Hosia 12 - Intas Etipup

Nuarin tas alupas 12.

1 Et acaiji nup Ifreem a Atua im nup u Juta im ilpu mapoi Jekob. 3 Et ahugni ra aien mika eri adumoij an liinmopora va nedo aiheuc o un vai ra itu. 7 Et auahas inliinmopoi Atua nedo has u nup Ifreem.

¹ Era caig nimtinjap a nup Ifreem, era apitac natoga ara: era ika ara, yi ahinag intas ahcil im nedo auahas itai u atimi irai iji adiat; era asig yi aktit intas ura ara ehele nup Asiria, era imiapan narakei ehele nup Ijipt ara.

² Et edemda a Ihova vai nup u Juta, etpu aru irai ilpu mapoi Jekob aien yi idivaig nedo ura; etpu ago neruvaig imi ra aien yi idivaig niji auritai ura.

³ Is arahpan vai nijinalak an neduei etwan a Jekob an nipjinetgai risrau, is imiisjis aien ehele Atua va nemda o un;

⁴ maiya, is imiisjis aien ehele Nagelo iyehki, um esjilid iran: is taig aien, um ugyi itai ehelen: is ecet Jekob an nuarin pece Bedel a Atua, is tas eheleija aien eahki;

⁵ Ihova marom, Atua esjilid acen; et idim idan Ihova.

⁶ Va nitai inigki akumu adumoij pam aijaua ehele Atua unyimia: aminjinaig nedo aiheuc im nedo atoh, um jim atumop par aitgai Atua unyimia.

⁷ Era idivaig nup u Kenan ara, et amen irai ikmara niji itai asjaaicnaig ahcil: era merit va nedo efaifa ara.

⁸ Era ika a nup Ifreem, Inta mun idim ikni itai akaija, inta mun lucsei itai imi caija akaija: erupu eti ecetai tah nitai has eheleija ara, ka tah nedo has irai auritai asega uja.

⁹ Ja kis Atua unyimia ainyak, Ihova marom, ahes an natcijaig vaig inpece Ijipt unyimia um imihum pam an nopan inig, ekpu ika ainyak akupu lep amen irai iyum uricai aijaua, et idivaig ira adiat asjapicnaig iran.

¹⁰ Ek mun tas ainyak ehele ilpu profeta, ek mun ehvaig intas ahuumtidec et ahinag unyak ainyak ehele ra, ek mun ahu niji tas ecsipece ainyak irai ipjieucse ilpu profeta.

¹¹ Era ago nedo has a nup u Cileat; era idim asai tas ahcil ara: era ahlap irai kurimatau atamaig ara an maliyum Cilcal; et idivaig niji ira hat an nibla apuke an nahapol niji atau ura.

¹² Is aha a Jekob um apan an pece Siria, is auanaheca a Isreel par leh ehgan, is asgi siip aien mika yi leh ehgan.

¹³ Is atau irai nup Isreel a Ihova an naprofeta is ethi, mika eri udei Ijipt ara um apam igcaki, is aminjinai ra a naprofeta iyehki.

¹⁴ Eris auahas alupas inliinmopoi Atua a nup Ifreem: va nitai inigki etpu atijai ira ra natgei atmas ura a Natimarid ura, um imiadumoij pam ehele ra nitai ehcamai vaig ura.