Esikiel 2 - Intas Etipup

Nuarin tas alupas 2.

1 Intas inig par ati Esikiel. 6 Intas asuptecnaig ehelen. 9 Nitaasviitai iyehki eris atpelaig et leh aien.

¹ IS ika ehelek aien, Ak inhal u natimi, namu atidai aiek um aiji, ekpu lep tas ehelum ainyak.

² Is wat tas ehelek aien, is yetpam irak Nesgan, um imiatidai jai nyak, kis ahgei yin ainyak is tas ehelek aien.

³ Is ika ehelek aien, Ak inhal u natimi, ek abrai euc ainyak mika an apan ehele nup Isreel, ehele nup urai pece imipalea iji ig era mun imipalea intas unyak ara: era mun ago nedo has vai nyak ara im ilpu retpora, um imihum pam an nadiat inigki.

⁴ Era ilpu atimi et acen nesganimtara ara, et lep ipjin inliinmopora, ja ek abrai euc ainyak mika an apan ehele ra; namu ika ehele ra aiek, Et uce intas o Natimarid Ihova.

⁵ Kit erupu atahaijeg ara, ka yi ei erupu esjum ara, (era idim ilpu atimi imipalea ara,) ja erupu idim ato ara mika et mun amen ehele ra a naprofeta et ethi.

⁶ Namu jim imtitai ra aiek, ak inhal u natimi, um jim imtitai intas ura; et idim eteuc ehelum niji itai upunupun im niji adeni, na lep amen ehele imyeuv aiek: jam jim imtitai intas ura aiek, um jim imtac va nesganimtara aiek, era idim ilpu atimi impalea ara.

⁷ Namu asuptecnaig intas unyak ehele ra aiek, el era atahaijeg ara, ka yi ei el era esjum ara: era idim ilpu atimi imipalea ara.

⁸ Ja namu atahaijeg intas unyak aiek, ak inhal u natimi, um jim idivaig ilpu atimi imipalea iji igki: namu ahag aiek, um caig nitai inig ek alupai euc ainyak.

⁹ Kis wat iaspan ainyak, kis ecetai nikman tah ainyak eris atgeig pam ehelek; kis lep ecetai nitaasviitai iran ainyak eris atpelaig.

¹⁰ Is elgelgei an nuhup unyak aien; eris aged intas anliin im lep itac: eris idim aged iran intas eri taigtaig vaig, um ehtigtaig vaig, um ohocred vaig.