Ester 8 - Intas Etipup

Nuarin tas alupas 8.

1 Ek imiaridjai Mortike. 3 Et ugyi natimarid a Ester mika yi aged aien mika yi eche nitaasviitai u Heman. 7 Et tas alep a Ahasuirus mika eri imiatamai ra a nup u Juta. 15 Natimi alupas u Mortike, im nimiacitak u nup u Juta.

¹ AN nadiat iyehki is alupai Ester natimarid takata nimnim u Heman natimi tak atimi irai up u Juta a Ahasuirus natimarid. Is apan a Mortike ehele natimarid; is idim asuptecnaig a Ester mika is atimi ehpan iran aien.

² Is atipagki rig o un a natimarid, iyehki is atipagki irai Heman aien, um alupai Mortike. Is ati Mortike a Ester mika yi esjilid an nimnim u Heman aien.

³ Is lep tas a Ester an nuhup u natimarid, um eropse u neduon, is taig aien um ugyi yin par atapnes nitai has u Heman mapoi Ecac, im naktaktai inig is aktaktai aien vai nup u Juta.

⁴ Is ada niseuc colt va natimi alupas a natimarid vai Ester. Is par atidai a Ester um aiji an nuhup u natimarid,

⁵ um ika, El et upene irai natimarid, el et upene inliinmopon aien vai nyak, el et upene nitai inig vai natimarid, el et lep aiyu inliinmopon aien vai nyak, uhmu aged intas par atapnes naktaktai inig is aktaktai a Heman inhal u Hametada, mapoi Ecac, is aged aien par auahas nup u Juta era amen ara irai uari pece asega u natimarid:

⁶ inyi auatialidi inliinmopok ainyak, eku wit almoi nohocred iyehki etpu yetpam irai ilpu etwak; etpu auatialidi inliinmopok ainyak par almoi nauahas ilpu atimi ehpan irak vaig.

⁷ Is ika a Ahasuirus natimarid ehele Ester natimarid takata, im lep ehele Mortike nup u Juta, Ek mun idim alupai Ester nimnim u Heman, eris alcinwan an nauincai alcinwa atimi iran ara, va nedo o un, nikavaig, is ada nikman aien vai nup u Juta.

⁸ Akumu lep aged nitaasviitai aijaurau vai nup u Juta et idivaig erau merit vaig aijaurau, an nidai natimarid, um atapnes iran irai rig u natimarid: et idim itap va atimi asega par ika yi eche intas inig er aged an nidai natimarid, um atapnes irai rig u natimarid.

⁹ Eris ahlaig vai ilpu atimi aged itaasviitai u natimarid an nopan iyehki an mohoc dirt, inmohoc Saivan marom, an nadiat twente dirt iran; eris um aged is idivaig is asaig a Mortike, ehele nup u Juta, im ilpu atimi aminjinaig irai uari pece, im ilpu atimi eris ikni ra, im ilpu atimi alupas irai uari pece, ahes Intia um yetpan Idiopia, niji uari pece is wun huntret im twente seven; eris aged vai nup urai uari pece asega is idivaig naged itai vaig ura, im nup urai uari pece asega is idivaig intas ura, im lep imi nup u Juta is idivaig naged itai vaig ura, im intas ura.

¹⁰ Is aged intas aien an nidai Ahasuirus natimarid, um atapnes iran irai rig u natimarid, um imiapan itaasviitai ira atimi apos itaasviitai, eris ateuc irai hors ara, im myul, im kamela, im inhakli kamela atga upene.

¹¹ Eris asuptecnaig iran mika is upene irai natimarid mika eri ehras asjapicnaig a nup u Juta irai iji maliyum asega, um imiatamai ra, um auahas, um atgei, um ahlo niji pak an nedoa asega irai iji uari pece asega eri merit ara nauahas ra vaig, im ilpu halav im ilpu takata, um lep lucsei itai ura nimtan,

¹² an nadiat is ethi ache irai uari pece asega u Ahasuirus natimarid, an nadiat dirtiind an mohoc twelfd, inmohoc Etar marom.

¹³ Is apaahni ira atimi asega nitaasviitai, is idivaig intas an nitaasviitai uhup intas iran, va etpu tas alep irai uari pece asega, eri lep amatata a nup u Juta vai nadiat iyehki par aru irai ilpu atimi tak atimi ira ra.

¹⁴ Eris atga ura a ilpu atimi apos itaasviitai eris ateuc irai myul ara im kamela, is lep tas alep a natimarid mika eri auroauro ara um eti ecrap. Eris asaig intas alep iyehki an nimnim atimi Susan.

¹⁵ Is ahes ehele natimarid a Mortike, eris aso yin ira apelumai esjilid is cap um ahi, is lep eteuc korona alupas irai colt o un, im napelumai is ethi is yilyil um cap: eris imiacitak um cediaig a nup u Susan.

¹⁶ Is eteuc inlah, im nimiacitak, im incediaig, im nimiahpas ra ehele nup u Juta.

¹⁷ Is amen nimiacitak im incediaig, im inhag alupas im nopan upene, ehele nup u Juta irai iji uari pece asega, im niji maliyum asega, is yetpan iran intas alep u natimarid im nitai inig is asaig aien. Eris ika natimi is ahinag an pece iyehki eris up u Juta ara; is idim eteuc ira ra nimtitaig vai nup u Juta.