Esikiel 9 - Intas Etipup

Nuarin tas alupas 9.

1 Nahuumtidec nigki par ehvaig mika eri imiatamaig nahaiji atimi, 5 um, auahas nahaiji ra et eled. 8 Et ehka par ago eropse Atua vai ra.

¹ IS lep tas ijinies ehelek aien, um ika, Erumu apani ubutpotet ara sji igki era aru irai nup uran maliyum ara, erumu apos nij va atimi ura ara an nikmara, athi um athi ehni.

² Kis lep ecet ilpu atimi is siks ainyak eris ahes an nefalaig ara an neucse nathatahau itaho, an nahaijin maliyum inig et ahes narutu iran, um apam, eris apos nij va atimi ura ara an nikmara, athi um athi ehni; is lep eteuc natimi is ethi ira ra eris aso yin an napelumai yilyil, eris aijcei an nahaijin inhubej an wa apig u natimi aged itaasviitai: eris apan anliin nokoro ara, um aiji ubutpotet u natau bras.

³ Is aridjai natimi alupas u Atua u nup Isreel um ahes ijinies irai jerub iyehki is amen iran a Atua, um yetpan au neucse neom itap. Is lep ahlaig vai natimi inig a Ihova eris aso yin an napelumai yilyil, eris lep aijcei an nahaijin inhubej an wa apig u natimi aged itaasviitai;

⁴ is ika ehelen aien, Namu apan aiek um ahced efalaig an maliyum, Jerusalem marom, um ati nitai asjaaicnaig an nipjinimtai ilpu atimi iji ig era adijai ra ara um taigtaig va niji itai asega er amcel vaig er ago iran.

⁵ Is lep ika aien ehele ra sji ehki, kis ahgei yiu ainyak, Akumu apitac yin aijaua um ahced efalaig an maliyum, um atgei atimi: um jim imiaras tah, um jim aiheuc vaig tah.

⁶ Akumu atgei ehni ilpu fatimi aijaua, im ilpu takuras, im ilpu atahig, im ilpu halav haklin, im ilpu takata: jam jim apan ehelen tah natimi et amen iran nitai asjaaicnaig iyehki; um atupun an neom itap unyak. Eris atupun ara irai ilpu atimi alupas iji ig eris amen an nuhup u neom ara.

⁷ Is ika ehele ra aien, Akumu auahas nitap u neom aijaua, um ika yi ohua nohui ilpu atimi emesmas irai iji okoro iran an nuhup u neom itap: akumu apan aijaua. Eris apan ara um atgei atimi an maliyum.

⁸ Eris wat atgei ra ara, kis echim amen ainyak, kis atpuse ainyak an nobohtan, kis ahlaig ainyak, um ika, Awe, ak Natimarid Ihova! namu jim atgei ilpu ahri nup Isreel asega aiek, nau wit atladwi intavaitap unyum aiek irai nup u Jerusalem.

⁹ Is ika ehelek aien, Et esjilid acen nedo has u nup Isreel im nup u Juta, et lep ohua natgei atmas an pece, et lep ohua nedo acalacal an maliyum: era idim ika ara, Et mun udei nobohtan a Ihova, et eti alum caija a Ihova.

¹⁰ Intas unyak nigki, Ekpu eti aiheuc vai ra ainyak, um eti itai vai ra, ja ekpu aru nedo ura ira ra ainyak.

¹¹ Kis ecet natimi iyehki ainyak eris aso yin an napelumai yilyil eris lep aijcei inhubej an wa apig an nahaijin, is asuptecnaig aien, um ika, Ek mun ago ainyak et idivaig as asaig ehelek aiek.