unyimia, um ago ingeijid a ilpu ehgai ilpu halav atamaig unyimia.

¹⁴ Ekpu idim eti aru ainyak irai ilpu halav atahig unyimia eru wit ago nedo has ara, im lep irai ilpu ehgai ilpu halav atamaig unyimia eru wit ago ingeijid ara: era idim echim amen ara ehele ilpu takata has, era lep ahlap ara im ilpu takata ago ingeijid: erupu eropropse a ilpu atimi eti aktaktai itai.

¹⁵ Ak nup Isreel, el eka ago ingeijid aijaua, ja erumu jim ago nedo has a nup u Juta; um jim apam an maliyum Cilcal aijaua, um jim aridjipan an maliyum Bedeven, um jim asaig intas aktit unyimia, um ika, Et umoh a Ihova.

¹⁶ Era esjum a nup Isreel um imipalea, et idivaig nedo o un tah kurimatan atahig tupko nedo ura: va nitai inigki etpu alaa ra a Ihova an nopan inig et idivaig nakli siip an nuarin alupas.

¹⁷ Era apol irai ilpu atmas ura a nup Ifreem: akumu tup udei ra aijaua.

¹⁸ Era wat umnyi ehni kava ura ara, era ago ingeijid ara: era merit a ilpu atimi alupas ura vai itai er ehcamai vaig.

¹⁹ Et mun arore yin nimtinjap irai ehpan, erupu lep ehcamai ara va niji itai ahlap ura.