Esikiel 3 - Intas Etipup

Nuarin tas alupas 3.

1 Et caig a Esikiel nitaasviitai iyehki eris atpelaig. 4 Et tas upene ehelen a Atua. 15 Et asuptecnaig ehelen a Atua nedo inig mika yi asuptecnaig intas vaig. 22 Et atapnes nipjineucse naprofeta a Atua um lep asalgei.

¹ IS ika ehelek aien, Ak inhal u natimi, namu caig nitai inig aiek na ecetai aiek; namu caig nitaasviitai inigki aiek eris atpelaig, um apan um tas ehele nup Isreel.

² Kis ahag ainyak, is lep ika aien ki caig nitaasviitai iyehki ainyak eris atpelaig.

³ Is ika ehelek aien, Ak inhal u natimi, caig nitaasviitai inig eris atpelaig ek alupai euc ainyak, um geije iran. Kis lep caig ainyak; ja is par upene nipjineucsek vaig, is idivaig hune nitaasviitai iyehki.

⁴ Is ika ehelek aien, Ak inhal u natimi, namu apan ehele nup Isreel aiek, um asuptecnaig intas unyak ehele ra.

⁵ Ek idim eti abrai euc ainyak mika an apan ehele nup urai taka pece, et eche intas ura um ehka par ato, ja ehele nup Isreel;

⁶ eti ehele nup urai pece et ahinag, et eche intas ura um ehka par ato, et lep elika vai euc in leh vaig intas ura. Ele kis abrai euc ainyak mika an apan ehele ra, el eris idim atahaijeg euc ara.

⁷ Ja erupu esjum a nup Isreel par atahaijeg euc; era idim esjum ara par atahaijeg nyak: et acen nesganimtai nup Isreel asega, et lep ipjin inliinmopora.

⁸ Namu ato aiek mika, ek mun ago emda nesganimtam ainyak par anani nesganimtam pan ira ra, ek lep ago emda nipjineucsem ainyak, par auud yi aijiraig intas ura.

⁹ Ek mun ago emda nipjineucsem ainyak um idivaig inhetmi, et ipjin um esjilid irai hat; namu jim imtitai ra aiek, um jim imtitai nesganimtara aiek, era idim ilpu atimi imipalea ara.

¹⁰ Is lep ika ehelek aien, Ak inhal u natimi, namu ati an liinmopom aiek intas unyak asega iji ig ekpu asaig ehelum ainyak, um atahaijeg an tikgam.

¹¹ Namu atga unyum aiek, um apan ehele ilpu ohna, ehele nup urai pece unyum, um tas ehele ra, el era atahaijeg ara, ka yi ei el era esjum ara, um ika ehele ra, Et uce intas o Natimarid Ihova.

¹² Is um imiaridjai nyak a Nesgan, kis atahaijeg nohran tah ainyak an cehek, is alupas um idivaig nohrai ilpu atimi ehtauo, um ika, Uhmu imiahpas natimi alupas u Ihova ahes au nuarin amen iran o un.

¹³ Kis lep atahaijeg inmotjai ehpai iji itai umumoh ainyak eris atcei jipe ra, im inmotjai iji itai arehed eris apol ira ra, im nohran alupas is idivaig nohrai ilpu atimi ehtauo.

¹⁴ Is um imiaridjai nyak a Nesgan, um imiapan nyak; kis apan ainyak um taigtaig, is lep ohocred inliinmopok; ja is emda nikmai Ihova irak.

¹⁵ Kis yetpan Telebib ainyak ehele ilpu ohna iji ig eris amen u nofowai Kibar, kis ecetai namen ura eahki ainyak, kis ateuc ainyak um amen ehele ra ira adiat is seven ja is ti intas unyak.

¹⁶ Is wat ti pan itac nadiat iji ehki is seven, is yetpam ehelek intas o Ihova, um ika,

¹⁷ Ak inhal u natimi, ek mun ati euc ainyak, mika an atimi aminjinaig nup Isreel aiek: va nitai inigki atahaijeg intas inig ek asaig ainyak, um acaiji ra vai nyak.

¹⁸ Eku wit ika ainyak ehelen tah natimi auatatimi, Napu idim mas aiek; ja el et eti acaiji yin aiek, um eti tas par acaiji natimi auatatimi iyehki mika yi ahidai yin an nefalaig has o un, mika yi umoh aien; etpu mas an nedo has o un a natimi auatatimi iyehki; ja ekpu atijai iram inmas o un ainyak.

¹⁹ Ja el et acaiji natimi auatatimi iyehki aiek, ja el et eti ahidai yin aien an nedo imipalea o un, im nefalaig has o un, etpu mas aien an nedo has o un; ja na mun imiatamaig euc aiek.

²⁰ Im lep inig, el et ahidai yin a natimi upene an nedo upene o un, um ago nedo has, el ek lep ati nitai epihtau an nuhup o un ainyak, etpu mas aien: etpu mas aien an nedo has o un, vaig inig nikavaig, as eti acaiji yin aiek, uhpu eti lep imiehva nedo upene o un is ago aien; ja ekpu atijai iram inmas o un ainyak.

²¹ Ja el et acaiji natimi upene aiek, mika yi jim ago nedo has aien, el et eti ago nedo has aien, etpu idim umoh aien, vaig inig nikavaig, eris acaiji yiu; na mun lep imiatamaig euc aiek.

²² Is amen irak nikmai Ihova eahki; is um ika ehelek aien, Namu atidai aiek, um apan an nuarin marara, ekpu tas ehelum ainyak eahki.

²³ Kis atidai ainyak, um apan an nuarin marara: is um aiji natimi alupas u Ihova eahki, is idivaig natimi alupas o un iyehki kis ecetai ainyak u nofowai Kibar: kis atpuse ainyak.

²⁴ Is lep yetpam irak a Nesgan, um ika ki atidai ainyak, um tas ehelek, um ika ehelek, Namu apan aiek, um atapnes iram anliin neom unyum.

²⁵ Im lep inig, ak inhal u natimi, namu ato aiek mika, eri ati inwau iram ara, um arore euc iran, mika an jim apan ehele ra aiek.

²⁶ Ekpu ika ainyak yi apol aktit namam an naham, napu pop aiek, inyi elika vai euc nacaiji ra vaig: era idim ilpu atimi imipalea ara.

²⁷ Ja eku wit tas ehelum ainyak, ekpu asalgei nipjineucsem ainyak, napu lep ika ehele ra aiek, Et uce intas o Natimarid Ihova; Etmu atahaijeg aien et ika aien yi atahaijeg; im lep inig, etmu esjum aien et ika aien yi esjum: era idim ilpu atimi imipalea ara.