Ester 2 - Intas Etipup

Nuarin tas alupas 2.

1 Er ika eri ehtai natimarid takata et ethi irai ilpu atahig esjilid. 5 Et aminjinaig Ester a Mortike. 8 Et ika a Hice yi uhup ira ra asega a Ester. 12 Nedo ura par yiri ra, im lep par apan ehele natimarid. 15 Et upene irai natimarid a Ester, et idim ati yin aien mika yi atimarid takata. 21 Et wat asuptecnaig intas alwai a Mortike, era aged an nitaasviitai u natimarid ara.

¹ IS wat ti pan itac nitai iji igki, wat eropse inliinmopoi Ahasuirus, is imiehva Vastai aien im nedo o un, im intas alep vai yin.

² Eris ika a ilpu aheca u natimarid eris auanaheca vai yin ara, Uhmu ahilek vai ilpu atahig eklim upene imi natimarid:

³ etmu aniv atimi a natimarid irai uari pece asega an nelcau o un, mika eri asjapicnaig ilpu atahig eklim upene asega an maliyum Susan, et eteuc nimnim atimi iran, anliin neom u ilpu takata; va etpu aminjinai ra a Hice yunuka u natimarid, im natimi aminjinaig ilpu takata; uhmu lep alupai ra itai par ago adicinadicin ra iran:

⁴ etmu atimarid takata um isjeupigmoig Vastai a natahig inig et aiyu inliinmopoi natimarid vai yin. Is upene nitai inigki irai natimarid; is lep ago aien.

⁵ Is amen an maliyum Susan, is eteuc nimnim atimi iran, a nup u Juta is ethi, nidan Mortike, inhalav atamaig u Jeer, inhalav atamaig u Simeai, inhalav atamaig u Kis, mapoi Benjamin:

⁶ Eris atoraliak yin Jerusalem ehele atimi eris imiapan ra is tup ethi ache irai Jehoiakin natimarid an pece Juta, aien aigki is atipagki yin a Nebukatnesar natimarid Babelon,

⁷ Is aminjinaig Hatassa aien, tak idan Ester, inhalav atahig u matan: is ti etman im risin, is eklim upene nohui natahig iyehki im lep nes-ganimtan; is leh yin a Mortike an nopan iyehki erus emesmas a etman im risin, mika yi halav atahig o un aien.

⁸ Eris wat atahaijeg intas alep u natimarid im nitai inig is asaig aien, wat asjapicnaig ilpu atahig is ahinag an nimnim atimi Susan, um ikni ra ehele Hice mika yi aminjinai ra aien, eris lep imiapan Ester an nimnim atimi, va etpu aminjinai yin a Hice, natimi aminjinaig ilpu takata aien.

⁹ Is upene iran a natahig iyehki; is aiheuc vai yin aien, um auroauro um alupai yin itai par ago adicinadicin yin iran, im niji itai eris ahtai imi yin, im ilpu atahig is seven an neom u natimarid is upene par alupai yin ra: is um ati yin aien im ilpu atahig o un an nuarin neom esjilid an neom u ilpu takata.

¹⁰ Is eti asuptecnaig ilpu etwan a Ester im ilpu atimi ehpan iran: is acai ji yin a Mortike mika yi jim asuptecnaig vaig aien.

¹¹ Is edo jipe a Mortike irai iji adiat an nahaiji nokoro u neom u ilpu takata, mika yi ato namen u Ester aien im nitai inig eri ago vai yin.

¹² Is wat yetpam nopan iyehki eri apan ehele Ahasuirus natimarid a ilpu atahig asega, is wat ti pan itac namen ura irai mohoc is twelv, is idivaig nedo irai ilpu takata, (eris idim ago adicinadicin ra irai mohoc iji igki; irai mohoc is siks irai narakei mir, im inmohoc is siks irai itai auanipin upene, im lep hal itai par ago upene ilpu takata;)

¹³ ja eris par apan ehele natimarid a ilpu atahig asega: is lucsei niji itai asega is merit vaig tah, is wat ahes anliin neom u ilpu takata aien par apan anliin neom u natimarid.

¹⁴ Is apan aien an jupura, um adumoij an nuhialeg anliin neom sekunt u ilpu takata, is um aminjinai yin a Seascas naheca esjilid u natimarid, is aminjinaig ilpu takata aien: el is eti aiyu inliinmopoi natimarid vai yin um aniv yin, el is eti lep apan aien ehele natimarid.

¹⁵ Is wat yetpam nopan vai Ester, inhalav atahig u Abiheel, matai Mortike, aien is leh yin mika yi halav atahig o un aien, mika yi apan aien ehele natimarid, is eti ugyi tah nitai aien, nitai inig ache is ati a Hice, naheca esjilid u natimarid, im natimi aminjinaig ilpu takata. Is upene vai Ester inliinmopoi atimi asega eris alum yin ara.

¹⁶ Eris imiapan Ester ehele Ahasuirus natimarid anliin neom va natimi alupas o un, an mohoc tend, inmohoc Tibed marom: is atimarid aien irai mesese is siks ja par leh yin.

¹⁷ Is esjilid naiyu u inliinmopoi natimarid vai Ester, irai naiyu u inliinmopon vai ilpu takata asega; is esjilid naiheuc o un im nedo upene o un vai yin irai naiheuc o un vai ilpu atahig asega; va nitai inigki is atijai an nidjinin korona va natimi alupas, um ati yin mika yi atimarid takata um isjeupigmoig Vastai.

¹⁸ Is par auanetha alupas a natimarid vai ilpu atimi alupas asega o un, im ilpu aheca o un, netha u Ester marom; is lep asa natumop irai uari pece aien, um tup ahtai itai, is idivaig is upene vai natimarid.

¹⁹ Eris wat lep asjapicnaig a ilpu atahig, is ateuc a Mortike an neucse neom u natimarid.

²⁰ Is pam eti fi asuptecnaig ilpu atimi ehpan iran im inpece o un a Ester; is idivaig is asaig ehelen a Mortike: is idim imiaiji intas o Mortike a Ester is idivaig an nopan iyehki is wat aminjinai yin aien.

²¹ An nopan iyehki is wat ateuc a Mortike au neucse neom u natimarid, erus edemda vai Ahasuirus natimarid, um merit par auahas yin, natimi is ero irai ilpu aheca u natimarid, nan, Bicdan im Tires, erus aminjinaig neusce neom arau.

²² Is ato nitai iyehki a Mortike, is um asuptecnaig ehele Ester natimarid takata aien; is aniv Mortike ehele natimarid aien um asuptecnaig intas o un.

²³ Eris wat ahilek nedo iyehki, eris ato mika is idim inveijec; va nitai inigki eris alcinwarau au nauincai: eris aged intas vaig an nitaasviitai aged intas iran an nuhup u natimarid.