Emos 9 - Intas Etipup

Nuarin tas alupas 9.

1 Uhpu idim, auahas atimi. 11 Eri ehteduo neom u Tevit.

¹ KIS almoi Natimarid ainyak naiji vaig u natau: is um ika aien, Auud nauincai er atgeig ijinies an neucse neom mika yi amaamai noboatau et ero, um ahtagrei irai idjinira asega; ekpu lep atgei ilpu hal ura au nedoa ainyak: el et ahapan tah ira ra inyi idim eti aha upene aien, el et atarere tah ira ra eri eti imiatamaig yin.

² El era ucji ubo nehpanitai ara um yetpan an pece has, etpu lucsei ra eahki nikmak ainyak: el era aridjipan ara an nohatag, ekpu imiasuol ra eahki ainyak:

³ el era atpuli ara an lolan nedoon Karmel, ekpu ecet ra ainyak, um lucsei ra eahki; el era atpuli vai nyak ara anliin jap, ekpu asaig ainyak ehelen tah nimyeuv, etpu lep aces ra aien:

⁴ el era imiapan ra an taka pece a ilpu atimi edemda vai ra, ekpu ati nedoa ainyak eahki, uhpu lep atgei ra: ekpu alum pan ra ainyak mika eri ohocred ara, jam eti amen upene.

⁵ Et atcei pam inpece a Ihova Atua esjilid acen, ja etpu ahtitiri, erupu lep taig natimi asega era amen iran ara: etpu aseuca alupas et idivaig tah nofowai etpu ahgarero, um lep umri et idivaig nofowai Ijipt.

⁶ Aien aigki et ago uarin amen o un aien an nohatag, um ikni aktit niji irai itai o un an nobohtan: et ahlaig aien van jap, um atladwi se inwai an narasin nobohtan: et idan Ihova.

⁷ Et ika a Ihova; Ak nup Isreel, eka idivaig nup Idiopia vai nyak aijaua. Kis idim imiapam nup Isreel ainyak ahes an pece Ijipt, im lep nup u Filistia ahes an pece Kaftor, im lep nup u Siria ahes an pece Kir.

⁸ Et idim yas pam a Ihova Natimarid an nelcau u ilpu atimi auatatimi, ekpu auahas ainyak um atipagki nelcau iyehki an narasin nobohtan; ja, et ika a Ihova, inki eti auahas ehni ilpu mapoi Jekob ainyak.

⁹ Ekpu idim asaig ainyak, um ika eri terimterim a nup Isreel ehele nup urai iji pece asega, et idivaig er irara hwiit an nitai irara, ja inja eti etjose tah nupsi hwiit au nobohtan.

¹⁰ Ja erupu emesmas an nedoa a ilpu atimi auatatimi asega irai ilpu atimi unyak, era ika ara, Inyi eti uhum pam caija nohocred um eti ehtet iraija.

¹¹ An nadiat iyehki ekpu lep ago niimwudig inig u Tevit ainyak is jase, um atapnes niji uarin eris alcapdicraig; ekpu imiatidai niji uarin is achadaliek se ainyak, ekpu actaig ainyak et idivaig itu acen:

¹² mika eri ohuun nahri nup Itom ara, im lep nahri nup urai iji pece asega, er anvi nidak ira ra; et uce intas o Ihova, aien aigki et ago nitai inigki aien.

¹³ Et ika a Ihova; Etpu yetpam tah nopan, erupu uhum pan ilpu atimi ucsei hwiit a ilpu atimi ahapol an nobohtan, erupu lep uhum pan ilpu atimi ahwai vaine a ilpu atimi ahtaijiraig nohwai vaine; etpu ahtahtise nide vaine irai iji au, etpu lep ahtitiri niji edoon asega.

¹⁴ Ekpu lep imiadumoij pam nup Isreel unyak ainyak eris lucsei pan ra, erupu lep imiatidai niji maliyum ahyuahyu ara, um amen iran; erupu lep ahwaig ahapol vaine ara, um umnyi nide vaine; erupu lep ago ahapol irai iji itai ara, um caig ohwan.

¹⁵ Et ika a Ihova Atua unyimia; Ekpu lep ahwai ra ainyak an pece ura, eri eti lep atecrei ra an nuarin amen iran ura kis alupai ra ainyak.