Esikiel 1 - Intas Etipup

Nuarin tas alupas 1.

1 Nopan iyehki et asuptecnaig intas o Atua a Esikiel u nofowai Kibar. 4 Et ecet ilpu jerub et for aieu, 15 im niji itai arehed et for, 26 im lep natimi alupas u Atua.

¹ AN mesese dirtied, an mohoc ford, an nadiat fifd an mohoc iyehki, kis wat amen ainyak ehele ilpu ohna u nofowai Kibar, eris asalgei nohatag, kis ecetai niji itai ehvaig u Atua ainyak.

² An nadiat fifd an mohoc iyehki, an nopan iyehki eris imiapan Babelon Jehoiakin natimarid, ja is ti pan itac inmesese is for,

³ is idim yetpam intas o Ihova ehele Esikiel natimi ahlap, inhal u Busai, an pece u nup u Kaltia u nofowai Kibar; is amen nikmai, Ihova iran eahki.

⁴ Kis easpan ainyak, um ecetai narakiraki is ahes an pece inig et ahes narutu iran, im napat alupas, im lep incap is ispun ere, is arehed an napat nitai naunau, is ahes an cap nitai inig et idivaig nememina u nitai yag esjilid anliin cap.

⁵ Is lep ehcohos anliin cap iyehki niji itai umumoh is for. Is uce nago ira ra; eris idivaig natimi ara.

⁶ Is eteuc ira ra nesganimtara is for, athi um athi ehni; is lep eteuc ira ra nehpara is for, athi um athi ehni.

⁷ Is atoh neduom; is idivaig nugnyan neduei hakli kurimatau nugnyan neduora: eris naunau ara um idivaig naijoran lah u nitai yag esjilid.

⁸ Is eteuc nikmara is idivaig nikma atimi ithan nehpara an nahaijira is for, athi um athi ehni; is uce, is eteuc nesganimtai itai is for iji ehki im lep nehpara, athi um athi ehni.

⁹ Eris ehcilpun jipe nehpara; eris eti ahidai ra ara an natga ura; eris atga pan atoh ara, athi um athi ehni.

¹⁰ Intas asuptecnaig va nago an nesganimtara nigki; is eteuc ira ra nesganimtara is idivaig nesganimtai atimi, im lep nesganimtai laion, an nahaijira an matara: is lep eteuc ira ra nesganimtara is idivaig nesganimtai kurimatau, im lep idivaig nesganimtai inmeijcop alupas, an nahaijira an mauura, athi um athi ehni.

¹¹ Eris atiakoai nesganimtara im nehpara ijinies; is ahtet jipe nahpara is ehro; is lep adahpoi nohura nahpara is ehro, athi um athi ehai.

¹² Eris atga pan atoh ara asega, alaig an nuarin inig is ika a Nesgan yi apan, eris apan eahki ara; eris eti ahidai ra ara an natga ura.

¹³ Intas asuptecnaig va nago irai iji itai umumoh iji ehki nigki; eris idivaig inhumla an cap, um idivaig incap alahala: is aridjai um lep asuol an niblai iji itai umumoh; is ere incap, is lep ahes an cap nauwainapit.

¹⁴ Eris athut niji itai umumoh um lep adumoij, et idivaig nahuwahwai.

¹⁵ Kis wat aespan niji itai umumoh ainyak, kis ecetai nitai arehed is ethi ainyak an nobohtan u niji itai umumoh va nahaijira is for, athi um athi ehni.

¹⁶ Is idivaig naijoran lah u inhat emilmat inyipin itai arehed im nago ira ra: is ethi ache nago irai itai arehed is for: is idivaig nitai arehed anliin nitai arehed inyipira im nago ira ra.

¹⁷ Eris wat atga ara, eris atga jipe ara an nahaijira is for: eris eti ahidai ra ara an natga ura.

¹⁸ Intas va niji itai arehed itac nigki, is ijinies acen, eris lep imtitaig vaig; is lep ohua nesganimtai atimi irai itai arehed itac is for iji ehki marehed mihtag.

¹⁹ Eris wat atga niji itai umumoh, eris ahced ra niji itai arehed: eris wat imiaridjai niji itai umumoh an nobohtan, eris lep imiaridjai niji itai arehed.

²⁰ Eris apan ara irai iji uarin asega, is ika a Nesgan yi apan; is idim apan eahki nesgara; eris imiaridjai niji itai arehed ehele ra: is idim amen nesgai iji itai umumoh irai iji itai arehed.

²¹ Eris wat atga ara sji ehki, eris lep atga ara sji igki; eris wat aiji ara sji ehki, eris aiji ara sji igki; eris wat imiaridjai ra sji ehki an nobohtan, eris lep imiaridjai niji itai arehed ehele ra: is idim amen nesgai iji itai umumoh irai iji itai arehed.

²² Is eteuc tah nitai ijinies irai idjini iji itai umumoh is idivaig nauanohatag, is idivaig naijoran lah an nitai naunau inig eris imtitaig vaig, eris elgelgei ijinies irai idjinira.

²³ Is atoh nehpara ithan nauanohatag, is lah sjipe, is eteuc ehele ra asega nehpara is ehro, par adahpoi ra an nahaijira inig: im lep nehpara ehro, par adahpoi ra an nahaijira iyehki, athi um athi ehni.

²⁴ Kis atahaijeg inmotjan nehpara ainyak is idivaig inmotjan jap alupas, is idivaig nohra Atua emda acen: eris wat atga ara, is eteuc nohrara alupas is idivaig nohrai ilpu atimi aipun nedoa: eris wat aiji ara, eris asvahteuc nehpara ara.

²⁵ Eris wat aiji ara, is ahes an nauanohatag ijinies u idjinira nohran tah is ethi, ja eris par asvahteuc nehpara ara.

²⁶ Is eteuc tah nitai inig ijinies an nauanohatag iyehki is ijinies u idjinira, is idivaig nitai ateuc iran esjilid, is idivaig nago an hat safir nago iran: is lep ehcohos nalmui atimi ijinies an nalmui nitai ateuc iran esjilid.

²⁷ Kis ecetai tah nitai inig ainyak is idivaig nememina u nitai yag esjilid, is idivaig nago an cap anliin marehed mihtag, ahes an wauahid o un um aridjai an nidjinin, um ahes an wauahid o un um ahlause an neduon, kis ecetai tah nitai inig ainyak is idivaig nago an cap, is naunau asega marehed mihtag.

²⁸ Is idivaig nago an huterau inig et ehcohos an napat an nadiat inig et ika yi ehe, nago an naijoran lah iyehki is arehed mihtag: nago an natimi alupas u Ihova iyehki. Kis wat ecetai ainyak, kis atpuse ainyak, kis ahgei nohran tah is ethi ainyak is tas aien.