Ester 5 - Intas Etipup

Nuarin tas alupas 5.

1 Et asgeig an naiheuc u natimarid a Ester, et ada niseuc colt imi yin a natimarid, et imiacaij natimarid im Heman a Ester, mika eru apam arau um umnyi nide vaine ehelen. 6 Et eropse a Ester va nedo aiheuc u natimarid, et lep imiacaij rau aien mika eru lep apam arau um umnyi nide vaine ehelen, etu wit lahlah an tak adiat. 9 Et imiacitak a Heman va nimiaridjai yin vaig, jam edemda va neti ecen vai yin u Mortike. 14 Vai intas o Sires et ago nauincai alcinwa atimi iran vai yin aien.

¹ IS wat ti pan itac nadiat is ero, is aso yin a Ester ira apelumai es-jilid o un, um aiji anliin nokoro is eteuc juju au nimnim u natimarid, ubutpotet pan neom u natimarid: is lep ateuc a natimarid an nitai ateuc esjilid o un anliin neom u natimarid, is eteuc neucse neom an nuhup o un.

² Is wat almoi Ester naiji vaig an nokoro a natimarid, is upene inliinmopon aien vai yin: is ada niseuc colt is amen an nikman a natimarid vai Ester. Is apan ubutpotet a Ester um atcei pan nidjan niseuc.

³ Is ika ehelen a natimarid, Na merit vanhe aiek, ak Ester natimarid takata? nitai ugyi unyum nevitai? uhpu alupai euc um yetpan irai nahaijin nelcau unyak.

⁴ Is ika a Ester, El et upene irai natimarid, etmu ham a natimarid im lep Heman inpig va nitai caig ek mun ago ainyak vai yin.

⁵ Is ika a natimarid, Asaig ehele Heman mika yi auroauro aien um ago et idivaig et asaig a Ester. Is apan a natimarid im lep Heman u nitai caig is ago a Ester.

⁶ Ehtijis wat umnyi nide vaine ahtaij, is ika a natimarid ehele Ester, Nitai merit unyum nevitai? uhpu idim alupai euc: im nitai ugyi unyum nevitai? uhpu ago um yetpan an nahaijin nelcau unyak.

⁷ Is tas a Ester, um ika, Nitai ugyi unyak, im nitai merit unyak nigki;

⁸ El et upene inliinmopoi natimarid vai nyak, el et lep upene irai natimarid par alupai nyak nitai ugyi unyak, um ago nitai merit unyak, etmu ham a natimarid im lep Heman u nitai caig ekpu ago vai rau ainyak; ekpu ago ainyak imraig et idivaig et mun asaig a natimarid.

⁹ Is alau ijo a Heman an nadiat iyehki, is cediaig aien, is lep imiacitak inliinmopon aien: ja is wat almoi Mortike a Heman an neucse neom u natimarid, mika is eti atidai vai yin aien, um eti apan an nahaijin nefalaig, is ohua an nedemda vai Mortike aien.

¹⁰ Ja is ika a Heman yi eropse inliinmopon aien: is wat apan an neom o un aien, is abrai atimi aien par ahlaig vai ilpu atimi ehpan iran, im lep Sires ehgan.

¹¹ Is asuptecnaig ehele ra a Heman vai nikni itai esjilid o un, im nahinag irai ilpu hal o un, im lep va niji itai asega is ati yin a natimarid mika yi esjilid iran aien; im lep inig, nikavaig, is ati yin a natimarid mika yi esjilid aien irai ilpu atimi alupas asega, im ilpu aheca asega u natimarid.

¹² Is lep ika aien, Maiya, is asaig a Ester natimarid takata mika ki apan ainyak ache im natimarid u nitai caig is ago aien; et mun lep imiacaij nyak im natimarid aien, mika ecru lep apan ehelen aijumrau imraig.

¹³ Ja et tup takitai nitai iji igki asega, ek wat almoi Mortike ainyak nup u Juta nateuc vaig an neucse neom u natimarid.

¹⁴ Eris ika ehelen a Sires ehgan im ilpu atimi ehpan iran asega, Namu asaig aiek mika eri ago nauincai alcinwa atimi iran, nijinies iran kubit inyi fifte; etu wit lahlah an nuhialeg, namu tas aiek ehele natimarid, mika eri alcinwai Mortike iran: ja par apan u nitai caig aiek im lep natimarid an liinmopom imiacitak. Is upene irai Heman nitai inigki; is asaig aien mika eri ago nauincai alcinwa atimi iran.