Habakuk 1 - Intas Etipup

NUARIN TAS ALUPAS 1.

1 Et asan tas ehti a Habakuk va nedo has o atimi. 5 Er asuptecnaig ehelen neruvaig alupas inig eri ago a nup u Kaltia. 12 Et asan tas ehti aien, vaig inig nikavaig, eri aru nedo has ura ara sji ig et esjilid nedo has ura.

¹ IS ecetai nitai ehvaig inigki a Habakuk naprofeta.

² Ak Ihova, ekpu ahlaig ainyak um yetpan an nahopan, ja napu eti atahaijeg aiek! ekpu ahlaig ijinies vai euc ainyak va nedo ipjin ura vai cama, ja na eti imiatamaig cama aiek!

³ Na a uri aiek par ehvaig nedo has ehelek, um ika ehelek ki almoi nohocred ainyak? et eteuc an nuhup unyak nauahas itai im nedo ipjin vai atimi: et lep eteuc nimiisjisitai jipe im nehtauo.

⁴ Va nitai inigki er auoh takitai intas alep, er lep eti asuptecnaig nimtan inveijec: era idim ago nedo efaifa vai ilpu atimi upene a ilpu atimi auatatimi; va nitai inigki er asaig intas alep et acalacal.

⁵ Ak nup u Juta, akumu almoi aijaua ehele nup urai iji pece, um ato, um imiali alupas: ekpu idim ago tah nauritai ainyak ira adiat unyimia, ja el er asuptecnaig nauritai inigki ehelemia, akupu eti imiisjis ninveijec vaig aijaua.

⁶ Ekpu idim ikni nup u Kaltia ainyak, natimi iji ig et ipjin nedo ura, era auroauro alupas ara, era apaahni irai iji pece asega ara, par ohuun niji uarin ui tak atimi mika eri amen iran ara.

⁷ Era eucjeucjeucaij natimi um imtitai ra: era tup ispara asan tas alep ara, um ika eri esjilid ara.

⁸ Et lep esjilid nathut u hors ura irai pander, um esjilid nedo ipjin ura irai kuri aleg an jupura: era apaahni an nobohtan a ilpu eucsupo ura era ateuc irai hors ara, era lep ahes itac acen um apam a ilpu eucsupo ura era ateuc irai hors ara; era auroauro ara et idivaig inmeijcop alupas et wat aepan aien mika yi hag.

⁹ Era ham ara asega mika eri atoraliak itai ara: et idivaig natoga nesgaiimtara par auahas itai, era asjapicnaig atimi ara an nedoa um lucsei pan ra et idivaig nauanavig.

¹⁰ Era imilaav ilpu atimarid ara, um imiafakahcil ilpu atimi alupas: era laav ara va niji eom emda asega; era idim assijai nobohtan ara, um atoraliak iji eom.

¹¹ Ja et lep alupas nemda ura vai itai, era ahced inpece ara, um ago nedo has, um ika, Nemda u nup u Juta nigki vai Atua ura, ka oʼo?

¹² Ak Ihova Atua unyak, Natimi itap unyak, as idim ispum eteuc aiek itu acen irai iji mesese asega; ecrupu eti emesmas aijama. Ak Ihova, na mun ikni ra aiek mika cri aredei cama ara; ak Atua emda acen, na mun aniv ra aiek mika eri acaiji cama ara.

¹³ Et esjilid in weila u nesganimtam, na esjum aiek par alum nedo has; et ehka vai euc par almoi nedo acalacal: na a uri aiek par alum ra sji igki era atoraliak itai ara, um eti tas era wat atgei atmas ilpu atimi upene a ilpu atimi auatatimi?

¹⁴ um ika eri idivaig mu an jap natimi, um idivaig niji itai acrac, et ti natimi alupas ura.

¹⁵ Era aihiyi ra asega an cauaij ara, um ahteg an nadau ira ra irai opoig ura, era lep anai ra irai aule ura ara: va nitai inigki era imiacitak ara um asaig intas ijinies.

¹⁶ Va nitai inigki era ahlap ara vai nopoig ura, um atnamud nitai auanipin upene vai naule ura; vaig inig nikavaig, et adale niji itai hegaig ura vai itai iji igki, um alupas nitai adipiaig ura.

¹⁷ Va nitai inigki erupu idim atladwi itai amen an nopoig ura ara, um eti atumop par atgei nup urai iji pece, ka oʼo?