Esikiel 8 - Intas Etipup

Nuarin tas alupas 8.

1 Et ahuumtidec a Esikiel Jerusalem. 5 Et ehvaig ehelen a Atua nalmun noporei, 7 im niji uari eom et amen iran niji almui itai, 13 im ilpu takata iji ig era imitaig Tam, us ara, 15 im ilpu atimi era alaigaheni ara um ehnaig pan nagesega. 18 Nedemda u Atua va nedo apat ura.

¹ AN mesese siksd, an mohoc siksd, an nadiat fifd an mohoc iyehki, kis wat ateuc ainyak an neom unyak, eris lep ateuc a ilpu atimi alupas an pece Juta an nuhup unyak, is yetpam ehelek eah-ki nikmai Natimarid Ihova.

² Kis easpan ainyak um ecetai nalmui atimi is idivaig incap: ahes an wauahid o un um ahlause an neduon, is idivaig incap; um ahes an wauahid o un um aridjai an nidjinin, is idivaig inlah, is idivaig nememina u nitai yag esjilid.

³ Is arahpan an nikman aien, um asjiraig numri nidjinik; is imiaridjai nyak a Nesgan an niblan nobohtan im nohatag, um imiapan nyak Jerusalem an nahuumtidec inig is ahes ehele Atua, u intapnes an neucse nathatahau igcapahai et ahecatoh an nuarin inig et ahes narutu iran; et amen eahki natmasimai inig et auahas inliinmopoi Atua.

⁴ Is idim ehcohos eahki natimi alupas u Atua u nup Isreel, is idivaig nahuumtidec iyehki kis ecetai ainyak an nuarin marara.

⁵ Is ika ehelek aien, Ak inhal u natimi, namu easpan aiek an nefalaig inig et ahes narutu iran. Kis easpan ainyak an nefalaig inig et ahes narutu iran, um ecetai natmasimai inig et auahas inliinmopoi Atua an neucse neom an nahaijin inig et ahes narutu iran, an neucse nathatahau u natau marom.

⁶ Is lep ika ehelek aien, Ak inhal u natimi, na almoi nitai iji ig aiek era ago ara, ka oʼo? nikavaig, niji itai er amcel vaig et alupas era ago igcaki a nup Isreel, mika ki apan itac acen va neom itap unyak ainyak? ja namu lep ahidai euc aiek, napu lep ecetai niji itai er amcel vaig aiek, jam esjilid irai ra sji igki.

⁷ Is imiapan nyak aien an neucse nathatahau an nokoro; kis easpan ainyak um ecetai inmun athatahau is ethi.

⁸ Is ika ehelek aien, Ak inhal u natimi, namu ahtaijhai yipin nathatahau aiek: kis ahtaijhai yipin nathatahau ainyak, um ecetai neucse neom is ethi.

⁹ Is ika ehelek aien, Namu apan anliin neom aiek, um almoi niji itai has er amcel vaig iji ig era ago igcaki ara.

¹⁰ Kis apan anliin neom ainyak um easpan, um ecetai nalmui niji obotpot itai atahas asega, im niji itai eklim edo irai pece has asega, niji atmasimai asega u nup Isreel marom, eris aged an yipin neom marehed mihtag.

¹¹ Eris aiji an nuhup u nitai iji igki natimi is sevente, ilpu atimi alupas u nup Isreel, is aiji juju an niblara a Jeasenaia inhal u Sefan, eris apos nipjiitai par atnamud nitai auanipin upene iran irai ikmara ara asega, athi um athi ehni; eris alaigaheni ara, is lep aridjai nadran cap an nitai auanipin upene.

¹² Is lep ika ehelek aien, Ak inhal u natimi, Na mun ecetai nitai iji ig aiek, ka oʼo? era ago an napat a ilpu atimi alupas u nup Isreel irai uari eom u almui atmasimai ura, athi um athi ehni? era, ika ara, Et eti alum caija a Ihova; et mun udei nobohtan a Ihova.

¹³ Is lep ika ehelek aien, Namu lep aketo aiek um ahidai euc, napu lep ecetai niji itai er amcel vaig aiek, jam esjiiid irai ra sji igki era ago ara.

¹⁴ Is imiapan nyak aien an tapnes u neucse nathatahau an nimnim u Ihova et ahecatoh an nuarin inig et ahes narutu iran; kis ecet ilpu takata eahki ainyak, eris ateuc ara um imitaig Tamus.

¹⁵ Is lep ika ehelek aien, Ak inhal u natimi, na mun ecetai nedo naico aiek, ka oʼo? namu aketo aiek um ahidai euc, napu ecetai niji itai er amcel vaig aiek, jam esjilid irai ra sji igki.

¹⁶ Is lep imiapan nyak aien juju an nokoro an neom u Ihova, kis idim ecet atimi is idivaig twente faiv ainyak, an neucse neom itap u Ihova, an niblan naiyu im natau, eris atidjira an neom u Ihova ara, um easpan an ridjai o un; eris lep alaigaheni vai nagesega ara an ridjai o un.

¹⁷ Is lep ika ehelek aien, Ak inhal u natimi, na mun ecetai nedo inigki aiek ka oʼo? Et idim eti takitai mika era ago nedo er amcel vaig iji igki a nup u Juta; et ohua natgei atmas ura an pece, era mun aketo ara um auahas inliinmopok, um ago nedo imiafakahcil esjilid.

¹⁸ Ekpu lep aru ira ra ainyak an nedemda alupas: ekpu eti aiheuc vai ra ainyak, um eti itai vai ra: eru wit ahlaig ijinies vai nyak ara, inki eti atahaijeg ra ainyak.