Esikiel 12 - Intas Etipup

Nuarin tas alupas 12.

1 Et almui itai nauaraga u Esikiel. 8 Et ehvaig mika eri imiapan Setekaia an taka pece. 17 Et eucjeucjeucaij a Esikiel par ehvaig mika yi umaruma inpece u nup u Juta. 21 Er acaiji intas ijinies u nup u Juta. 26 Et eti laulau nahuumtidec jam yetpam.

¹ IS lep yetpam ehelek intas o Ihova, um ika,

² Ak inhal u natimi, na amen aiek ehele ilpu atimi imipalea, et eteuc ehele ra nesganimtara mika eri alum itai, ja era eti alum itai ara; et eteuc ehele ra intikgara mika eri atahaijeg itai, ja era eti atahaijeg itai ara: era idim ilpu atimi imipalea a nup uran pece unyum.

³ Va nitai inigki, ak inhal u natimi, namu ago niji ipjiitai u ilpu ohna aiek, um apan itac an nadiat an nuhup ura; namu udei nuarin amen iran unyum aiek, um atga unyum par apan an taka uarin an nuhup ura: kit erupu aktaktai ara, ja era idim ilpu atimi imipalea a nup uran pece unyum.

⁴ Namu imiapan niji ipjiitai unyum aiek an nadiat an nuhup ura, nikavaig, niji ipjiitai u ilpu ohna: im lep inig, namu atga unyum aiek an jupura an nuhup ura, et idivaig natga pan u ilpu ohna.

⁵ Namu alcapdicraig nuarin nathatahau aiek an nuhup ura, um atga unyum an nuarin iyehki.

⁶ Namu ahelwei itai unyum aiek an nuhup ura, um imiapan itac an nepig an mehcim: namu adahpoi nesganimtam aiek, mika an jim almoi nobohtan aiek: ek mun ati euc ainyak mika an itai asjaaicnaig an nohocred aiek imi nup Isreel.

⁷ Kis ago nedo inig ainyak is asaig ehelek aien: kis imyeuca niji ipjiitai unyak ainyak an nadiat, nikavaig, niji ipjiitai u ilpu ohna, kis alcapdicraig nuarin nathatahau imi nyak ainyak an jupura; kis ahelwei itai ainyak an nepig an mehcim, um imiapan itac an nuhup ura.

⁸ Is yetpam ehelek intas o Ihova an nuhialeg, um ika,

⁹ Ak inhal u natimi, era mun idim ahodai euc a nup Isreel, ilpu atimi imipalea iji igki marom, um ika, Na ago inhe aiek?

¹⁰ Namu ika ehele ra aiek, Et ika a Natimarid Ihova; Nitai asjaaicnaig an nohocred nigki, et yetpam vai natimarid Jerusalem, im lep vai nup Isreel asega era amen ehele ra ara.

¹¹ Namu ika ehele ra aiek, Ek itai asjaaicnaig an nohocred vai caua ainyak: uhpu ago vai caua et idivaig ek mun ago ainyak: erupu apan itac ara um amen ilpu ohna an taka pece.

¹² Intas vai natimarid inig et amen ehele ra aien nigki, etpu ahelwei itai aien an nepig an mehcim, um apan itac: erupu alcapdicraig inuarin amiliak iran ara an nathatahau, um imiapan itac itai ura iran: etpu adahpoi nesganimtan aien, mika yi jim almoi nobohtan an nesganimtan aien.

¹³ Ekpu ahalgapni yin ainyak an nopoig unyak, ekpu apro yin ainyak an nitai apro itai unyak: ekpu imiapan yin an maliyum Babelon ainyak an pece u nup u Kaltia; etpu mas eahki aien, jam eti almoi inpece.

¹⁴ Ekpu imiterimterim ara sji igki asega ainyak era amen ehelen ara par atau imi yin, ekpu lep imiterimterim ilpu eucsupo asega o un ainyak marehed mihtag; ekpu lep ati nedoa ainyak mika yi ahau ra.

¹⁵ Erupu lep ato ara mika ek Ihova ainyak, eku wit imiterimterim ra ainyak ehele nup urai iji elcau asega, um eduaraprap ira ra irai iji pece asega.

¹⁶ Ekpu ika ainyak eri eled atimi eti elpat ira ra va nedoa, im lep va numlaig has, im lep va nemehe has; mika eri asuptecnaig nedo asega ura er amcel vaig ehele nup urai pece iji ig eri apan ehele ra ara; erupu lep ato ara mika ek Ihova ainyak.

¹⁷ Is lep yetpam ehelek intas o Ihova, um ika,

¹⁸ Ak inhal u natimi, Namu hag ehioehio aiek an hag unyum, um eucjeucjeucaij um imtitaig an numwig unyum;

¹⁹ um ika ehele nup uran pece inigki, Et ika a Natimarid Ihova vai uup u Jerusalem, im lep vai nup uran pece Isreel; Erupu aktaktai alupas ara an hag ura, um imtitaig alupas an numwig ura, etpu idim umaruma inpece ura va natgei atmas im natoraliak itai u ilpu atimi asega amen iran.

²⁰ Uhpu auahas inmaliyum iji ig era amen natimi iran, etpu umaruma inpece inigki; akupu ato aijaua mika ek Ihova ainyak.

²¹ Is yetpam ehelek intas o Ihova, um ika,

²² Ak inhal u natimi, Neve tas ecsipece naico eka asaig aijaua an pece Isreel, um ika, Et opra nopan, et takitai niji ahuumtidec asega?

²³ Va nitai inigki namu ika ehele ra aiek, Et ika a Natimarid Ihova; Ekpu ika ainyak inyi idim tiih intas ecsipece naico, erupu eti lep asaig intas ecsipece naico ara an pece Isreel; ja namu ika ehele ra aiek, Et ubutpotet niji adiat, uhpu ehneijid niji ahuumtidec asega.

²⁴ Etpu eti lep eteuc tah nahuumtidec inig et ahcil, inyi eti lep has nedo u ilpu profeta efaifa ehele nup Isreel.

²⁵ Ek idim Ihova ainyak: ekpu tas ainyak, uhpu ehneijid intas inig ekpu asaig ainyak; etpu eti lep amen intas unyak: Et lep ika a Natimarid Ihova, Ak ilpu atimi imipalea, ekpu asan tas ainyak ira adiat unyimia, um lep ehneijid.

²⁶ Is lep yetpam ehelek intas o Ihova, um ika,

²⁷ Ak inhal u natimi, era idim ika a nup Isreel, Van taka opan ache nahuumtidec naico et ecetai aien, vai nopan iji igki inyi eti fi yetpam et asuptecnaig intas aien.

²⁸ Va nitai inigki namu ika ehele ra aiek, Et ika a Natimarid Ihova; Etpu idim auroauro niji tas unyak, et idim ika a Natimarid Ihova, Uhpu ehneijid intas asega iji ig ekpu asaig ainyak.