Hosia 13 - Intas Etipup

Nuarin tas alupas 13.

1 Et tup tiih pan natimi alupas u nup Ifreem va nedo apat ura. 5 Et edemda a Atua va nedo ura. 9 Et ika aien yi aiheuc vai ra. 15 Neruvaig va nedo imipalea ura.

¹ ERIS wat tas a nup Ifreem, eris ecen vai ra natimi, eris esjilid irai nup Isreel ara; ja eris wat alaigaheni vai ilpu atmas ara, eris emesmas ara.

² Ja era lep ago nedo has ara ira adiat iji igki, um eti atumop; era mun ago atmasimai imi ra ara, natmasimai iji igki era mun ago irai silver ura eris ahen ara, et idivaig namarero ura, eris ago nitai iji igki asega a ilpu atimi amarero: era ika ehele atimi a ilpu atimi ahlap, Erumu aijumnyi hakli kurimatau natimi.

³ Va nitai inigki erupu idivaig napat an nuhialeg ara, um lep idivaig nopoigmul et auroauro um tiih an nuhialeg, um idivaig narasi korn et ahlaadaig nimtinjap an nuarin inig er auud korn iran, um idivaig nadran cap et ahes an nefalaig nadran cap.

⁴ Ja kis Atua unyimia ainyak, Ihova marom, ahes an nopan iyehki akis atcijaig inpece Ijipt aijaua, um imihum pam an nopan inig, akis eti lep ato tah atua aijaua, ainyak ache; is eti lep eteuc tah atua is imiatamaig caua aien, ainyak ache.

⁵ Kis aminjinaig caua ainyak an namasacen, an pece iyehki is ti inwai iran.

⁶ Eris geije ara va nitai caig alupas kis alaa ra ainyak; eris geije ara ja is par ijinies inliinmopora ara; va nitai inigki eris ahnag irak ara.

⁷ Va nitai inigki kis idivaig laion vai ra ainyak: kis atpaijinai ra ainyak an nahaiji efalaig is idivaig pander.

⁸ Kis ehtit ira ra ainyak is idivaig beer inig er iknipagki ilpu hal o un, kis ahpati nitai adahpoi nafetumanava ura ainyak; kis auahas ra eahki ainyak is idivaig laion atahig: eris ces yi oplecoplec ra niji itai aleg an lelitai.

⁹ Ak nup Isreel, eka mun auahas caua aijaua; ja ek emda ainyak ache par atau imi caua.

¹⁰ Natimarid unyimia yek eda an nopan inig, par imiatamaig caua irai maliyum asega unyimia? im ilpu atimi tas alep unyimia sji yek eda, akis ika vai ra aijaua, Namu alupai cama tah natimarid aiek im lep hal ilpu atimi alupas?

¹¹ Kis alupai caua natimarid ainyak an nedemda unyak, kis lep atipagki yin ainyak an tavaitap unyak.

¹² Er arore nedo acalacal u nup Ifreem; er adenaig neruvaig ira ra.

¹³ Etpu yetpam ehele ra niji ohocred ura et idivaig nohocred u intakata apos inhal o un: era idivaig inhalav inig ara et eti aktaktai itai aien; et idim eti upene vai inhalav iyehki el et eti fi auroauro um apos yin a risin.

¹⁴ Ekpu imicoho ra ainyak va nemda u netheso; ekpu imiatimai ra ainyak vai inmas: ak inmas, nohocred inig yek eda et ahes ehelum? ak netheso, nitai eh mas vaig inig yek eda et ahes ehelum? ekpu eti adumoij an liinmopok ainyak.

¹⁵ El era ahinag acen a ilpu hal ura an nuhup u ilpu etwara, etpu ehlehel an natoga, etpu ahes an namasacen um apam nimtinjap u Ihova, etpu ame nimtanwai ura vaig, etpu ame netpen ura: etpu auahas inpadiaig a Atua im nipjiitai asega ura et upene.

¹⁶ Uhpu aru nedo o nup u Sameria; vaig inig nikavaig, eris imipalea intas o Atua ura ara: erupu emesmas ara an nedoa: uhpu erekhaigse ilpu hadi ura um auoh oplecoplec ra; uhpu ahcai ilpu takata opoc an nauitoga.