Esikiel 4 - Intas Etipup

Nuarin tas alupas 4.

1 Er asuptecnaig napan ohocred ura, um ika et idivaig inmaliyum inig er arehed um aat iran an nedoa. 9 Er asuptecnaig numlaig has esjilid va nitai caig haklin um has an nedoa er ati van maliyum iyehki.

¹ IM lep inig, ak inhal u natimi, namu leh inhat apalapal aiek, um ati an nuhup unyum, um aged nalmui inmaliyum iran, Jerusalem marom:

² namu ati nedoa vaig aiek, um uctaig neom ijinies pan o un, um ago nedoon pan o un, um ati nuarin amen iran u ilpu eucsupo vaig, um ikni niji itai alcapdicraig nathatahau vaig marehed mihtag.

³ Im lep inig, namu leh aiek imtam nuarin aiurn apalapal, um aduwi mika yi athatahau aiurn an niblam im lep an niblai inmaliyum: um easpan iran, uhpu ati nedoa vaig, namu ati nedoa vaig aiek. Nitai asjaaicnaig vai nup Isreel nigki.

⁴ Namu lep asjeuc aiek an nahaijum inmauum, um atijai iram neruvaig nedo has u nup Isreel: napu apos neruvaig nedo has ura aiek irai adiat iji ig napu asjeuc iran aiek.

⁵ Ek mun idim atijai iram ainyak niji mesese an neruvaig nedo has ura, et idivaig nadiat iji ig er esvi, nikavaig, nadiat inyi dri huntret im nainte: napu lep apos neruvaig nedo has u nup Isreel aiek.

⁶ Etu wit ahni nadiat iji ehki, namu lep asjeuc aiek an nahaijum inmatam, napu lep apos neruvaig nedo has u nup u Juta aiek ira adiat inyi forte: ek mun anvai imtam ainyak nadiat inyi ethi vai inmesese, inyi ethi, athi um athi ehni.

⁷ Napu lep easpan aiek par ago nedoa vaig Jerusalem, uhpu atipagki napelumai an nikmam, napu lep asuptecnaig nohocred vaig aiek.

⁸ Napu ato aiek mika, ekpu idim arore euc ainyak, mika an jim ahidaig jipe euc aiek, um yetpan an nopan iyehki etpu ahni nadiat iji ehki au nedoa unyum van maliyum.

⁹ Namu lep lucsei imtam aiek hwiit, im barle, im pakine, im nariko, im rai, im sorcum, um iknise an nipjinitai inyi ethi ache, um ago nitai caig iran incam, napu caig iran aiek ira adiat inyi dri huntret im nainte, et idivaig nadiat iji ig napu asjeuc aiek an nahaijum.

¹⁰ Uhpu asjaaicnaig nitai caig unyum inig napu caig aiek, nikavaig, paunt inyi ethi vai nadiat inyi ethi: napu caig aiek irai iji opan hag.

¹¹ Uhpu asjaaicnaig inwai himam, napu umnyi aiek, nikavaig, paint inyi ethi im nahaijin paint vai nadiat inyi ethi: napu umnyi aiek irai iji opan umnyi.

¹² Namu caig nitai caig inigki aiek et idivaig eh caig nareto o barle, namu ago incap an nohok u atimi um ahen, an nuhup ura.

¹³ Is ika ehelek a Ihova, Et idim uco, erupu caig nitai caig has ura a nup Isreel ehele nup urai pece iji ig ekpu ahau ra ainyak par amen ehele ra.

¹⁴ Kis um ika ainyak, Awe, ak Natimarid Ihova! eh mun eti auahas nyak irai itai hegaig: ek mun eti caig ainyak nohu itai inig is tup mas, ka nohu itai inig eris mun ces yi oplecoplec, ahes an halav unyak um imihum pam an nopan inig; kis idim eti tup atimtim nohu itai er amcel vaig.

¹⁵ Is ika ehelek aien, Namu ato aiek mika, ek mun alupai euc ainyak nohok u kurimatau par asjapigmoig nohok u atimi, namu ago nitai caig unyum aiek iran.

¹⁶ Is lep ika ehelek aien, Ak inhal u natimi, namu ato aiek mika, ekpu atipagki nesgan itai asjiraig ohui atimi ainyak Jerusalem: erupu caig nitai caig haklin ara, um aktaktai alupas; erupu lep umnyi haklin inwai ara, etpu lep ehioehio inliinmopora vaig:

¹⁷ mika eri ehtele ra ara um ahvig inwai, um imiali jipe ra, um tiih pan an nedo has ura.