Hosia 11 - Intas Etipup

Nuarin tas alupas 11.

1 Era eti imiehva nedo upene u Atua vai ra a nup Isreel. 5 Neruvaig o un ira ra. 8 Nedo aiheuc u Atua vai ra.

¹ ERIS wat idivaig inhalav a nup Isreel, is aiyu inliinmopok ainyak vai ra, kis ahlaig vai ra ainyak, et idivaig inhalav atamaig unyak, mika eri udei inpece Ijipt ara.

² Eris wat ahlaig vai ra a ilpu profeta, eris udei ra ara um atga ura: eris ahlap vai ilpu atmas ara, um atnamud itai auanipin upene vai atmasimai iji ig eris wud ugnyit ira ra.

³ Kis atau imi nup Ifreem ainyak, um eipatga imi ra; ja eris eti ato ara mika kis ago cehcehe ra ainyak.

⁴ Kis aiyihi ra ainyak irai wau atimi, irai wau aiheuc vai ra marom: kis ago nedo vai ra ainyak, et idivaig tah et atipagki nasore an nauinwan aien; kis lep ati nitai caig incara ainyak mika eri caig ara.

⁵ Erupu eti lep adumoij pan ara an pece Ijipt, ja etpu atimarid ura a natimarid u nup Asiria, vaig inig nikavaig, eris esjum ara nadumoij vaig ehelek an liinmopora.

⁶ Etpu amen aktit nedoa irai iji maliyum ura, um alcapdicraig niji athatahau ura, um auahas ra vai niji tas jipe ura.

⁷ Era merit alupas a ilpu atimi unyak par ahidaig pan itac ra, um eti atahaijeg nyak: era mun imiacaij ra ara par apam ehele Atua inig et esjilid acen aien, ja is eti imiahpas yin tah ira ra.

⁸ Ak nup Ifreem, ekpu atcijaig caua ainyak um uauo? ak nup Isreel, ekpu atcijaig caua ainyak um uauo ek auanehvago iramia ainyak yi idivaig irai nup Atma? ekpu ehvikni caua ainyak yi idivaig nup u Siboem? et taigtaig inliinmopok ainyak vai caua, et esjilid naiheuc unyak vai caua.

⁹ Inki eti imiapam nedemda alupas unyak ainyak vai ra, inki eti lep auahas nup Ifreem ainyak: ek idim Atua ainyak, ek eti atimi ainyak; ek idim Atua upene ainyak juju an niblamia: inki eti apam ehelemia ainyak an nedemda unyak.

¹⁰ Erupu apitac irai Ihova ara, etu wit aunyauwaig aien yi idivaig laion; etu wit aunyauwaig aien, erupu auroauro a ilpu atimi unyak um ahes irai hakli pece an jap.

¹¹ Erupu auroauro ara, yi idivaig inman, um udei inpece Ijipt; erupu ahes an pece Asiria, yi idivaig nalaupa: et ika a Ihova, Ekpu ika ainyak eri amen irai imnim ura ara.

¹² Era arehed irak a nup Ifreem irai iji tas ahcil ura, era lep arehed irak a nup Isreel an nedo efaifa ura: im lep inig, era eti amen aktit ehele Atua a nup u Juta, era efaifa ara ehele Atua upene marom, et idim inveijec aien.