Ester 4 - Intas Etipup

Nuarin tas alupas 4.

1 Nehtigtaig alupas u Mortike im nup u Juta. 4 Et wat ato a Ester vaig, et abraig pan hal ehele Mortike aien par ahodaig vaig, et ehvaig nohuun taigtaig ura aien, um ahugni Ester mika yi ugyi natimarid vaig. 10 Et imtitaig a Ester, ja et ated yin a Mortike. 15 Et ati nadiat atwakam a Ester, um ika yi ugyi natimarid vaig aien.

¹ IS wat ato a Mortike va niji itai asega eris ago, is ahpati napelumai o un a Mortike, um aso yin irai apelumai uucai, um ati nohpa iran, um alau ijo, um atga an maliyum, um ahlaig ijinies, um aunyauwaig;

² is yetpan ubutpotet u neucse neom u natimarid aien: is idim itap vai natimi inig eris aso yin ira apelumai uucai par atga an neucse neom u natimarid.

³ Eris ehtigtaig alupas a nup u Juta irai uari pece asega, is apan iran intas alep u natimarid im nitai inig is asaig aien; eris lep atwakam ara, um taig, um aunyauwaig; eris asjeuc ira apelumai uucai natimi is ahinag, um ati nohpa ira ra.

⁴ Eris apan a ilpu atahig u Ester im ilpu aheca o un, um imiabrai yin. Is ohocred alupas a natimarid takata, um alupai ra napelumai mika eri aso Mortike iran ara, um atipagki ehelen apelumai uucai o un, ja is eti leh aien.

⁵ Is ahlaig a Ester vai Hetak natimi is ethi irai ilpu aheca esjilid u natimarid, aien eris ati yiu mika yi aminjinai yin aien, um alupai yin intas alep imi Mortike, mika yi asuptecnaig nitai inig eris ago, im nohuun nitai iyehki.

⁶ Is apan a Hetak ehele Mortike an nefalaig au maliyum, ubutpotet u neucse neom u natimarid.

⁷ Is asuptecnaig ehelen a Mortike vai itai asega is yetpam vai yin, im lep vai mune iji ehki is ika a Heman yi ikni aien an nuarin ikni mune iran u natimarid, nimtai nup u Juta, va etpu auahas ra aien.

⁸ Is lep alupai yin nitaasviitai is ethi eris aged iran is idivaig an nitaasviitai uhup iyehki, intas alep marom, eris asaig Susan par auahas ra, mika yi ehvaig ehele Ester aien, um asuptecnaig vaig ehelen, um asaig ehelen mika yi apan ehele natimarid, um ugyi yin, um arohwai yin vai ilpu etwan.

⁹ Is apan a Hetak um asuptecnaig intas o Mortike ehele Ester.

¹⁰ Is lep tas a Ester ehele Hetak, um asaig intas alep imi Mortike;

¹¹ nikavaig, era ato a ilpu aheca asega u natimarid, im lep natimi irai uari pece u natimarid, mika el et apan ehele natimarid an nokoro juju an nimnim tah natimi, tah natamaig ka intakata, jam eti ahlaig vai yin a natimarid, et eteuc intas alep et ethi o un mika yi mas aien; inyi umoh aien ache et ada vai yin niseuc colt o un aien: is idim ahlaig vai nyak a natimarid mika ki apan ehelen ainyak, ja et mun ti pan itac nadiat et dirte inpig.

¹² Eris asuptecnaig intas o Ester ara ehele Mortike.

¹³ Is ika a Mortike eri asuptecnaig ehele Ester ara, um ika, Namu jim aktaktai aiek mika an umoh aiek ache irai up u Juta asega va namen unyum an nimnim u natimarid.

¹⁴ El et eucsup aiek an nopan inig, etpu imiatamaig nup u Juta intak atimi, um imicoho ra; ja uhpu auahas euc im lep ilpu atimi ehpan iram: et idivaig eris ati euc mika an atimarid takata aiek va nauritai inigki.

¹⁵ Is ika a Ester eri asuptecnaig ehele Mortike ara, um ika,

¹⁶ Namu apan aiek um ehras asjapicnaig nup u Juta asega era amen Susan ara, um atwakam vai nyak, um jim hag um jim umwig ira adiat inyi eseij, an nadiat im lep an nepig: ekpu lep atwakam ainyak im ilpu atahig unyak; ja ekpu apan ainyak anliin neom ehele natimarid, et idim itap: el ek mas ainyak, ekpu mas ainyak.

¹⁷ Is idim uco, is apan a Mortike um ago niji itai asega is asaig ehelen a Ester.