Emos 8 - Intas Etipup

Nuarin tas alupas 8.

1 Incat ohwai itai meto, uhpu auahas nup Isreel jam eti itu. 4 Et acaiji ra aien va nehtipidai atimi ura. 11 Et ika aien etpu eteuc numlaig has vai intas o Atua.

¹ IS lep aketo a Ihova Natimarid um ehvaig ehelek nitai is ethi: nikavaig, incat ohwai itai meto.

² Is um ika aien, Ak Emos, nai ecetai inhe aiek? Kis ika ainyak, Incat ohwai itai meto. Is lep ika ehelek a Ihova, Et mun yetpam nehni vaig u ilpu atimi unyak nup Isreel; inki eti lep itai vai ra ainyak.

³ Et ika a Ihova Natimarid, An nadiat iyehki etpu isjeupigmoig niji ohraiitai an nimnim atimi nehtigtaig: etpu amen irai uarin asega nohui ilpu atimi emesmas inyi ahinag; erupu erekhaig pagki ra ara jam eti tas.

⁴ Akumu atahaijeg intas inigki aijaua, eka ehtipidai ilpu ihki atimi aijaua, mika eri atiih a ilpu atimi ohocred an pece,

⁵ eka ika aijaua, Etpu ti pan itac nupyi het an nahopan, mika ti ahtai hwiit akaija? im lep nadiat atumop, mika ti leh pok ijo hwiit akaija? eka ago haklin nipjiitai asjaaicnaig itai iran aijaua, um lep ago alupas nimtan vai itai; eka wat ahtai itai aijaua, eka ago nedo efaifa va niji itai asjaaicnaig aijaua.

⁶ Eka auarimtai ilpu ihki atimi aijaua irai silver, im ilpu atimi ohocred vai su et ero; eka lep ahtai hwiit aijaua et has.

⁷ Et mun asig yi aktit intas o un a Ihova va natimi alupas u ilpu mapoi Jekob, um ika, Inki idim eti ahnag ainyak an tah nauritai ura irai iji mesese.

⁸ Etpu idim eucjeucjeucaij inpece va nitai inigki, erupu lep taigtaig natimi asega era amen iran ara; etpu idim aridjai alupas inpece et idivaig nofowai et ahgarero; etpu ahgarero um lep umri, et idivaig nofowai Ijipt.

⁹ Im lep inig, et ika a Ihova Natimarid, An nadiat iyehki ekpu ika ainyak yi ete nagesega an nadiatadiat, ekpu lep ika ainyak yi idivaig inmehcim inpece an nopan iyehki et adila nohatag:

¹⁰ ekpu ika ainyak aki ehtigtaig ache aijaua irai asjapicnaig unyimia, etpu isjeupigmoig niji ohraiitai asega unyimia naunyauwaig unyimia; ekpu ika ainyak eri ahid apelumai uucai natimi asega, yi lep igpit nidjini atimi asega; ekpu ika ainyak yi idivaig nehtigtaig vai inhalav atamaig et ethi ache aien nehtigtaig iyehki, etpu has nadiat iyehki eri ago ehni itai iran.

¹¹ Et ika a Ihova Natimarid; Etpu yetpam hal adiat, ekpu ika ainyak yi eteuc numlaig has an pece, ja inyi eti eteuc numlaig has va nitai caig, um eti eteuc nahvig wai, ja inyi eteuc numlaig has par atahaijeg intas o Ihova.

¹² Erupu atga jipe ara ahes an jap et ethi um yetpan an jap et eche, ahes an pece inig et ahes narutu iran um yetpan an ridjai o un, erupu athut jipe ara um ahilek intas o Ihova, jam eti ecetai.

¹³ An nadiat iyehki erupu auatialidi a ilpu atahig eklim upene im lep ilpu takuras va nahvig wai ura.

¹⁴ Erupu eropropse um eti lep atidai ara sji igki, era asig yi aktit intas ara va natmas has u nup u Sameria, um ika, Ak nup u Tan, et umoh a natmas unyimia; um lep ika, Et idim umoh a natmas u nup u Biersiba.