Esikiel 16 - Intas Etipup

Nuarin tas alupas 16.

1 Er asuptecnaig nupyi amen has u Jerusalem um ika is idivaig inhadi haklin um arici. 6 Naiheuc egilid u Atua vai yin. 15 Et eheshas ingeijid o un. 35 Et esjilid neruvaig iran. 44 Nedo has o un et idivaig nedo has o risin, jam egilid irai nedo has o ohwat etwan, Sotom im Sameria, et ahlaig vai neruvaig nedo o un. 60 Etpu aiheuc vai yin a Atua an nopan apitac.

¹ IS lep yetpam ehelek intas o Ihova, um ika,

² Ak inhal u natimi, namu asuptecnaig ehele nup u Jerusalem aiek nedo ura er amcel vaig,

³ um ika, Et ika a Natimarid Ihova ehele Jerusalem; As ahes irai up u Kenan aiek, eris apos euc an pece ura; is mapoi Emor a etpom, is mapoi Hed a risum.

⁴ Eris apos euc is uce, an nadiat iyehki eris wat apos euc eris eti aldei nopoh unyum, eris eti yiri euc an wai mika an adicinadicin; eris idim eti aspi euc an moho an jap, eris idim eti aso upene euc an napelumai.

⁵ Is eti aiheuc vai euc tah, par ago tah nitai iji igki vai euc, um aminjinai euc; ja eris ethaig euc anliin pece, eris amcel vai euc an nadiat iyehki eris apos euc iran.

⁶ Kis wat uhum euc ainyak, um ecet euc as has aiek van ja iram, kis ika ehelum ainyak, as wat asjeuc aiek an ja iram, Namu umoh aiek; maiya, kis ika ehelum ainyak, as wat asjeuc aiek an ja iram, Namu umoh aiek.

⁷ Kis ika ainyak napu alupas aiek et idivaig itai inig et edel an nobohtan, as auatai elvalupas aiek um umoh, is idim eklim upene nesganimtam: is eteuc nitai eraigki et ero an ritim, is umoh numri nidjinum, ja as halav ihkin natimi aiek um tup atimi.

⁸ Kis wat uhum euc ainyak, um almuktit euc, is idim eteuc nopan aiyu u inliinmopok vai euc; kis lep elgelgei nilpun napelumai unyak iram ainyak, um adahpoi euc, va an jim ehcamai aiek: maiya, et ika a Natimarid Ihova, Kis asig yi aktit intas ehelum ainyak, intis asan tas etipup sjipe akaijau, kis par leh euc ehgak ainyak.

⁹ Kis yiri euc an wai ainyak; um ika an adicinadicin aiek van ja iram, um aspi euc an narakei auanipin upene.

¹⁰ Kis aso euc ainyak irai apelumai eris ijei nalmuitai iran, um atohwaig neduom irai su arasi kurimatau an jap; kis ago nitai ahid unyum ainyak an napelumai yilyil, um aso euc an napelumai esjilid.

¹¹ Kis yecrei euc ainyak irai iji itai upene, um ati nethado an nikmam ero, im natau colt au nauinwam.

¹² Kis ati nitai esjilid an nipjinimtam ainyak, im inteijig colt an tikgam ero, im incat adgaig esjilid an nidjinum.

¹³ Kis yecrei euc ainyak irai colt im silver; kis aso euc ira apelumai yilyil ainyak, im silk, im napelumai eris ijei nalmuitai iran; as caig flaur upene aiek, im hune, im narakei oliv: is idim eklim upene nesganimtam, as lep esjilid aiek um atimarid takata.

¹⁴ Is apaahni intas vai euc ehele nup urai iji pece, va neklim upene u nohum: et ika a Natimarid Ihova, As idim upene asega aiek vai itai yecrei iji ig unyak kis ago iram ainyak.

¹⁵ As asgeig an neklim upene u nohum aiek, um ago ingeijid vai intas esjilid vai euc, um ago nedo has ehele ilpu atamaig asega as ecet ra aiek; as lep amen ehele ra aiek, athi um athi ehni.

¹⁶ As lep leh hal apelumai unyum aiek um yecrei niji uarin itap imtam is acheiachei nago iran, um ago ingeijid iran: eris eti upyi ecetai itai is uce, is idim eti eteuc.

¹⁷ As lep leh nitai esjilid iji ig unyum aiek, eris ago irai colt unyak im silver unyak, kis ago iram ainyak, um ago niji atmasimai atamaig imi euc, um ago ingeijid ehele ra.

¹⁸ As lep leh niji apelumai unyum eris ijei nalmuitai iran aiek, um aso ra: as lep ati narakei oliv unyak aiek im nitai auanipin upene unyak au nuhup ura.

¹⁹ Im lep inig, as lep ikni an nuhup ura aiek mika yi itai auanipin upene, niji itai hegaig unyak kis alupai euc ainyak, nikavaig, flaur upene, im narakei oliv, im hune, kis alaam ainyak: et ika a Natimarid Ihova, Is idim uco nedo unyum.

²⁰ As lep lucsei ilpu halav atamaig unyum aiek im ilpu halav atahig unyum iji ig, na mun apos imi nyak aiek, na mun ahlap ira ra aiek imi ra va uhpu auahas ra.

²¹ Et idim eti itai haklin ingeijid unyum inigki, nikavaig, na mun atgei ilpu hal unyak aiek, um atcijai ra, um ika eri atnamud ra an cap imi ra.

²² Im lep inig, as ago nedo asega unyum aiek er amcel vaig im ingeijid asega unyum, jam eti imiehva nopan halav unyum, as wat ihkin natimi aiek um tup atimi ache, as lep has aiek van ja iram.

²³ Is wat ti pan itac nedo has asega unyum, (et ika a Natimarid Ihova, Awe, Kaiheuc vai euc!)

²⁴ as lep uctaig neom aiek, par ago nedo has iran, um ago nuarin itap imtam irai iji efalaig asega an maliyum.

²⁵ As uctaig nuarin itap unyum aiek irai iji ihtag u efalaig asega, as ago aiek et uce, um ika eri amcel vaig neklim upene u nesganimtam, as ika aiek eri ago nedo has ehelum ara asega as ecet ra aiek um ika yi ahinag ingeijid unyum.

²⁶ As lep ago ingeijid aiek ehele nup Ijipt ilpu atimi eblaamnem unyum, et alupas nohura; um ika yi ahinag ingeijid unyum, mika an auahas inliinmopok.

²⁷ Va nitai inigki namu ato aiek mika, ek mun adaigjai nikmak ainyak, um ika yi haklin nitai caig incam, um atcijaig ehni euc ehele ilpu atimi iji ig era edemda vai euc ara, nikavaig, ilpu halav atahig u nup u Filistia, era amcel vai euc ara va ingeijid unyum.

²⁸ As ago ingeijid aiek ehele nup Asiria, vaig inig nikavaig, is eti eropse inliinmopom aiek; maiya, as ago ingeijid aiek ehele ra; ja is idim eti eropse inliinmopom aiek.

²⁹ Im lep inig, as ika aiek yi ahinag ingeijid unyum an pece Kenan um yetpan an pece Kaltia; ja is eti eropse inliinmopom aiek vaig.

³⁰ Et ika a Natimarid Ihova; Et idim auatialidi inliinmopom aiek par ago nitai iji igki asega, niji auritai marom u intakata inig et imiisjis aien par ago ingeijid;

³¹ vaig inig nikavaig, as uctaig neom unyum aiek par ago nedo has iran irai iji ihtag u nefalaig asega, um ago nuarin itap unyum irai iji efalaig asega an maliyum; as lep eti idivaig tup intakata has aiek, vaig inig nikavaig, as eti aktaktai nimtan alupas aiek;

³² ja na mun idivaig ehgan tah et lucsei tak atamaig aien um ago ingeijid ehele ra, et wat amen ehele natamnyu un aien!

³³ Era alupai ilpu takata ago ingeijid asega nimtan natimi: ja as alupai ilpu atimi merit vai euc asega nimtan aiek, um leh updak ra an nimtan, mika eri apam ehelum ara marehed mihtag, um ago ingeijid ehelum.

³⁴ Na eche aiek irai ilpu takata asega an geijid unyum, nikavaig, et eti apitac euc tah par ago ingeijid: na lep alupai ra nimtan aiek, ja era eti alupai euc nimtan ara, va nedo inigki na mun eche aiek.

³⁵ Va nitai inigki namu atahaijeg intas o Ihova aiek, ak intakata ago ingeijid:

³⁶ Et ika a Natimarid Ihova; Vaig inig nikavaig, na mun esjilid aiek par ago ingeijid, eris lep alum euc an geijid unyum ehele ilpu atimi merit vai euc im lep ehele natmasimai unyum iji ig er amcel vaig, im lep an natgei ilpu hal unyum iji ig as alupai ra aiek;

³⁷ va nitai inigki namu ato aiek mika, ekpu asjapicnaig ilpu atimi asega era merit vai euc ara ainyak, na mun imiacitak vai ra aiek, im lep ra sji ig asega et mun aiyu inliinmopom aiek vai ra, im lep ra sji ig asega na mun amcel vai ra aiek; ekpu idim asjapicnai ra ainyak marehed mihtag vai euc, ekpu lep atipagki niji itai iram ainyak an nuhup ura, mika eri alum euc ara.

³⁸ Ekpu lep aru iram ainyak, et idivaig neruvaig irai ilpu takata iji ig era ago ingeijid ara um atgei atmas; ekpu atgei euc ainyak um ago nedo u natimi inig et edemda aien um oporei.

³⁹ Ekpu lep atcijaig euc ainyak ehele ra; erupu alcapdicraig neom an geijid unyum ara, um auahas niji uarin itap unyum: erupu lep adi napelumai unyum ara, um atipagki niji itai yecrei esjilid unyum, um udei euc, napu takata ihkin natimi aiek um tup atimi.

⁴⁰ Erupu imiapam inpak an nedoa vai euc ara, erupu lep asji euc ara irai hat, um ahcai euc irai auitoga ura.

⁴¹ Erupu lep atnamud eom unyum an cap ara, um ago neruvaig iram an nuhup u ilpu takata inyi ahinag: ekpu lep ika ainyak an jim lep ago ingeijid aiek, napu eti lep alupai ra nimtan aiek.

⁴² Ekpu ika ainyak yi tiih nedemda alupas unyak vai euc, etpu omot noporei unyak vai euc, etpu eropse inliinmopok ainyak, ekpu eti lep edemda ainyak.

⁴³ Vaig inig nikavaig, na mun eti imiehva nopan halav unyum aiek, ja na mun auahas inliinmopok aiek an nitai iji igki asega; et ika a Natimarid Ihova, Ekpu lep aru iram nedo unyum ainyak as ago niji edo asega aiek er amcel vaig: ja inki eti lep ehcilpun iran ainyak, um ago nedo has.

⁴⁴ Im lep inig, erupu asan tas ecsipece inigki vai euc ara asega era asan tas ecsipece ara, um ika. Et idivaig risin a inhalav atahig o un.

⁴⁵ Nai halav atahig u risum aiek, is amcel vai natamnyu un aien im lep ilpu hal o un; nai etwai ilpu etwam aiek, eris amcel vai ilpu atamnyura ara im lep ilpu hal ura: is mapoi Hed a risum, is mapoi Emor a etmam.

⁴⁶ Is etwam inmeto a Sameria, aien im ilpu halav atahig o un eris amen ara an mauum: is lep etwam inharei a Sotom, aien im lep ilpu halav atahig o un eris amen ara an matam.

⁴⁷ Ja na eti mun apitac ra aiek an nedo ura, um eti ago et idivaig nedo ura er amcel vaig: na mun ika aiek. Et takitai nedo ura, na mun has aiek um esjilid ira ra an nedo unyum asega.

⁴⁸ Et ika a Natimarid Ihova; Ek umoh ainyak, et idim uco, is eti ago a Sotom etwam, aien marom im ilpu halav atahig o un, et idivaig nedo inig na mun ago aiek, aiek marom im ilpu halav atahig unyum.

⁴⁹ Namu ato aiek mika, is eteuc nedo has inigki ehele Sotom etwam im lep ilpu halav atahig o un, nikavaig, is ijinies inliinmopora ara, eris hag alupas ara, eris tup amen ara jam eti aktaktai, is eti atau aien imi ilpu atimi ohocred im ilpu ihki atimi.

⁵⁰ Is lep akrei nesganimtara ara, eris lep ago nedo inig ara er amcel vaig an nuhup unyak: va nitai inigki kis um iknipagki ra ainyak va nitai iji igki kis ecetai ainyak.

⁵¹ Is ago a Sameria nedo eti elpat irai edo has unyum; na mun ika aiek yi ahinag nedo unyum er amcel vaig um esjilid irai ohwat etwam, um ika is idivaig nedo atoh nedo urau va nedo asega unyum er amcel vaig na mun ago aiek.

⁵² Namu apos nehcamai unyum aiek aigki, na mun ika aiek is idivaig nedo atoh nedo o ohwat etwam, va nedo has unyum iji ehki na mun ago aiek is esjilid irai nedo has urau: is has tintin nedo urau um eti idivaig nedo unyum: namu lep imtitaig aiek um ehcamai, vaig inig nikavaig, na mun ika aiek is idivaig nedo atoh nedo o ohwat etwam.

⁵³ Ekpu lucsei ra an taka pece ainyak, um imiadumoij pam ra, nikavaig, Sotom im ilpu halav atahig o un; ekpu lucsei ra an taka pece ainyak um imiadumoij pam ra, nikavaig, Sameria im ilpu halav atahig o un; ekpu lep lucsei euc im ilpu halav atahig unyum ainyak um imiadumoij pam caua ehele ra:

⁵⁴ mika an ehcamai aiek, um imtitaig va nedo asega unyum inig na mun ago aiek, um ika yi eropse inliinmoporau arau vaig.

⁵⁵ Etu wit adumoij pam a etwam Sotom im ilpu halav atahig o un an nupyi amen ura, etu wit adumoij pam a etwam Sameria im ilpu halav atahig o un an nupyi amen ura, napu lep adumoij pam aiek im ilpu halav atahig unyum an nupyi amen unyimia.

⁵⁶ As eti asaig tah intas aiek vai Sotom etwam an nopan u nijinies u inliinmopom.

⁵⁷ Eris wat eti fi ato nedo has unyum, nikavaig, an nopan iyehki eris wat auoh ehcamai euc a ilpu halav atahig u Siria, im ilpu atimi eblaamnem o un asega, nikavaig, ilpu halav atahig u Filistia, era amcel vai euc ara marehed mihtag.

⁵⁸ Et ika a Ihova, Napu apos neruvaig nedo has unyum aiek im nedo unyum er amcel vaig.

⁵⁹ Et lep ika a Natimarid Ihova; Ekpu ago vai euc ainyak, et idivaig nedo inig na mun ago aiek, nikavaig, na mun amcel van tas asig yi aktit aiek um imipalea intas etipup.

⁶⁰ Ja ekpu imiehva intas etipup ainyak intis asaig sjipe akaijau an nopan natahig unyum, ekpu lep ati aktit ehelum ainyak intas etipup inyi eti lep ti.

⁶¹ Napu imiehva nedo unyum aiek, um ehcamai, nau wit leh ohwat etwam aiek, inmeto marom, im lep inharei: ekpu alupai euc rau ainyak mika eru idivaig ohwat halav atahig unyum arau, jam eti vai intas etipup unyum.

⁶² Ekpu ati aktit ehelum intas etipup unyak ainyak; napu lep ato aiek mika ek Ihova ainyak:

⁶³ mika an imiehva aiek, um imtitaig, um eti lep tas, va nehcamai unyum, eku wit eti aru iram ainyak va niji edo asega as ago aiek; et um uce intas o Natimarid Ihova.