Ester 3 - Intas Etipup

Nuarin tas alupas 3.

1 Et imiaridjai Heman a natimarid, ja et eti ecen vai yin a Mortike, et ika a Heman yi leh neruvaig o un irai up u Juta asega. 7 Et edaig niji itai asjaaicnaig aien. 8 Et wat atijai itai irai up u Juta aien, et leh intas alep irai natimarid aien mika yi atgei ra asega.

¹ IS wat ti pan itac nitai iji igki, is imiatidai Heman inhalav atamaig u Hametada, mapoi Ecac, a Ahasuirus natimarid, um ika yi esjilid aien, um ati nitai ateuc o un ijinies irai itai ateuc u ilpu atimi alupas o un.

² Eris atpuse vai Heman, um imiimtacimtac yin, a ilpu aheca asega u natimarid, eris amen an neucse neom u natimarid ara: is idim uco intas alep u natimarid vai yin. Ja is eti atpuse vai yin a Mortike, um eti ago nedo ecen vai yin.

³ Eris tas ehele Mortike a ilpu aheca u natimarid eris amen an neucse neom u natimarid ara, um ika, Na a uri aiek par imipalea intas alep u natimarid?

⁴ Eris tas ehelen ara irai iji adiat, ja is eti aktaktai intas ura aien, ja eris par imiabrai Heman ara, par ato, kit is upene nedo o Mortike, ka oʼo: is idim asuptecnaig ehele ra aien, mika is up u Juta aien.

⁵ Is wat almoi a Heman mika is eti atpuse a Mortike, um eti ago nedo ecen vai yin, is edemda alupas a Heman.

⁶ Is amcel vaig aien par arop irai Mortike ache; eris asuptecnaig ehelen inpece u Mortike ara: va nitai inig is merit a Heman par auahas nup u Juta asega eris amen ara an nelcau asega u Ahasuirus, ilpu etwai Mortike marom.

⁷ Is atimarid irai mesese is eleven a Ahasuirus, is wat yetpam inmesese twelvd, an mohoc uhup, inmohoc Naisan, eris ikni itai asjaaicnaig an nuhup u Heman irai iji adiat, im niji mohoc um yetpan, mika yi auahas an nadiat et ethi ache nup uran pece asega u Mortike; is etjo nitai asjaaicnaig va nadiat fortiind an mohoc twelfd, inmohoc Etar.

⁸ Is tas a Heman ehele Ahasuirus natimarid, um ika, Era amen terimterim a nup urau pece et ethi, um amen jipe ehele atimi irai uari pece asega an nelcau unyum; et eche intas alep ura irai tas alep u atimi asega; era eti apos intas alep u natimarid ara: et eti upene vai natimarid mika eri umumoh ara.

⁹ El et upene irai natimarid, uhmu aged nitaasviitai mika eri auahas ra: ekpu ikni nuari silver inyi ten dausant (10,000) ainyak irai ikma atimi aminjinai itai, va erupu ikni ara an nuarin ikni mune iran u natimarid.

¹⁰ Is atipagki rig an nikman a natimarid, um alupai Heman inhal u Hametada, mapoi Ecac, natimi tak atimi irai up u Juta.

¹¹ Is ika a natimarid ehele Heman, Et unyum silver iji ehki, im lep natimi iji ehki, mika an ago vai ra aiek nitai inig et upene iram.

¹² Eris ahlaig vai ilpu atimi aged itaasviitai u natimarid an mohoc uhup au nadiat dirtiind; eris aged intas, is idivaig is asaig a Heman, ehele ilpu atimi is ikni ra a natimarid, im ilpu atimi aminjinaig irai uari pece asega, im ilpu atimi alupas u atimi asega irai uari pece asega, is idivaig naged itai vaig iran, ehele atimi asega is idivaig intas ura; eris aged intas an nidai Ahasuirus natimarid, um atapnes ipjin irai rig u natimarid.

¹³ Eris imiapan nitaasviitai iji ekki irai atimi apos itaasviitai, irai uari pece asega u natimarid, mika eri auahas, um atgei, um auud nup u Juta asega, ilpu takuras im ilpu fatimi, ilpu hadi im ilpu takata, an nadiat is ethi ache, an nadiat dirtiind an mohoc twelfd, inmohoc Etar, im lep inig, eri lucsei inpadiaig ura nimtan.

¹⁴ Eris aged is idivaig intas an nitaasviitai uhup iyehki, mika yi tas alep irai urai pece asega, um apaahni irai atimi asega mika eri amatata vai nadiat iyehki.

¹⁵ Eris atga ura natimi apos itaasviitai; is asaig a natimarid mika eri auroauro ara; eris asaig intas alep an nimnin atimi Susan. Erus ateucse a natimarid im Heman par umwig; ja is ehioehio inliinmopoi nup u Susan.