Hosia 1 - Intas Etipup

Nuarin tas alupas 1.

1 Et leh Comer ehgan a Hosia par ehvaig neruvaig u Atua va nedo apat u nup Isreel. 4 Et apos Jesriil ehelen a Comer, 6 im Loruhema, 8 im Loamai. 10 Eri imiadumoij pam nup Isreel im nup u Juta.

¹ INTAS o Ihova nigki, is yetpam ehele Hosia, inhal u Bierai, an nopan umoh Usaia, im Jodam, im Ehas, im Hesekaia, Apu atimarid u nup u Juta, im lep an nopan umoh u Jeroboam inhal u Joas, natimarid u nup Isreel.

² Natupun u intas o Ihova ehele Hosia nigki. Is ika? a Ihova ehele Hosia, Namu apan aiek, um leh intakata ago nedo has mika yi ehgam, um apos ilpu halav imtam an geijid: era mun ago ingeijid alupas natimi an pece, nikavaig, era mun imipalea Ihova ara.

³ Is apan aien um leh Comer ehgan inhalav atahig u Tibleem; is opoc aien um apos inhalav atamaig imi yin.

⁴ Is ika a Ihova ehelen, Namu anvi nidan aiek par ika Jesriil; vaig inig nikavaig, ekpu aru tupko ainyak natgei atmas Jesriil irai ilpu mapoi Jihu, ekpu lep ika ainyak yi ti nelcau u nup Isreel.

⁵ An nadiat iyehki ekpu asvi inceen efana u nup Isreel ainyak an niskanse Jesriil.

⁶ Is lep opoc aien um apos inhalav atahig is ethi. Is lep ika a. Ihova ehelen, Namu anvi nidan aiek par ika Loruhema: vaig inig nikavaig, inki eti lep aiheuc vai nup Isreel ainyak; ja ekpu iknipagki ehni ra ainyak.

⁷ Ja ekpu aiheuc vai nup u Juta ainyak, ekpu imiatamai ra ainyak vai Ihova Atua ura, ja inki eti imiatamai ra vai efana, ka nauitoga, ka nedoa, ka hors, ka ilpu atimi ateuc irai hors.

⁸ Is wat atwan ided imi Loruhema aien, is um opoc aien, um apos inhalav atamaig is ethi.

⁹ Is um ika a Ihova, Namu anvi nidan aiek par ika Loamai: vaig inig nikavaig, eka eti ilpu atimi unyak aijaua, ek lep eti Atua unyimia ainyak.

¹⁰ Ja erupu ahinag acen a nup Isreel, um idivaig nauanavig an nohmunjap, et ehka nasjaaicnaig vaig iran, um lep ehka nesvi vaig; im lep inig, an nuarin iyehki eris ika ehele ra, Eka eti ilpu atimi unyak aijaua, eri idim ika ehele ra eahki, Eka ilpu hal u Atua umoh aijaua.

¹¹ Erupu asjapicnaig an nuarin yi ethi ache a nup u Juta im nup Isreel, um aniv tah inyi ethi ache mika yi atimarid ura, erupu ahes an pece iyehki ara um aridjipam: etpu idim esjilid nadiat u Jesriil.