Esra 1 - Intas Etipup

Nuarin tas alupas 1.

1 Intas alep u Sairus mika eri actaig neam itap. 5 Era ago itai natimi va nadumoij pam ura. 7 Et imiadumoij pam niji ipjiitai an neom itap a Sairus imi Sesbasar.

¹ AN mesese uhup irai Sairus natimarid an pece Persia, is ahugni lele Sairus natimarid an pece Persia a Ihova, par ehneijid intas o Ihova is asaig a Jeremaia, mika is imiapaahni intas o un aien an nelcau asega o un, um aged an nitaasviitai, um ika,

² Et ika a Sairus natimarid an pece Persia, Is alupai nyak niji pece asega an nobohtan a Ihova Atua an nohatag; is lep asaig ehelek aien mika ki ago neom imi yin ainyak an maliyum Jerusalem, an pece Juta.

³ Et amen ehelemia a di irai ilpu atimi o un asega? etmu amen ehelen a Atua o un, etmu lep apan Jerusalem aien, an pece Juta, um ago neom u Ihova Atua u nup Isreel, an maliyum Jerusalem, (et idim Atua aien.)

⁴ El et amen tah an nuarin amen o un, erumu atau imi yin a nup an nuarin pece iyehki irai silver, im colt, im inpadiaig, im niji itai eklim edo irai pece, im lep nitai tup ahtai uri neom u Atua et amen Jerusalem.

⁵ Eris atidai a ilpu atimi alupas esjilid u nup u Juta im nup u Benjamin, im ilpu atimi ahlap, im ilpu mapoi Livai, im lep ra asega is ahugni lelra a Atua, par apan um ago neom u Ihova an maliyum Jerusalem.

⁶ Eris atau emda ra ara asega eris amen ubutpotet ehele ra ara irai ipjiitai silver, im colt, im inpadiaig, im niji itai eklim edo irai pece, im niji itai esjilid, im lep niji itai asega eris tup ispara ahtai ara.

⁷ Is lep imiadumoij pam nipjiitai uri neom u Ihova a Sairus, is iknipagki Jerusalem a Nebukatnesar, um ikni anliin neom u ilpu atmas o un;

⁸ is idim lucsei nitai iji igki a Sairus natimarid an pece Persia irai ikmai Midretad natimi aminjinaig inpadiaig o un, um esvi ehele Sesbasar natimi alupas an pece Juta.

⁹ Numera iran nigki: nelcau colt is dirte (30), nelcau silver is wun dausant (1,000), im nauitoga is twente nain (29),

¹⁰ im nipjiitai colt is dirte (30), im nipjiitai silver is eti esjilid is for huntret im ten (410), im nipjiitai is eche is wun dausant (1,000).

¹¹ Is faiv dausant im for huntret (5,400) niji itai colt im silver iji ehki asega. Is iknipagki nitai iji igki asega Babelon a Sesbasar, um imiapam Jerusalem pan irai natimi iji ehki eris lucsei pam ra.