Ester 6 - Intas Etipup

Nuarin tas alupas 6.

1 Et wat esvi an nitaasviitai vai ilpu atimarid a Ahasuirus va nedo upene u Mortike, et aktaktai neruvaig imi yin aien. 4 Et wat ham a Heman par ugyi natimarid mika eri alcinwai Mortike, et asuptecnaig nedo inig aien, jam eti ato, mika eri ecen alupas vai yin. 12 Et wat asan tas ehti aien va namen has o un, era asaig ehelen a ilpu apa o un mika yi mas aien.

¹ AN nepig iyehki is eti umjeg a natimarid, is asaig aien mika eri imiapam nitaasviitai asuptecnaig itai eris ago irai iji adiat; eris esvi intas iran an nuhup u natimarid.

² Eris ecetai intas eris aged inigki, nikavaig, is asuptecnaig a Mortike vai Bicdan im Tires, natimi is ero irai ilpu aheca u natimarid, erus aminjinaig neucse neom arau, um merit par auahas Ahasuirus natimarid.

³ Is ika a natimarid, Is leh naiheuc nevitai imi yin a Mortike va nedo inigki? eris ecen vai yin an nev edo? Eris ika a ilpu aheca u natimarid eris aminjinai yin ara, Eris eti ago tah nitai vai yin.

⁴ Is ika a natimarid, Et amen an nokoro a di? Is yetpan a Heman anliin nokoro itac u neom u natimarid, mika yi tas aien ehele natimarid par alcinwa Mortike an nauincai alcinwa atimi iran inig is ago imi yin aien.

⁵ Eris ika a ilpu aheca u natimarid ehelen, Et idim aiji a Heman anliin nokoro. Is ika a natimarid, Etmu ham aien anliin neom.

⁶ Is apan anliin neom a Heman. Is ika ehelen a natimarid, Uhmu ago inhe vai natimi inig et merit a natimarid nago vaig nedo ecen vai yin? Is aktaktai a Heman an liinmopon, Inyi eti ago nedo ecen vaig tah natimi a natimarid et esjilid irai nedo ecen o un vai nyak.

⁷ Is ika a Heman ehele natimarid, Et upene nedo inigki vai natimi inig et merit a natimarid nago vaig nedo ecen vai yin, nikavaig,

⁸ Uhmu imiapam napelumai va natimi alupas, et aso yin iran a natimarid, im hors et atga iran a natimarid, im korona va natimi alupas er atijai an nidjinin:

⁹ etmu lucsei napelumai im hors tah irai ilpu atimi alupas esjilid u natimarid, mika eri aso natimi inig et merit a natimarid par ago nedo ecen vai yin, um imiatga yin nateuc vaig irai hors an nefalaig an maliyum, um uhup iran um asaig ijinies, Uhmu ago yi uce vai natimi inig et merit a natimarid nago vaig nedo ecen vai yin.

¹⁰ Is ika a natimarid ehele Heman, Namu auroauro aiek um lucsei apelumai im hors, et idivaig na mun asaig aiek, um ago irai Mortike nup u Juta, aien aigki et ateuc an neucse neom u natimarid aien: namu ago nitai iji igki asega na mun asaig aiek.

¹¹ Is lucsei napelumai im hors a Heman, um aso Mortike iran, um imiapan yin nateuc vaig irai hors an nefalaig an maliyum, um uhup iran um asaig ijinies, um ika, Uhmu ago yi uce vai natimi inig et merit a natimarid nago vaig nedo ecen vai yin.

¹² Is lep apan an neucse neom u natimarid a Mortike. Ja is auroauro a Heman um apan anliin neom o un, is taigtaig aien, um adahpoi nidjinin.

¹³ Is asuptecnaig a Heman ehele Sires ehgan im ilpu atimi ehpan iran asega niji itai asega is yetpam iran. Eris ika ehelen a ilpu atimi arapakau o un im lep Sires ehgan, El et up u Juta a Mortike, um atupun aien um esjilid iram, napu eti esjilid iran aiek, etpu auahas euc aien.

¹⁴ Eris eti fi tas ehni ehelen ara, ja eris apan a ilpu aheca u natimarid, mika eri auroauro ara um imiapan Heman u nitai caig is ago a Ester.