Esra 3 - Intas Etipup

Nuarin tas alupas 3.

1 Era atijai natau ara. 4 Era ahlap irai iji itai ahlap ara. 7 Era auarimtai ilpu atimi auritai ara. 8 Era ikni niji ededuei neom itap ara irai imiacitak, im intaigtaig.

¹ IS wat yetpam inmohoc sevend, an namen u nup Isreel irai iji maliyum ura, eris asjapicnaig Jerusalem natimi asega.

² Is atidai a Josua inhal u Josatak, im ilpu etwan ilpu atimi ahlap, im Serubabel inhal u Sialtiel, im ilpu etwan, um actaig natau u Atua u nup Isreel, par ahlap iran irai iji itai ahlap atnamud, is idivaig eris aged au tas alep u Moses natimi u Atua.

³ Eris ati natau ara an nuarin o un; eris imtitaig ara va nup urai pece iji ehki: eris lep ahlap ara irai iji itai ahlap atnamud vai Ihova, niji itai ahlap atnamud irai iji uhialeg im injupura.

⁴ Eris lep aminjinaig nasjapicnaig irai iyum uriicai ara, is idivaig eris aged intas vaig, um ahlap irai iji itai ahlap atnamud irai iji adiat eris esvi, is idivaig nedo ura, um ago itai irai iji adiat;

⁵ ja par apitac niji itai ahlap atnamud, eris ahlap iran irai upyi het, im lep ira asjapicnaig itap asega vai Ihova, im lep niji itai ahlap vai Ihova eris ikni natimi vai inmerit ura.

⁶ Eris atupun ara an nadiat uhup an mohoc sevend, um ahlap vai Ihova irai iji itai ahlap atnamud. Ja eris eti fi actaig nededuon neom ahlap vai Ihova an nopan iyehki.

⁷ Eris lep ahtai mune ara imi ilpu atimi actaig neom im ilpu atimi ared cai; um alupai nup u Saiton, im nup u Tairus nitai caig, im nitai umnyi, im narakei oliv, nalopdaig nauicai sitar mika eri lucsei Lebanon ara, um aldakekehiaig, um imiapok pan an nafaiava Jopa, is idivaig intas o Sairus natimarid an pece Persia ehele ra.

⁸ An mesese sekunt an napam ura u neom u Atua Jerusalem, an mohoc sekunt, is atupun a Serubabel inhal u Sialtiel, im Josua inhal u Josatak, im nahre ilpu etwara ilpu atimi ahlap im ilpu mapoi Livai, im ra asega eris lucsei pan ra ja eris adumoij pam Jerusalem ara; um ikni ilpu mapoi Livai, is twente inmesese ira ra um eled, par aminjinaig nauritai an neom u Ihova.

⁹ Eris ehratidai a Josua im ilpu hal o un im ilpu etwan, im Katmiel im ilpu hal o un, im ilpu hal u Juta, par aminjinaig ilpu atimi auritai an neom u Atua: ilpu hal u Henatat, im ilpu hal ura im ilpu etwara ilpu mapoi Livai.

¹⁰ Eris wat ago nededuon neom ahlap u Ihova a ilpu atimi auritai, eris ikni ilpu atimi ahlap ara eris aso ra ira apelumai itap ara, um apos intoho, im ilpu mapoi Livai, ilpu mapoi Esaf eris apos simbal ara, par imiahpas Ihova, is idivaig nedo is asaig a Tevit natimarid u nup Isreel.

¹¹ Eris ehracesaces nohraiitai ara, um imiahpas, um naaurinig vai Ihova; va nedo upene o un, et amen naiheuc o un vai nup Isreel irai iji mesese. Eris lep ahlaig natimi asega an nohrara ijinies, um imiahpas Ihova, va nago vaig nededuon neom u Ihova.

¹² Ja eris wat ago nededuon neom an nuhup ura, eris taig ijinies a ilpu atimi ahlap is ahinag im ilpu mapoi Livai, im ilpu atimi alupas, eris efatimi ara, um ecetai neom uhup; ja eris ahlaig ijinies natimi is ahinag va nimiacitak ura:

¹³ is elika va atimi nato vaig nohrara imiacitak im nohrara taigtaig: is idim ijinies acen nohra atimi, eris lep ahgei nohrara itac acen.