Esikiel 6 - Intas Etipup

Nuarin tas alupas 6.

1 Neruvaig irai nup Isreel va nedo apat ura. 8 Uhpu asan tas acis yi alwai nahrira. 11 Er ahugni ilpu atim upene mika eri ehtigtaig va nohocred ura.

¹ IS yetpam ehelek intas o Ihova, um ika,

² Ak inhal u natimi, namu iaspan aiek irai iji au an pece Isreel, um asuptecnaig intas ohocred vai ra,

³ um ika, Akumu atahaijeg intas o Natimarid Ihova aijaua, ak niji au an pece Isreel; Et ika a Natimarid Ihova ehele niji au, im lep ehele niji edoon, im lep ehele niji ofowai, im lep ehele niji iskanse; Akumu ato aijaua mika, ekpu idim ati nedoa ehelemia ainyak, ekpu lep auahas niji uarin itap unyimia ainyak.

⁴ Etpu ucaucai niji atau unyimia, uhpu ahtagrei niji almui nagesega unyimia: ekpu ika ainyak eri emesmas a ilpu atimi unyimia eris ahcai ra an nuhup u niji atmasimai unyimia.

⁵ Ekpu ikni nohui ilpu atimi emesmas u nup Isreel ainyak an nuhup u niji atmasimai ura; ekpu imiterimterim niji eduomia ainyak um arehed irai iji atau unyimia.

⁶ Uhpu auahas niji maliyum irai uarin asega iji ig eka amen iran aijaua, etpu lep umaruma niji uarin itap mika uhpu auahas um ucaucai niji atau unyimia, mika uhpu ahtagrei um atiih niji atmasimai unyimia, uhpu lep attai niji almui nagesega unyimia, uhpu lep iknipagki niji auritai unyimia.

⁷ Erupu emesmas an nuhup unyimia a ilpu atimi iji ig eris ahcai ra, akupu lep ato aijaua mika, ek Ihova ainyak.

⁸ Ja ekpu udei nahrimia ainyak, nikavaig, uhpu imiatamaig hal caua va nedoa ehele nup urai iji tak elcau, uhu wit terimterim iramia irai iji pece.

⁹ Erupu imiehva nyak ara sji igki iramia, uhpu imiaha ra ehele nup urai pece iji ig uhpu lucsei pan ra irai pece ura, vaig inig nikavaig, ek mun ohocred ainyak vai inliinmopora ahilek ingeijid, is lep adumoij pan vai nyak, im lep vai nesganimtara iji ig et apitac niji atmasimai ura: erupu amcel vai ra ara vai nedo has iji ig eris mun ago ara irai iji itai asega ura er amcel vaig.

¹⁰ Erupu ato ara mika, ek mun eti tup tas ainyak Ihova, mika ekpu ati nohocred inigki vai ra ainyak.

¹¹ Et ika a Natimarid Ihova; Namu ahpoi jipe an nikmam aiek, um auwihi nobohtan an neduom, um ika, Kaiheuc vai ra, va niji itai has asega er amcel vaig u nup Isreel! erupu emesmas ara an nedoa, im lep an numlaig has, im lep an nemehe has.

¹² Etpu mas aien an nemehe has et itac acen aien; uhpu atgei yin an nedoa et ubutpotet aien; uhu wit aat iran etpu mas aien an numlaig has et amen an maliyum aien: ekpu ehneijid intavaitap unyak ainyak ehele ra.

¹³ Akupu ato aijaua mika, ek Ihova ainyak, eru wit asjeuc a ilpu atimi ura eris atgei ra ui atmasimai ura um arehed irai iji atau ura, irai iji edoon ijinies asega, im lep irai lola au asega, im lep ithai cai asega et eteuc naiyu iran, im lep ithai cai alupas asega, irai iji uarin marom eris ahlap an nitai auanipin upene imi ilpu atmas ura asega.

¹⁴ Ekpu adaigjai nikmak ainyak vai ra, um ika yi umaruma inpece ura, maiya, etpu umaruma um esjilid an namasacen alaig apan Tiblad, irai iji uarin amen iran ura asega: erupu lep ato ara mika ek Ihova ainyak.