Esra 8 - Intas Etipup

Nuarin tas alupas 8.

1 Ilpu etwai Esra iji ig era ahes Babelon a, a um, adumoij pam Jerusalem. 15 Et abraig pan hal enele Itto a Esra um ahilek ilpu aheca vai neom itap. 21 Et apos nadiat atwakam aien. 24 Et ikni colt im silver im inpadiaig imi ilpu atimi ahlap aien par aminjinaig. 31 Era ahes Aheva ara um yetpam, Jerusalem. 33 Era asjaaicnaig colt im silver ara anliin nimnim itap. 36 Era alupai ilpu atimi alupas intas alep iyehki ara.

¹ ILPU atimi esjilid ji igki, im lep nitaasviitai vai ra nigki; eris ahes Babelon ara um ahced nyak, an nopan iyehki is atimarid a Artakserkses; nan,

² Cersom, mapoi Finehas; im Taniel, mapoi Idamar; im Hattus, mapoi Tevit.

³ Im ilpu mapoi Sekanaia; im Sekaraia, mapoi Feros; eris lep esvi ehelen ilpu atamaig is wun huntret im fifte (150), eris aged nidara.

⁴ Im Elihoyene inhal u Serahaia, mapoi Pehad-moab, im ilpu atamaig is tu huntret (200) ehelen.

⁵ Im inhal u Jahesiel, mapoi Sekanaia, im ilpu atamaig is dri huntret (300) ehelen.

⁶ Im Ibet inhal u Jonadan, mapoi Etin, im ilpu atamaig is fifte (50) ehelen.

⁷ Im Jeseaia inhal u Adalaia, mapoi Ham, im ilpu atamaig is sevente (70) ehelen.

⁸ Im Sebataia inhal u Maikel, mapoi Sefataia, im ilpu atamaig is eete (80) ehelen.

⁹ Im Obataia inhal u Jehaiel, mapoi Joab, im ilpu atamaig is tu huntret im eetiin (218) ehelen.

¹⁰ Im inhal u Josifaia, mapoi Selomid, im ilpu atamaig is wun huntret im sikste (160) ehelen.

¹¹ Im Sekaraia inhal u Bebeai, mapoi Bebeai, im ilpu atamaig is twente eet (28) ehelen.

¹² Im Johenan inhal u Hakkatan, mapoi Ascat, im ilpu atamaig is wun huntret im ten (110) ehelen.

¹³ Im ehtaij mapoi Atonaikam apitac, nidai ehtaij raigki; nan, Elifelet, im Jiaiel, im Semeaia, im ilpu atamaig is sikste (60) ehele ehtaij.

¹⁴ Im Udeai im Sabbut, ohwat mapoi Bicveai, im ilpu atamaig is sevente (70) ehele rau.

¹⁵ Kis asjapicnai ra ainyak u nofowai et yah pan Aheva; ecris atumop eahki aijama iraili eom atga ira adiat is eseij: kis ahilek ainyak ira atimi, im lep ilpu atimi ahlap, jam eti ecet tah irai ilpu mapoi Livai eahki.

¹⁶ Kis lep imiapam ehelek ainyak Eliiser, im Ariel, im Semeaia, ira Elnedan, im Jerib, im Elnedan, im Nedan, im Sekaraia, im Misullam, ilpu atimi alupas; im lep Joiarib, im Elnedan, ohwat atimi arapakau.

¹⁷ Kis abraig pan ra ainyak ehele Itto natimi alupas an nuarin pece Kasifaia; kis lep asaig ehele ra ainyak intas inig erupu asaig ehele Itto ara, im ilpu etwan ilpu aheca u ilpu mapoi Livai, an nuarin pece Kasifaia, mika eri imiapam ehelema ilpu aheca uri neom u Atua uja.

¹⁸ Eris imiapam ehelema ara natimi arapakau is ethi, irai ilpu mapoi Malai, inhal u Livai, inhal u Isreel; va naiheuc u Atua vai cama; im Serebaia, im lep ilpu hal o un im ilpu etwan, eris eetiin (18) ara;

¹⁹ im Hasabaia, im Jeseaia ehelen irai ilpu mapoi Mererai, im ilpu etwan im ilpu hal ura, eris twente (20) ara;

²⁰ im lep ilpu aheca u ilpu mapoi Livai is tu huntret im twente (220), irai ilpu aheca u ilpu mapoi Livai iji ehki is ikni ra a Tevit im ilpu atimi alupas par ago nauritai u ilpu mapoi Livai; eris asaig nidara asega.

²¹ Kis asaig natwakam eahki ainyak u nofowai Aheva, va ecrupu lucsei nohocred aijama an nuhup u Atua unyima, par ahilek nefalaig upene imi cama, im ilpu hal unyima, im niji itai asega unyima.

²² Kis ehcamai ainyak nugyi vaig ilpu eucsupo im ilpu atimi atga irai hors ehele natimarid, par atau imi cama vai ilpu atimi tak atimi irama an nefalaig: vai intas unyima ehele natimarid, nikavaig, Et amen nikmai Atua ira ra asega era ahilek yin ara; ja et amen nedemda im intavaitap o un ira ra asega era udei yin ara.

²³ Ecris atwakam aijama, um ugyi Atua va nitai inigki: is lep adai intas unyima aien.

²⁴ Kis ikni natimi is twelv ainyak irai ilpu atimi ahlap; nan, Serebaia, im Hasabaia, im ilpu etwarau is ten ehele rau,

²⁵ um asjaaicnaig imi ra silver im colt, im nipjiitai, niji itai tup ahtai marom vai neom u Atua uja, eris ahtai a natimarid, im ilpu atimi tastas alep, im ilpu atimi alupas, im nup Isreel asega eahki:

²⁶ kis asjaaicnaig ainyak, um ikni ira ikmara talent irai silver is siks huntret im fifte (650), im niji ipjiitai silver is talent is wun huntret (100), im niji ipjiitai colt is talent is wun huntret (100);

²⁷ im nelcau colt is twente, is wun dausant (1,000) terik nopoc iran; im nelcau bras naunau, is esjilid um idivaig colt.

²⁸ Kis ika ehele ra ainyak. Eka itap vai Ihova aijaua; et lep itap nipjiitai iji igki; nitai tup ahtai irai silver im colt iji igki vai Ihova Atua u ilpu retpomia.

²⁹ Akumu almaijidjid aijaua,um aminjinaig, um imihum pan an nopan iyehki akupu asjaaicnaig iran aijaua Jerusalem, an nuhup u ilpu atimi ahlap esjilid im ilpu mapoi Livai, im ilpu atimi alupas u nup Isreel, iraili uari eom an neom u Ihova.

³⁰ Eris lucsei silver, im colt, im nipjiitai eris asjaaicnaig, a ilpu atimi ahlap im ilpu mapoi Livai, par imiapan Jerusalem vai neom u Atua uja.

³¹ Eris ahes u nofowai Aheva aijama, an nadiat twelfd an mohoc uhup, par apam Jerusalem: is amen irama nikmai Atua unyima, is lep imiatamaig cama aien va nikmai ilpu atimi tak atimi irama an nefalaig, im lep vai ra eris atpajiinai cama an nefalaig ara.

³² Ecris yetpam Jerusalem aijama, um amen eahki ira adiat is eseij.

³³ Eris asjaaicnaig silver im colt im nipjiitai an nadiat ford, anliin neom u Atua uja an nikmai Mere-mod inhal u Uraia natimi ahlap; is amen ehelen a Eliesar inhal u Finehas; erus lep amen ehele rau a Josabat inhal u Josua, im Noa-taia inhal u Binnuai, ohwat mapoi Livai;

³⁴ eris esvi um asjaaicnaig asega: eris lep aged nopoc iran asega an nadiat iyehki.

³⁵ Eris lep ikni niji itai ahlap atnamud imi Atua u nup Isreel a ilpu mapoi ra sji ehki, eris lucsei pan ra ja eris adumoij pam ara, nikavaig, kurimatau atamaig is twelv (12) vai nup Isreel asega, im siip atamaig is nainte siks (96), im inhakli siip is sevente seven (77), im nanin atamaig is twelv (12), nitai ahlap va nedo has: is itai ahlap atnamud vai Ihova nitai iji igki asega.

³⁶ Eris asaig intas o natimarid ara ehele ilpu atimi alupas atau imi natimarid, im ilpu atimi alupas an nahaijin nofowai igcapam: eris lep atau imi atimi ara, im neom u Atua.