Esra 4 - Intas Etipup

Nuarin tas alupas 4.

1 Era wat eti leh ilpu atimi tak atimi ira ra ara par atau an nactaig u neom itap, era edemda natimi iji ehki, um ika eri atapnes. 7 Nitaasviitai ura imi Artakserkses. 17 Intas alep u Artakserkses. 23 Eh atapnes nactaig u neom.

¹ ERIS wat atahaijeg a ilpu atimi tak atimi irai up u Juta im nup u Benjamin, mika eris ago neom ahlap vai Ihova Atua u nup Isreel ara sji ehki eris lucsei pan ra;

² eris apam ara ehele Serubabel ara, im lep ehele ilpu atimi alupas esjilid, um ika ehele ra, Intumu elirago neom akaija: ecra ahilek Atua unyimia aijama, et idivaig caua; ecris lep ahlap vai yin aijama an nopan umoh u Isarhaton natimarid Asiria, is imiapam cama igcaki aien um imihum pam an nopan inig.

³ Ja eris tas a Serubabel, im Josua, im ilpu atimi alupas esjilid irai up Isreel, um ika ehele ra, Akumu jim atau irama aijaua par ago neom imi Atua unyima; ja ecrupu idim ago neom imi Ihova Atua u nup Isreel aijama, et idivaig is asaig ehelema a Sairus natimarid an pece Persia.

⁴ Va nitai inigki eris ika a nup uran pece eri auahas inliinmopoi nup u Juta, eris lep imiedohalav ra ara an nauritai ura an neom,

⁵ um alupai ilpu atimi esjilid nimtan mika eri tas vai ra ara, um imiedohalav nauritai ura, irai iji adiat asega irai Sairus natimarid an pece Persia, um imihum pan an nopan iyehki is atimarid a Taraius natimarid an pece Persia.

⁶ Is wat atupun a Ahasuirus um atimarid, eris aged ara um atijai itai irai up u Juta im nup u Jerusalem.

⁷ Eris aged nitaasviitai imi Artakserkses natimarid an pece Persia a Bislam, im Midretad, im Tebiel, im ilpu etwara, an nopan umoh u Artakserkses; eris aged nitaasviitai iyehki ara um asuptecnaig an tas Siria.

⁸ Erus aged nitaasviitai a Rihum natimi tas alep im Simse natimi aged nitaasviitai imi Artakserkses natimarid, vai nup u Jerusalem is uce:

⁹ eris idim aged nitaasviitai a Rihum natimi tas alep, im Simse natimi aged nitaasviitai, im ilpu etwara; nikavaig,nup u Taina, im nup Afarsad, im nup u Tarpelai, im nup Afarsai, im nup Arkevai, im nup u Babelon, im nup u Susan, im nup u Tihevai, im nup Ilam,

¹⁰ im lep nup urai pece iji ehki is imiapam ra a Asnapper natimi alupas esjilid, um ikni ra irai iji maliyum Sameria, im lep ra asega an nahaijin nofowai igcapam, an nopan iyehki.

¹¹ Netwai nitaasviitai eris imiapan ehele Artakserkses natimarid nigki; Ak natimarid, ecra aiheuc vai euc aijama ilpu aheca unyum an nahaijin nofowai igcapam an nopan inig, nikavaig,

¹² Etmu ato a natimarid, nikavaig, era mun yetpam Jerusalem a nup u Juta iji ehki eris ahes ehelum ara um apam ehelema, era actaig inmaliyum iyehki ara eris imipalea iran um has acen, eris actaig ehni nathatahau iran ara, um ehtadgai iran.

¹³ Etmu ato a natimarid, nikavaig, el er actaig inmaliyum inigki, um lep actaig nathatahau iran, eri eti ahtai mune, im inpadiaig, um eti akwanaham imi natimarid, um tintin itai imi yin.

¹⁴ Eri alaama nitai caig an nimnim u natimarid, va nitai inigki is eti upene irama par almoi nihkin natimi u natimarid, ecris lep abraig t pan hal aijama par asuptecnaig a ehele natimarid;

¹⁵ va uhpu ahilek an nitaasviitai eris aged itai iran u ilpu retpom: napu idim ecetai aiek an nitaasviitai eris aged itai iran, um ato mika eris imipalea natimarid u ir nup uran maliyum inigki, um ago nedo has vai ilpu atimarid im niji uari pece, um lep atupun nedo imipalea natimarid iran itu acen: va nitai inigki eris auahas inmaliyum inigki.

¹⁶ Ecra asaig ehele natimarid aijama mika, el eh lep actaig inmaliyum inigki, um actaig nathatahau iran, napu eti lep atimarid aiek an nahaijin nofowai igcapam.

¹⁷ Eris imiapam intas o natimarid ehele Rihum natimi tas alep, im Simse natimi aged tas, im ilpu etwara Sameria, im lep ra an nahaijin nofowai igcapam, nikavaig, Ek aiheuc vai caua ainyak an napon inig, um ika,

¹⁸ Eris esvi upene an nuhup unyak nitaasviitai unyimia ehelek.

¹⁹ Kis tas alep ainyak mika eri ahilek an nitaasviitai, um ato mika eris atidai vai ilpu atimarid a nup an maliyum inigki itu acen, eris lep ago nedo imipalea im nedo ahnag iran.

²⁰ Eris lep amen Jerusalem a ilpu atimarid emda, um atimarid irai iji pece asega an nahaijin nofowai igcapan; eris lep alupai ra mune, im inpadiaig, um akwanaham imi ra.

²¹ Asaig ehele natimi iji ehki mika eri udei nauritai ura, um jim lep actaig inmaliyum inigki, um imihum pan an nopan iyehki ekpu lep tas alep vaig ainyak.

²² Aktaktai aijaua, um jim udei nitai inigki: va yi jim aridjai tah nitai has vai ilpu atimarid.

²³ Eris esvi netwai nitaasviitai u Artakserkses natimarid an nuhup u Rihum, im Simse natimi aged tas, im ilpu etwara, ja eris par auroauro ara um apam Jerusalem ehele nup u Juta, um acaiji ra irai ikmara emda um esjilid, mika eri jim lep auritai ara,

²⁴ Eris udei nauritai an neom u Atua ara Jerusalem. Eris udei um imihum pan inmesese sekunt is atimarid iran a Taraius natimarid an pece Persia.