Ester 9 - Intas Etipup

Nuarin tas alupas 9.

1 Era atgei ilpu atimi tak atimi ira ra a nup u Juta, im lep ilpu halav atamaig u Heman et ten, era imiimtacimtac Mortike a ilpu atimi alupas irai iji uari pece, um atau imi ra. 12 Vai intas o Ester et tas alep a Ahasuirus mika eri atgei atimi an nadiat et eche, um aijcei ilpu halav atamaig u Heman. 20 Eh ati aktit nadiat erahki et ero irai Purim mika eri asjapicnaig iran ara, um imiehva nitai iji igki.

¹ AN mohoc twelfd, inmohoc Etar marom, an nadiat dirtiind iran, is wat ubutpotet nopan eri ago intas alep u natimarid im nitai inig is ati aien, an nadiat iyehki eris aktaktai a ilpu atimi tak atimi irai up u Juta mika eri esjilid ira ra ara, (ja is eti uce, eris idim esjilid a nup u Juta irai ra sji ehki eris amcel vai ra ara;)

² eris ehras asjapicnai ra a nup u Juta irai maliyum ura, irai iji uari pece asega u Ahasuirus natimarid, mika eri auahas atimi merit natgei ra vaig: eris auatialidi natimi asega an nuhup ura; eris imtitai ra natimi asega.

³ Eris atau imi nup u Juta a ilpu atimarid asega irai iji uari pece, im ilpu atimi alupas, im ilpu atimi eris ikni ra va nauritai u natimarid, im ilpu aheca u natimarid; is idim yetpan ira ra nimtitaig Mortike.

⁴ Is esjilid a Mortike an nimnim u natimarid, is apaahni intas irai iji uari pece vai yiu: is aridjai irai iji adiat a natimi iyehki, Mortike marom.

⁵ Is idim uco, eris auahas ilpu atimi tak atimi ira ra asega a nup u Juta an nedoa, um atgei ra, um auahas ra, um ago is idivaig eris merit ara va atimi amcel vai ra.

⁶ Eris atgei um auahas atimi is faiv huntret (500) a nup u Juta an maliyum Susan is eteuc nimnim atimi iran.

⁷ Eris atgei ilpu halav atamaig is ten u Heman inhal u Hametada, natimi tak atimi irai up u Juta; nan, Parsantada, im Talfon, im Aspada,

⁸ im Porada, im Atalaia, im Aritada,

⁹ im Parmasta, im Ariseai, im Ariteai, im Vajesada,

¹⁰ ja eris eti lucsei itai ura ara.

¹¹ An nadiat iyehki eris asuptecnaig an nuhup u natimarid vai ra sji ehki eris atgei ra an maliyum Susan is eteuc nimnim atimi iran.

¹² Is ika a natimarid ehele Ester natimarid takata, Era mun atgei um auahas atimi et faiv huntret (500) an maliyum Susan et eteuc nimnim atimi iran a nup u Juta, im lep ilpu halav atamaig et ten u Heman; era mun ago inhe ara irai uari pece et eche u natimarid? nitai ugyi unyum nevitai? uhpu alupai euc: im nitai merit unyum nevitai?

¹³ Is ika a Ester, El et upene irai natimarid, uhmu asaig ehele nup u Juta era amen an maliyum Susan ara, mika eri lep ago imraig ara, et idivaig intas alep inpig, uhmu alcinwai ilpu halav atamaig et ten u Heman an nauincai alcinwa atimi iran.

¹⁴ Is asaig a natimarid mika eri ago yi uce: eris asaig intas alep an maliyum Susan; eris um alcinwai ilpu halav atamaig u Heman is ten.

¹⁵ Eris lep asjapicnaig a nup u Juta eris amen ara an maliyum Susan an nadiat fortiind au mohoc Etar, um atgei atimi is dri huntret (300) an maliyum Susan; ja eris eti lucsei itai ura ara.

¹⁶ Ja eris ehras asjapicnai ra a nup u Juta is eche eris amen ara irai iji uari pece u natimarid, um imiatamai ra, um atumop vai ilpu atimi tak atimi ira ra, um atgei atimi is sevente faiv dausant (75,000) irai ilpu atimi tak atimi ira ra, ja eris eti lucsei itai ura ara,

¹⁷ an nadiat dirtiind an mohoc Etar; ja an nadiat fortiind iran eris atumop ara, um ika yi adiat par hag um cediaig iran.

¹⁸ Ja eris asjapicnaig a nup u Juta eris amen ara an maliyum Susan an nadiat dirtiind iran, im lep an nadiat fortiind; ja an nadiat fiftiind iran eris atumop ara, um ika yi adiat par hag um cediaig iran.

¹⁹ Va nitai inigki eris ati nadiat fortiind an mohoc Etar a nup u Juta, eris amen irai maliyum haklin, im niji maliyum is ti nathatahau um arahed iran, mika yi adiat par imiacitak iran, um hag, um tup ahtai jipe niji itai tup ahtai.

²⁰ Is aged nitai iji igki a Mortike, um imiapan nitaasviitai imi nup u Juta asega irai iji uari pece asega u Ahasuirus natimarid, ubutpotet im lep itac acen,

²¹ va etpu ago yi aktit aien nitai inig ehele ra, nikavaig, eri apos nadiat fortiind an mohoc Etar, im lep nadiat fiftiind iran, irai iji mesese,

²² nadiat eraigki marom, eris atumop iran vai ilpu atimi tak ati-mi ira ra a nup u Juta, im inmohoc inig eris aktaktai ara mika eri leh nohocred iran ara jam eti leh, im nadiat inig eris aktaktai ara mika eri taigtaig iran ara, jam eti taigtaig: im lep inig, mika yi adiat par hag iran nadiat eraigki um imiacitak, um ahtai jipe niji itai tup ahtai, um aiheuc vai ilpu ihki atimi.

²³ Eris asaig a nup u Juta mika eri ago yi idivaig eris atupun ara um ago, is idivaig is aged imi ra a Mortike;

²⁴ vaig inig nikavaig, is aktaktai vai nup u Juta a Heman inhal u Hametada, mapoi Ecac, natimi tak atimi irai up u Juta asega, mika yi auahas ra aien, um ikni Pur, nesgantas iran, nitai asjaaicnaig, par auahas ra, um atgei ra;

²⁵ ja is wat apan a Ester ehele natimarid, is tas alep an nitaasviitai aien mika eri atijai iran nitai has iyehki is aktaktai aien vai nup u Juta, im lep inig, mika eri alcinwan an nauincai alcinwa atimi iran im ilpu halav atamaig o un.

²⁶ Va nitai inigki eris anvi nidan nadiat erahki par ika Purim, nilpun nidai Pur. Vai intas an ni-taasviitai iyehki, im niji itai asega eris almoi ara an nitai iyehki, um yetpam vai ra,

²⁷ eris ati a nup u Juta, um asaig intas aktit vai ra, im ilpu mapora, im lep vai ra asega eri tup ethi ache pan ira ra ara, va yi jim ti, ja eri apos nadiat erahki is idivaig intas eris aged, an nopan iyehki eris asaig, irai iji mesese;

²⁸ im lep inig, eri imiehva nadiat erahki um apos ehele atimi asega, im ilpu atimeten asega, irai iji pece asega, im niji maliyum asega; inyi eti lep ti nadiat erahki, nadiat Purim marom, ehele nup u Juta, erupu imiehva iran um eti atumop a ilpu mapora.

²⁹ Erus aged intas emda a Ester natimarid takata, inhalav atahig u Abiheel, im lep Mortike nup u Juta, mika yi ipjin nitaasviitai apitac vai Purim.

³⁰ Is imiapan nitaasviitai aien, is eteuc intas igpa im inveijec iran, ehele nup u Juta asega irai iji uari pece, is wun huntret im twente seven (127) an nelcau u Ahasuirus,

³¹ mika vi ipjin nadiat erahki irai Purim, irai opan eris ati, is idivaig erus asaig ehele ra a Mortike nup u Juta im lep Ester natimarid takata, um lep idivaig intas aktit eris asaig vai ra ara im ilpu mapora, nitai inig marom eris atwakam vaig ara um taigtaig vaig.

³² Is ago aktit nitai iji igki vai Purim intas alep u Ester; eris um aged an nitaasviitai.