Esikiel 5 - Intas Etipup

Nuarin tas alupas 5.

1 Er asuptecnaig um ika et idivaig nedo o naprofeta va numri nidjinin, 5 neruvaig irai nup u Jerusalem va nedo imipalea ura, 12 va numlaig has, im nedoa, im nimiterimterim ra.

¹ IM lep inig, ak inhal u natimi, namu leh nauitoga arig aiek, maiya, idim leh resor u natimi ehpei numri geiji atimi, um ehpei numri nidjinum im ingeijum: ja par leh nitai asjaaicnaig par asjaaicnaig, um ahaig numri nidjinum im ingeijum.

² Namu atnamud nuarin dirt aiek juju an malivum, etu wit ti pan itac niji adiat ago nedoa iran: namu lep leh nuarin dirt aiek, um auud an nauitoga marehed mihtag: namu lep imiterimterim nuarin dirt aiek an nimtinjap; ekpu lep ahyausei nauitoga ainyak um apitac ra.

³ Namu lep leh nahaiji umri nidjinum im ingeijum et eti elpat aiek, um atpelaig au nilpun napelumai unyum.

⁴ Namu lep leh nahaijin inyi eche aiek, um ethaigjai an cap, um atnamud; etpu ahes iran incap um yetpan ehele nup Isreel asega.

⁵ Et ika a Natimarid Ihova; Nup u Jerusalem ji igki: kis ikni ra ainyak an niblai nup urai iji elcau, is lep arehed ira ra niji pece.

⁶ Eris udei nedo unyak ara, um imipalea intas alep unyak, eris ago nedo has ara um esjilid irai nup urai iji elcau, im lep nup urai iji pece marehed mihtag: eris esjum ara vai nedo unyak, um eti imiaiji intas alep unyak.

⁷ Va nitai inigki et ika a Natimarid Ihova; Vaig inig nikavaig, eka mun imipalea intas unyak aijaua, um esjilid irai nup urai pece iji ig era arehed iramia ara, um eti ago et idivaig nedo unyak, um eti imiaiji intas alep unyak, um eti ago et idivaig nedo u nup urai pece iji ig era arehed iramia ara;

⁸ va nitai inigki, et ika a Natimarid Ihova; Akumu ato aijaua mika, ek idim edemda vai caua ainyak, ekpu lep ago neruvaig iramia ainyak va nedo has unyimia an nuhup u nup urai iji pece.

⁹ Ekpu ago nedo inig ehelemia ainyak kis eti upyi ago ainyak, ekpu eti aketo ainyak um ago yi idivaig, va nedo asega unyimia er amcel vaig.

¹⁰ Va nitai inigki erupu caig ilpu halav atamaig ura a ilpu etmara ehelemia, erupu lep caig ilpu etmara a ilpu halav atamaig ura; ekpu ago neruvaig iramia ainyak, ekpu lep imiterimterim ilpu ahrimia asega ainyak irai iji pece asega marehed mihtag.

¹¹ Et ika a Natimarid Ihova; Ek idim umoh ainyak, et idim uco, vaig inig nikavaig, eka mun auahas nimnim itap unyak aijaua irai edo has esjilid asega unyimia, im nedo asega unyimia er amcel vaig, va nitai inigki ekpu idim udei caua ainyak; ekpu eti itai vai caua ainyak, um eti aiheuc vai caua.

¹² Erupu emesmas nahaijimia inyi dirt an nemehe has, uhpu lep auahas ra an numlaig has an nuhup unyimia: uhpu atgei nahaijimia inyi dirt an nedoa inig etpu arehed iramia; ekpu lep imiterimterim nahaijimia inyi dirt ainyak irai iji pece marehed mihtag, ekpu lep ati nedoa ainyak um ika yi apitac ra.

¹³ Inyi uce, ekpu ago ehni nedemda unyak ainyak, ekpu ika ainyak yi amen ira ra intavaitap unyak, ja etpu eropse inliinmopok ainyak: erupu ato ara mika, ek mun asaig intas inigki ainyak Ihova an nedemda unyak, eku wit ehneijid intavaitap unyak ainyak ehele ra.

¹⁴ Im lep inig, ekpu ika ainyak aki eti elpat aijaua, um ehcamai ehele nup urai pece asega iji ig era arehed iramia ara, an nuhup u atimi asega iji ig era ahced inpece unyimia ara.

¹⁵ Aki itai ehcamai vaig aijaua, im intas auyat, im intas esege, im nitai imiali, imi nup urai pece iji ig era arehed iramia ara, eku wit ago neruvaig iramia ainyak: an nedemda, im lep an tavaitap, im lep an nehniv esjilid. Ek mun asan tas inigki ainyak Ihova.

¹⁶ Eku wit abraig pan ehelemia ainyak, niji efana has va numlaig, mika yi auahas caua, maiya, ekpu abraig pan ra ainyak par auahas caua: ekpu ika ainyak yi alupas numlaig has imi caua, ekpu lep atipagki nesgan nitai asjiraig ohumia; ainyak:

¹⁷ ekpu abraig pam ehelemia ainyak numlaig has, im niji itai eklim edo irai pece has, erupu atoraliak ilpu halav unyimia ara; etpu ahced inpece unyimia nemehe has, im lep natgei atmas; ekpu lep ati nedoa ehelemia ainyak. Ek mun asan tas inigki ainyak Ihova.