Esikiel 7 - Intas Etipup

Nuarin tas alupas 7.

1 Nauahas ehni u nup Isreel. 16 Era ehtigtaig um adumoij an liinmopora ara sji igki era ahapan ara. 20 Era auahas nimnim itap a ilpu atimi tak atimi ira ra va nedo er amcel vaig u nup Isreel. 23 Er asuptecnaig an nalmun natauhat namen has ura an pece iyehki eri imiapan ra iran.

¹ IS lep yetpam ehelek intas o Ihova, um ika,

² Ak inhal u natimi, et ika a Natimarid Ihova vai inpece Isreel; Et mun yetpam nehni, nehni marom u inpece asega marehed mihtag.

³ Ak nup Isreel, nehni u itai mun igki vai caua, ekpu imiham vai caua nedemda unyak ainyak, ekpu almaijidjid caua ainyak et idivaig nedo unyimia, um atijai iramia nedo asega unyimia er amcel vaig.

⁴ Ekpu eti aiheuc vai caua ainyak, um eti itai vai caua: ja ekpu atijai iramia nedo unyimia ainyak, etpu apol iramia nedo unyimia er amcel vaig: akupu ato aijaua mika ek Ihova ainyak.

⁵ Et ika a Natimarid Ihova; Akumu ato aijaua mika, et yetpam nohocred, nohocred esjilid marom.

⁶ Akumu ato aijaua mika, et yetpam nehni u itai, et yetpam nehni u itai marom: et aitgaig caua; et idim yetpam.

⁷ Et mun adiat iramia, ak nup urai pece: et mun yetpam nopan iyehki, et ubutpotet nadiat iyehki, nadiat u nohocred marom, et eti eteuc nedo imiacitak irai lola au.

⁸ Ekpu atladwi intavaitap unyak ainyak ehelemia tupko, ekpu lep ehneijid nedemda unyak ainyak ehelemia: ekpu lep almaijidjid caua ainyak et idivaig nedo unyimia, ekpu lep atijai iramia ainyak nedo asega unyimia er amcel vaig.

⁹ Ekpu eti aiheuc vai caua ainyak, um eti itai vai caua: ekpu aru iramia ainyak et idivaig nedo unyimia, etpu apol iramia nedo unyimia er amcel vaig; akupu ato aijaua mika, ainyak Ihova aigki et auud caua aien.

¹⁰ Akumu almoi nadiat aijaua, et idim yetpam: et ehcohos pam nuhialeg: era mun emda a ilpu atimi aru ira atimi, et mun esjilid nijinies u inliinmopora.

¹¹ Era mun atidai a ilpu atimi ago nedo emda par aru nedo o ilpu atimi auatatimi: erupu atiih a ilpu atimi auatatimi, im lep naga ura, im lep naktaktai alupas ura vaig: etpu eti lep eteuc neklim upene ura.

¹² Et mun yetpam nopan iyehki, et ubutpotet nadiat iyehki: etmu jim imiacitak a natimi auarimtai itai, etmu lep jim taigtaig a natimi ahtai itai: et idim yetpam nedemda ira aga asega ura.

¹³ El et eti fi mas a natimi ahtai uari obohtan, etpu eti adumoij pan aien an naurin obohtan is atcijaig aien, et idim tau nahuumtidec ira aga asega ura: etpu eti adumoij pan aien, inyi eti ago emda yin tah va nedo has o un.

¹⁴ Erumu ahlai intoho ara, um ika eri amatata asega; ja et eti eteuc tah par apan u nedoa: et idim amen nedemda unyak ira aga asega ura.

¹⁵ Et amen nedoa itac, et eteuc nemehe has im numlaig has anliin maliyum; etpu mas aien an nedoa et amen anliin pece aien; etpu lep auahas yin numlaig has im nemehe has et amen anliin maliyum aien.

¹⁶ Erumu idim aha ara sji igki era aha ara, ja erupu amen irai lola au ara, um idivaig niji alaupa irai iskanse, erupu ehtigtaig ara asega va nedo has ura, athi um athi ehni.

¹⁷ Etpu auatialidi nikma atimi asega, etpu arici nijin neduei atimi asega um idivan wai.

¹⁸ Erupu aso ra ara ira apelumai uucai, etpu adahpoi ra nimtitaig ura; etpu ehcamai nesganimtara ara asega, erupu ehpei numri nidjinira ara asega.

¹⁹ Erupu erekhaig pok ijo silver ura ara, etpu idivaig nohok colt ura: etpu elika vai silver ura im colt ura par imiatamai ra an nadiat u intavaitap u Ihova: erupu eti aua-nimtan nitai caig iran ara, um eti geije vaig: et idim itai epihtau vai ra nedo acalacal ura.

²⁰ Et ijinies inliinmopora ara va neom ekliin upene; era ikni iran niji atmasimai ura ara er amcel vaig; era mun ago nedo has esjilid ura ara eahki: va nitai inigki ek ika ainyak, uhpu auahas nitap o un vai ra.

²¹ Ekpu atcijaig ainyak imi nup urai taka pece mika eri atoraliak itai iran, im lep imi ilpu atimi auatatimi an nobohtan mika eri tup lucsei itai iran; erupu auahas nitap u neom itap ara.

²² Ekpu atidjik ira ra ainyak, erupu auahas nitap u nuarin adenaig unyak ara; erupu apam anliin neom itap unyak a ilpu atimi atoraliak itai, um auahas nitap o un.

²³ Akumu ago natauhat aijaua: et ohua natgei atmas an pece, et ohua nedo atoraliak an maliyum.

²⁴ Ekpu ika ainyak eri apam a nup urai iji pece, era auatatimi ara, erupu ohuun niji eom ura ara: ekpu lep ika ainyak yi tiih intas ijinies u ilpu atimi emda; uhpu lep auahas niji uarin itap ura.

²⁵ Et yetpam nehni u namen ura; erupu ahilek nigpa ara, ja etpu idim ti.

²⁶ Etpu yetpam niji itai ohocred um cti omot, um achaijinaig jipe niji tas eri imtitaig vaig; erupu ahilek intas ahuumtidec ara ehele ilpu profeta; ja inyi eti amen intas alep ehele ilpu atimi ahlap, im intas arapakau ehele ilpu atimi alupas.

²⁷ Etpu taigtaig a natimarid ura, etpu aso yin a natimi alupas ura an napelumai uucai, etpu auatialidi nikmai nup urai pece ura: ekpu ago neruvaig ira ra ainyak et idivaig nedo ura, ekpu almaijidjid ra ainyak et idivaig nedo has ura; erupu lep ato ara mika ek Ihova ainyak.