Habakuk 2 - Intas Etipup

NUARIN TAS ALUPAS 2.

1 Et wat aitgaig, vai intas a Habakuk, er asuptecnaig ehelen mika yi aitgaig aien um imiisjis ninveijec. 5 Neruvaig irai nup u Kaltia va nahvig alupas itai ura, 9 vai inhas irai itai ura, 12 va nedo ipjin ura, 15 va nahnag ura vai kava, 18 im lep va nedo apat ura.

¹ EKPU aiji ainyak an nuarin yaspan unyak, ekpu lep aiji ainyak an neom ijinies, um yasyas par ato intas inig etpu asaig ehelek aien, im lep intas inig ekpu asaig ainyak ehelen ei u wit ated nyak aien.

² Is tas ehelek a Ihova, um ika, Namu aged intas ehvaig aiek, um ago upene irai hat, mika yi tup upene vai yin et esvi intas iran aien par lep athut.

³ Eris idim ati intas ehvaig va nopan o un eris asaig, ja etpu tas pam et wat yetpam nopan nago ehni, um eti ahcil: el et eti fi auroauro napu lep aitgaig vaig aiek; etpu idim yetpam, um eti itu.

⁴ Namu almoi natimi inig aiek et ijinies inliinmopon aien! et eti atoh nedo o un; ja aien et atoh nedo o un, etpu umoh aien va nimiisjis ninveijec o un.

⁵ Et idim inveijec, nikavaig, et itai imiahnag atimi waina, et eti amense an nimnim oun a natimarid u nup Kaltia, et ijinies inliinmopon aien, et ika aien yi alupas inmerit o un um idivaig inpece has, et lep idivaig inmas aien, et ehka vai jin par ika et geije aien, et asjapicnaig nup urai iji pece asega ehelen aien, um ika eri ahtag pan ehelen natimi asega:

⁶ ja erupu idim acesaces nohranitai vai yin ara asega, um lep atni neuhni iran, um ika, Awe, kaiheuc vai yin et asjapicnaig niji itai ui tak atimi! eri ago um yetpan an nahopan? kaiheuc vai yin et ago imi yin niji itai aien et eti fi auanimtan!

⁷ Erupu idim auroauro um atidai ara sji igki era mun eti leh nimtan ura ara, erupu aijilahlah ara sji igki erupu atijai nohocred iram ara, um atoraliak naga unyum an nedoa.

⁸ Vaig inig nikavaig, na mun atoraliak naga u nup urai pece et ahinag aiek an nedoa, erupu atoraliak naga unyum an nedoa a ilpu ahri nup urai iji pece asega; vaig inig nikavaig, na mun atgei atimi aiek, um auahas nobohtan, na mun lep alcapdicraig niji maliyum aiek, um lep atgei atimi asega amen iran.

⁹ Kaiheuc vai yin et ehcerucai atimi aien um lucsei naga ura vai nup uran nimnim o un, et ika aien yi amen an nimnim elika aien et idivaig inmeijcop, inyi eti auahas yin tah nitai!

¹⁰ Erupu ehcamai a ilpu hal unyum im ilpu mapom va nedo unyum, nikavaig, na mun atgei nup urai iji pece et ahinag aiek, na mun lep ago nedo has vai euc aiek.

¹¹ Etpu aunyauwaig inhat er actaig an yipin neom, etpu lep tas pam brik et amen an nauincai atgeig.

¹² Kaiheuc vai yin et atgei atmas atimi aien, um actaig maliyum va nedo inigki, um lep ago nedo acalacal mika yi amen aktit nimnim o un vaig!

¹³ Et idim ahes ehele Ihova esjilid acen neruvaig inigki, nikavaig, eri auritai natimi an cap, eri lep esvi ra a nup urai iji pece van takitai ache.

¹⁴ Etpu idim ohua an nobohtan nato itai va natimi alupas u Ihova, et idivaig et ataluopni niji uarin ubo injap.

¹⁵ Kaiheuc vai yin et aluman tah kava aien, na atladwi nitai acen unyum vai yin aiek, um ika yi ahnag aien, mika an almoi nehcamai o un aiek!

¹⁶ Na ehcamai alupas aiek, er eti imiahpas euc: namu lep umwig aiek, uhmu ecetai neti aperitome unyum: uhpu ahidaig pam ehelum nipjinitai u inmatai Ihova; napu alo alupas aiek um ehcamai, inyi idim ti natimi alupas unyum.

¹⁷ Etpu ataluopni euc nedo ipjin unyum vai nup u Lebanon, et idivaig nimtitaig alupas ura va niji itai aleg an nauahas ra vaig; vaig inig nikavaig, na mun atgei atimi aiek, um auahas nobohtan, na mun lep alcapdicraig niji maliyum aiek, um lep atgei atimi asega amen iran.

¹⁸ Nitai uri natmasimai inig eris wud ugnyit iran, is wud ugnyit iran a natimi ago; im lep natmasimai inig eris atho par ago, et esege niji itai ahcil aien, mika et mun asgeig an nauritai o un a natimi ago, et mun ago natmasimai inig et eti tas aien?

¹⁹ Kaiheuc vai yin et ika aien ehele nauincai, Namu aijilahlah aiek; um ika ehele inhat inig et eti tas, Namu atidai aiek; Inyi eti esege imi atimi nitai naico! Er adahpoi nitai inigki irai colt im silver, ja et idim eti eteuc nitai umoh iran anliin.

²⁰ Ja et amen a Ihova an neom itap o un: erumu eucsup an nuhup o un a nup uran nobohtan asega.