Haceai 1 - Intas Etipup

NUARIN TAS ALUPAS 1.

1 Et acaiji atimi a Haceai va nedo ura par eti actaig neom u Ihova. 7 Et ahugni ra aien mika eri actaig. 12 Et asaig aien mika yi atau ra a Atua an nauritai ura.

¹ AN mesese sekunt irai Taraius natimarid, an mohoc siksd, an nadiat uhup an mohoc iyehki, is yetpam intas o Ihova ehele Haceai naprofeta imi Serubabel inhal u Sialtiel, natimi alupas u nup u Juta, im lep imi Josua inhal u Josetek, natimi esjilid an nahlap, um ika,

² Et asan tas a Ihova esjilid acen, um ika. Era ika natimi iji igki, Et eti fi yetpam nopan, nopan marom par actaig neom o Ihova iran.

³ Is yetpam intas o Ihova ehele Haceai naprofeta, um ika,

⁴ Et eti upene vai caua par amen an nopan inig iraili eom unyimia er ahled uari cai iran, ja et mun has neom inigki.

⁵ Va nitai inigki et ika a Ihova esjilid acen; Akumu aktaktai nedo unyimia aijaua.

⁶ Eka mun ahwaig nupsi itai alupas aijaua, jam lucsei haklin nohwai itai; eka mun hag aijaua, jam eti geije; eka mun umwig aijaua, jam eti ehgin wai; eka mun aso caua ira apelumai aijaua, jam eti ehehtin; aien et mun auritai vai nimtan aien, et leh nimtan aien jam atohwaig an cat ijoijo.

⁷ Et ika a Ihova esjilid acen, Akumu aktaktai nedo unyimia aijaua.

⁸ Et ika a Ihova, Aridjai an nesei aijaua, um imiua pani auicai, um actaig neom; ekpu imiacitak ainyak iran, eri lep imiahpas nyak eahki.

⁹ Akis aitgai nohwai itai alupas aijaua, ja is idim haklin; akis wat imiapam nohwai itai an nimnim unyimia aijaua, kis asan tas has vaig ainyak. Et ika a Ihova emda acen, Vanhe? Mika et jase neom unyak, ja eka athut pan aijaua asega rai eom unyimia, athi um athi ehni.

¹⁰ Va nedo unyimia inigki et eti ahes nopoigmul an nohatag um asuol, et lep eti ededel nohwai itai an nobohtan.

¹¹ Im lep inig, ek mun ika ainyak yi alupas nagesega an pece, im lep irai iji au, im lep irai korn, im lep irai nide vaine, im lep irai narakei oliv, im lep irai iji itai et ededel an nobohtan, im lep ira atimi, im lep irai iji itai eklim edo irai pece, im lep irai auritai asega u ikmamia.

¹² Eris um atahaijeg intas o Ihova Atua ura a Serubabel inhal u Sialtiel, im Josua inhal u Josetek, natimi esjilid an nahlap, im lep nahri atimi asega, eris lep imiaiji intas o Haceai naprofeta ara, va nitai iji igki is abrai yin vaig a Ihova Atua ura; eris imtitaig Ihova natimi asega.

¹³ Is asaig intas o Ihova ehele atimi a Haceai naheca u Ihova, um ika, Et ika a Ihova, Ek idim amen ehelemia ainyak.

¹⁴ Is ahugni lele Serubabel inhal u Sialtiel, natimi alupas u nup u Juta a Ihova, im lele Josua inhal u Josetek, natimi esjilid an nahlap, im lep lele nahri atimi asega; eris um apam ara um ago nauritai va neom u Ihova esjilid acen, Atua ura.

¹⁵ An nadiat twente ford an mohoc siksd, an mesese sekunt irai Taraius natimarid.