Esra 6 - Intas Etipup

Nuarin tas alupas 6.

1 Et wat ecetai intas alep u Sairus a Taraius, et lep tas alep aien, um ika eri actaig neom itap. 13 Era wat atau ra a ilpu atimi tak atimi ira ra, erau wat lep tas ehele ra ahwat aprofeta, eris ago ehni neom itap ara. 16 Era apos nasjapicnaig va nativaig u neom itap ara. 19 im lep va nahtaregdei atimi.

¹ IS tas alep a Taraius, mika eri ahilek anliin neom ikni itaasviitai iran, eris ikni itai iran Babelon.

² Eris ecetai nitaasviitai Akmeda, anliin neom u natimarid an nahaijin pece u nup u Mitia, eris aged iran is uce:

³ Is asan tas alep vai neom u Atua Jerusalem a Sairus natimarid, an mesese uhup an natimarid vaig u Sairus, um ika, Uhmu ago neom iyehki, eris ahlap iran irai iji itai ahlap, uhmu lep ati aktit nededuon neom; inyi kubit inyi sikste nijinies iran, im kubit inyi sikste natgeig iran;

⁴ im natah irai hat alupas inyi eseij, im natah irai auicai upene inyi ethi: uhmu lep lucsei nimtan an nimnim u natimarid;

⁵ uhmu lep imiadumoij pan an neom ahlap Jerusalem, niji ipjiitai colt im niji ipjiitai silver an neom u Atua, is lucsei a Nebukatnesar anliin neom ahlap Jerusalem, um imiapam Babelon, um lep ikni anliin neom u Atua, um ikni irai iji uarin o un, athi um athi ehni.

⁶ Ak Tatneai, natimi alupas an nahaijin nofowai igcapan, im Sidar-bosneai, im ilpu etwamirau nup Afarsad, an nahaijin nofowai igcapan, etmu itac acen vai caua nitai inigki:

⁷ tup udei nauritai an neom u Atua inigki; erumu ago neom u Atua inigki an nuarin o un a natimi alupas u nup u Juta, im ilpu atimi tas alep u nup u Juta.

⁸ Im lep inig, ek lep asaig ehelemia ainyak nedo inig, akumu ago vai ilpu atimi alupas u nup u Juta aijaua va nago vaig neom inigki u Atua: nikavaig, uhmu alupai natimi iji igki nimtan irai padiaig u natimarid, nakwanaham an nahaijin nofowai igcapan marom, va eri jim atumop ara.

⁹ Uhmu lep alupai ra irai iji adiat nitai iji igki et upene imi ra, nikavaig, kurimatau atamaig, im siip atamaig, im inhakli siip, par itai ahlap atnamud vai Atua an nohatag, im hwiit, im inmohoanjap, im nide vaine, im narakei oliv, et idivaig eris asaig a ilpu atimi ahlap Jerusalem, um jim udei:

¹⁰ va erupu ahlap ara irai iji itai ahlap auanipin upene vai Atua au nohatag, um ago nalaigaheni, mika yi umoh a natimarid, im lep ilpu hal o un.

¹¹ Ek lep asaig ainyak mika, el et imipalea intas inigki tah, uhmu iknipagki nauicai an neom o un, um aduwi, um alcinwan iran: uhmu lep ika yi uarin ethan nohok iran nimnim o un va nitai inigki.

¹² Etmu lep auahas ilpu atimarid asega im lep natimi iji igki a Atua is ati aktit nidan eahki aien, erupu ago eche ka auahas neom inigki u Atua et eteuc Jerusalem. Ek mun asaig ainyak Taraius; uhmu auroauro um ago.

¹³ Eris auroauro um ago a Tatneai natimi alupas an nahaijin nofowai igcapan, im Sidar-bosneai, im ilpu etwarau, is idivaig intas o Taraius natimarid.

¹⁴ Eris ago neom a ilpu atimi alupas u nup u Juta, eris lep amen upene ara vai intas o Haceai naprofeta im Sekaraia inhal u Itto. Eris actaig neom ara, um ago ehni, is idivaig intas o Atua u nup Isreel, um lep idivaig intas is asaig a Sairus, im Taraius, im Artakserkses natimarid an pece Persia.

¹⁵ Eris ago ehni neom an nadiat dirt an mohoc Etar, an mesese sikstd an nopan u natimarid vaig u Taraius.

¹⁶ Eris aminjinaig nativaig neom u Atua an liinmopora imiacitak a nup Isreel, im ilpu atimi ahlap, im ilpu mapoi Livai, im lep ra eris lucsei pan ra,

¹⁷ um ahlap an nativaig neom u Atua irai kurimatau atamaig is wun huntret (100), im siip atamaig is tu huntret (200), im inhakli siip is for huntret (400); im lep nanin atamaig is twelv, par itai ahlap vai nup Isreel asega, is idivaig niji irai up Isreel.

¹⁸ Eris ahaig ilpu atimi ahlap ara, im ilpu mapoi Livai, um ikni ra, par ago nauritai vai Atua Jerusalem; is idivaig eris aged an nitaasviitai u Moses.

¹⁹ Eris aminjinaig nahtaregdei atimi ara sji ehki eris lucsei pan ra an nadiat fortiind an mohoc uhup.

²⁰ Eris ehrago upene a ilpu atimi ahlap im ilpu mapoi Livai, eris upene ara asega, um atgei niji itai ahlap va nahtaregdei atimi va atimi asega eris lucsei pan ra, im lep vai ilpu etwara ilpu atimi ahlap, im lep vai ra.

²¹ Eris caig a nup Isreel, eris lucsei pan ra ja eris lep adumoij ara, im ra asega eris atidji ra ara u nedo has u ilpu atimi apat an pece, par ahilek Ihova Atua u nup Isreel,

²² um apos nasjapicnaig va nareto is ti leven iran ira adiat is seven um imiacitak: is ati nimiacitak an liinmopora a Ihova, um ahidaig pam ehele ra inliinmopoi natimarid Asiria, par ago emda nikmara an nauritai an neom u Atua, Atua u nup Isreel marom.