Hosia 14 - Intas Etipup

Nuarin tas alupas 14.

1 Er ahugni ra mika eri adumoij an liinmopora. 4 Et ika a Atua yi asan tas acis yi alwai ra.

¹ AK nup Isreel, akumu adumoij pam aijaua ehele Ihova Atua unyimia; eka mun idim eropropse aijaua va nedo has unyimia.

² Akumu aktaktai hal tas unyimia aijaua par asaig, um adumoij pam ehele Ihova, um ika ehelen, Namu iknipagki nedo has asega unyima aiek, um ago nedo aiheuc vai cama: ja ecrupu alupai euc niji itai ahlap irai ipjieucsema aijama.

³ Erupu eti imiatamaig cama a nup Asiria; ecrupu eti ateuc irai hors aijama: ecrupu eti lep ika ehele auritai u ikmama aijama, Eka Atua unyima aijaua: na idim aiheuc vai ilpu umnij aiek.

⁴ Ekpu atipagki ehele ra nedo imipalea ura ainyak, ekpu tup ispuk aiheuc vai ra ainyak: ek mun atcijaig nedemda unyak vai ra ainyak.

⁵ Ekpu idivaig nopoigmul vai nup Isreel ainyak: erupu idivaig intisiai tal ateuc ara, erupu idivaig incai inig ara et atgeig jipe niji eucvan an nedoon Lebanon.

⁶ Erupu idivaig nehlan cai inig ara et aridjai, erupu idivaig oliv ara va neklim upene ura, erupu auanipin upene ara et idivaig nedoon Lebanon.

⁷ Erupu lep umumoh et idivaig korn ara sji igki era amen an naiyu u Atua ara; erupu oho ara et idivaig vaine: erupu imiahpas ra natimi et idivaig er imiahpas nide vaine an nedoon Lebanon.

⁸ Erupu ika a nup Ifreem, Ecrupu lep a uri aijama vai atmasimai? Ek mun adai intas ura ainyak, ekpu lep aktaktai ra ainyak: ek idivaig neijiv umoh ainyak; et eteuc nohwamia ehelek.

⁹ Et arapakau a di, mika yi ato nitai iji igki aien? et aktaktai itai a di, mika yi alum nitai iji igki aien? et idim atoh niji efalaig u Ihova, erupu atga upene iran ara sji igki et atoh nedo ura: ja erupu atga epihtau iran ara sji igki era imipalea ara.