Hosia 10 - Intas Etipup

Nuarin tas alupas 10.

Et acaiji nup Isreel a Atua um ated ra va nedo imipalea ura im nedo apat ura.

¹ ERA idivaig vaine atgeig jipe inran a nup Isreel, era oho upene ara: is wat ahinag nohwai itai ura eris ika ara yi lep ahinag niji atau ura; is wat upene inpece ura eris lep ago atmasimai upene ura ara.

² Et ero inliinmopora ara; uhpu aru ira ra an nopan inig: etpu alcapdicraig niji atau ura aien, etpu auahas niji atmasimai ura aien.

³ Erupu idim ika ara an nopan inig, Et ti natimarid uja, vaig mig nikavaig, intis eti imtitaig Ihova akaija; etpu ago inhe vai caija tah natimarid?

⁴ Era wat asig yi aktit intas ura ara, era asaig tup intas ara; era wat asaig intas etipup ura ara, era asaig intas ahcil ara: va nitai inigki et ehcohos jai neruvaig et idivaig incai acen irai apuke an nahapol.

⁵ Erupu imtitaig a nup u Sameria vai hakli kurimatau an maliyum Bedeven: erupu idim imitaig natmasimai iyehki a ilpu atimi alaigaheni vai yin, im lep ilpu atimi ahlap iran, eris imiacitak vaig ara; et idim tiih nimiahpas o un.

⁶ Eri imiapan natmasimai iyehki an pece Asiria uri naiheuc vai natimarid ipjin eahki: erupu ehcamai a nup Ifreem, erupu imtitaig a nup Isreel vai intas asaig ura.

⁷ Er auahas natimarid u nup u Sameria, et idivaig nahrin cai an narasin wai aien.

⁸ Eri auahas niji uarin ijinies an maliyum Bedeven, eris ago nedo has iran a nup Isreel: etpu yah irai iji atau ura nadeni im nitai upunupun; erupu ika ara ehele iji au, Adahpoi cama; im lep ehele iji edoon, Eropropse irama.

⁹ Ak nup Isreel, akis ago nedo has aijaua, ahes an nopan u nup u Cibea um imihum pam an nopan inig: era aiji aktit eahki ara: etpu idim uhum ra an maliyum Cibea nedoa u ilpu atimi auatatimi.

¹⁰ Ek merit ainyak mika ki aredei ra; erupu lep asjapicnaig a nup urai iji pece par aat ira ra, eku wit arore ra ainyak va nedo has ura et ero.

¹¹ Era idivaig kurimatau atahig inig a nup Ifreem eris esege imi yin, et lep merit aien par auwihi korn; ja kis atga ainyak an nauinwan upene: erupu idivaig kurimatau inig a nup Ifreem et ateuc tah natimi iran; erupu idivaig tah natimi acujitai irai plau a nup u Juta; erupu lep idivaig tah natimi ohuoplec nobontan a ilpu mapoi Jekob.

¹² Akumu ahwai itai imi caua aijaua an nedo atoh, um aldei itai an nedo upene; akumu acujitai aijaua irai uari obohtan ceigmeto unyimia: et mun yetpam nopan par ahilek Ihova, um yetpan an nopan iyehki etpu ham aien um esege imi caua nedo atoh.

¹³ Eka mun acujitai aijaua an nedo has, jam aldei nohocred; eka mun caig nohwai tas ahcil aijaua: eka idim asgeig aijaua an nefalaig unyimia, um ika era ahinag a ilpu atimi emda unyimia.

¹⁴ Va nitai inigki etpu eteuc nedoa ehele atimi unyimia, eri auahas niji maliyum ipjin asega unyimia, is idivaig is auahas in-maliyum Bedarbel a Salmaniser an nadiat ago nedoa iran: eris wat ethaigse um auoh oplecoplec ilpu risra pan irai ilpu hal ura.

¹⁵ Etpu lep ago nedo inigki vai caua aien an maliyum Bedel, va nedo has esjilid unyimia: eri auahas ehni natimarid u nup Isreel an nuhialeg.