Ester 7 - Intas Etipup

Nuarin tas alupas 7.

1 Et wat alumai natimarid im Heman a Ester, et ugyi natimarid aien mika yi umoh aien im nup uran pece o un. 5 Et atijai itai irai Heman aien. 7 Et edemda alupas a natimarid, et wat ato aien va nauincai alcinwa atimi iran is ago a Heman vai Mortike, et ika aien eri aijcei Heman iran.

¹ Erus apan a natimarid im Heman mika eru umnyi nide vaine arau ehele Ester natimarid takata.

² Is aketo a natimarid um ika ehele Ester an nadiat sekunt, is wat umnyi nide vaine aien, Ak Ester natimarid takata, nitai ugyi unyum nevitai? uhpu alupai euc: im nitai merit unyum nevitai? uhpu ago um yetpan irai nahaijin nelcau unyak.

³ Is tas a Ester natimarid takata, um ika, El et upene inliinmopom aiek vai nyak, ak natimarid, el et lep upene irai natimarid, ekmu umoh ainyak vai intas ugyi euc unyak, erumu lep umumoh a ilpu atimi ehpan irak et idivaig nitai merit unyak:

⁴ eris ahtai cama, ainyak marom im lep ilpu etwak, va uhpu auahas cama, um atgei, um auud. El eris ahtai cama va ecrupu ilpu aheca atamaig aijama im ilpu aheca atahig, el ek eti tas ainyak, ja et ehka vai natimi tak atimi irama par ika yi jim leh inhas vaig a natimarid.

⁵ Is tas a Ahasuirus natimarid ehele Ester natimarid takata, um ika, Natimi inigki a di? an yeuc eda aien, et emda inliinmopon aien parago nitai inigki?

⁶ Is ika a Ester, Et atimi tak atimi irama um amcel vai cama a nat igki Heman, et auatatimi aien. Is imtitaig a Heman an nuhup u natimarid im natimarid takata.

⁷ Is edemda a natimarid, um udei nide vaine, um apan an nokoro u nimnim atimi: is atidai a Heman par ugyi Ester natimarid takata mika yi jim mas aien; is idim ato aien mika is aktaktai tah nitai has vai yin a natimarid.

⁸ Is ahes an nokoro u nimnim atimi a natimarid, um apan an nuarin inig eris umnyi nide vaine iran; is mun eropse a Heman an tinan inig is ateuc iran a Ester. Is ika a natimarid, Etpu idim ago nedo has irai natimarid takata aien an nuhup unyak im lep anliin neom, kaʼo o? Is wat tas a natimarid eris adahpoi nesganimtai Heman ara.

⁹ Is tas ehele natimarid a Harbona, natimi is ethi irai ilpu aheca, um ika, Et idim eteuc an nimnim u Heman nauincai alcinwa atimi iran, nijinies iran kubit et fifte, is ago a Heman imi Mortike, aien aigki is tas upene vai natimarid aien. Is ika a natimarid, Akumu alcinwan iran aijaua.

¹⁰ Eris alcinwai Heman ara an nauincai alcinwa atimi iran is ago imi Mortike aien. Is par eropse inliinmopoi natimarid.