Haceai 2 - Intas Etipup

NUARIN TAS ALUPAS 2.

1 Et ago emda inliinmopoi atimi aien par ago nauritai inigki, vai intas o un mika yi esjilid natimi alupas u Atua an neom inigki irai natimi alupas o un an neom iyehki. 10 An tas ecsipece va niji itai itap im niji itai et eti itap, et asuptecnaig aien mika yi atapnes nauritai inigki nedo has ura. 20 Intas upene u Atua imi Serubabel.

¹ IM lep inig, an mohoc sevend, an nadiat twente first an mohoc iyehki, is yetpam intas o Ihova ehele Haceai naprofeta, um ika,

² Namu tas aiek ehele Serubabel inhal u Sialtiel, natimi alupas u nup u Juta, im lep ehele Josua inhal u Josetek, natimi esjilid an nahlap, im lep ehele nahri atimi, um ika,

³ Et amen a di iramia is ecetai neom inigki aien an namen upene uhup iran? eka wat almoi aijaua an nopan inig et idivan he? eka wat aktaktai neom iyehki aijaua, et idim takitai neom inigki.

⁴ Jai inig, et ika a Ihova, namu emda aiek, ak Serubabel, namu lep emda aiek, ak Josua inhal u Josetek, natimi esjilid an nahlap; et lep ika a Ihova, Akumu emda aijaua, ak nup uran pece asega, um auritai; et ika a Ihova esjilid acen, Ek idim amen ehelemia ainyak:

⁵ et amen ehelemia a Nesgak, im lep intas etipup unyak kis asaig ainyak ehelemia, akis wat ahes Ijipt aijaua um apam igcaki; akumu jim imtitaig aijaua.

⁶ Et idim ika a Ihova esjilid acen; Ekpu eucjeucjaig nohatag, un nobohtan, im injap, im inpece ainyak tupko, jam lep ecethi ache;

⁷ ekpu eucjeucjaig nup urai iji pece asega ainyak, ja etpu hame niji itai merit u nup urai pece asega; et ika a Ihova esjilid acen, Ekpu ika ainyak yi ohua natimi alupas unyak an neom inigki.

⁸ Et ika a Ihova esjilid acen; Et unyak silver et lep unyak colt.

⁹ Et ika a Ihova esjilid acen; Etpu esjilid neom inigki et apitac iran iyehki is uhup va natimi alupas unyak iran: et lep ika a Ihova esjilid acen; Ekpu asan nigpa ainyak an nuarin inigki.

¹⁰ Im lep inig, an nadiat twente ford an mohoc naind, an mesese sekunt irai Taraius, is yetpam intas o Ihova ehele Haceai naprofeta, um ika,

¹¹ Et ika a Ihova esjilid acen; Namu ahodai ilpu atimi ahlap aiek vai intas alep, um ika,

¹² El et apos nuarin nohu itai itap tah an napelumai o im, um atcei pan an tid iran tah nareto, ka tah nitai caig er atho, ka tah nide vaine, ka tah narakei oliv, ka tah nitai era caig natimi, inyi itap nitai iji igki vaig, ka oʼo? Eris tas a ilpu atimi ahlap, um ika, Oʼo.

¹³ Is lep ika a Haceai, El et atcei pan tah nitai iji igki tah natimi et mun has aien va nohui natimi mas, inyi has nitai iji igki vaig, ka oʼo? Eris tas a ilpu atimi ahlap, um ika, Etpu has vaig.

¹⁴ Is aketo a Haceai um tas, um; ika, Et ika a Ihova, Et idim uco va atimi iji igki, et idim uco va nup uran pece inigki an nuhup unyak; et lep uce va niji auritai asega era ago ara: et lep has niji itai era ahlap iran ara eahki.

¹⁵ Im lep inig, akumu idim aktaktai aijaua vaig ahes an nadiat inigki, um lep yetpan an nopan iyehki is ti pan itac, nopan iyehki marom eris wat eti fi actaig inhat is ethi ijinies irai taka hat an neom itap u Ihova:

¹⁶ ahes an nopan iyehki um imihum pam an nopan inig, is wat apan tah u niji irai hwiit eris upyi hup um eteuc incat is twente iran, ja is eteuc ten ache; is wat apan tah u netpen nide vaine par athoi netpen an nide vaine yi ohua nipjinitai inyi fifte, ja is twente ache.

¹⁷ Et ika a Ihova, Kis auud caua ainyak an nimlai irai itai, im inmemid irai itai, im incopda hat, irai auritai asega u ikmamia; ja akis eti adumoij pam ehelek aijaua.

¹⁸ Akumu idim aktaktai aijaua vaig ahes an nadiat inigki um yetpan an nopan iyehki is ti pan itac, ahes an nadiat twente ford an mohoc naind, ahes an nadiat inigki eris ati nededuon neom itap u Ihova, akumu aktaktai vaig aijaua.

¹⁹ Et idim eti amen nupsi itai an neom ikni upsi itai iran; et eti fi oho vaine, im nateg, im pumcranet, im oliv: ekpu atupun ainyak an nadiat inigki um asan tas acis yi alwai caua.

²⁰ Is lep aketo um yetpam intas o Ihova ehele Haceai an nadiat twente ford an mohoc iyehki, um ika,

²¹ Namu tas aiek ehele Serubabel, natimi alupas u nup u Juta, um ika, Ekpu eucjeucjaig nohatag im lep nobohtan ainyak;

²² ekpu iknipagki ilpu atimarid u nup urai iji elcau ainyak, ekpu lep auahas ilpu eucsupo u nup urai iji pece ainyak; ekpu auahas niji jariot ainyak, im lep ra era ateuc iran ara; erupu eropropse niji hors, im lep ra era ateuc irai hors ara; erupu atgei jipe ra ara an nedoa.

²³ Et ika a Ihova esjilid acen; An nadiat iyehki ekpu leh euc ainyak, ak Serubabel inhal u Sialtiel, naheca unyak; et lep ika a Ihova, Ekpu ika ainyak an idivaig tah nitai asjaaicuaig aiek er ago ipjin itai iran; et lep ika a Ihova esjilid acen, Ek idim imiacitak euc ainyak.