Emos 7 - Intas Etipup

Nuarin tas alupas 7.

1 Neruvaig vai heled, 4 vai incap, et atapnes neruvaig a Emos an nalaigaheni o un. 7 Nathatahau im inya asjaaicnaig par asuptecnaig nethaigse u nup Isreel. 10 Et asan tas ehti vai Emos a Amasaia. 14 Nimiacaij vaig u Emos. 16 Neruvaig irai Amasaia.

¹ IM lep inig, is ehvaig ehelek nitai inigki a Ihova Natimarid; nikavaig, is ika aien yi eteuc inheled an numoh uhup u efelelicai apitac; is idim umoh apitac iyehki is ti pan itac nopan ucsei efelelicai vai natimarid.

² Eris wat atahni nefelelicai an pece ara, kis ika ainyak, Ak Ihova Natimarid, ek ugyi euc ainyak, mika an jim aru nedo has unyima aiek: erupu aiji a ilpu mapoi Jekob um uauo? era idim eti elpat ara.

³ Is adumoij an liinmopon a Ihova va nitai iyehki: et ika a Ihova, Eri eti ago nitai inigki.

⁴ Is lep ehvaig ehelek nitai inigki a Ihova Natimarid: nikavaig, is ika a Ihova Natimarid eri aru ira atimi an cap, is um tup tiih pan namilvai alupas vaig, eris lep auahas nahaijin pece.

⁵ Kis lep ika ainyak, Ak Ihova Natimarid, ek ugyi euc ainyak, mika an udei aiek: erupu aiji a ilpu mapoi Jekob um uauo? era idim eti elpat ara.

⁶ Is lep adumoij an liinmopon a Ihova va nitai iyehki: et ika a Ihova Natimarid, Eri eti lep ago nitai inigki.

⁷ Is aketo a Ihova um ehvaig ehelek nitai iji igki: nikavaig, is aiji a Natimarid ijinies an nathatahau is aiji atoh, is amen inya asjaaicnaig an nikman.

⁸ Is ika ehelek a Ihova, Ak Emos, nai ecetai inhe aiek? Kis ika ainyak, Inya asjaaicnaig. Is ika a Natimarid, Ekpu idim ati inya asjaaicnaig ainyak ehele ilpu atimi unyak nup Isreel: inki eti lep itai vai ra ainyak:

⁹ inyi umaruma niji uarin ijinies u ilpu mapoi Aisak, eri auahas niji uarin itap u nup Isreel; ekpu atidai ainyak um ati nedoa vai nup uran nimnim u Jeroboam.

¹⁰ Is abraig tah a Amasaia natimi ahlap Bedel ehele Jeroboam natimarid an pece Isreel, par ika, Et mun asaig intas alwai vai euc a Emos ehele nup Isreel: era auatialidi a nup uran pece par atahaijeg intas asega o un.

¹¹ Et idim ika a Emos, Uhpu atgei Jeroboam an nedoa, eri ikni-pagki nup Isreel an pece ura, um imiapan ra an taka pece, mika eri ilpu atimi ohna.

¹² Is um ika ehele Emos a Amasaia, Ak natimi ahuumtidec, atga unyum aiek, um ahapan an pece Juta, um hag eahki, um ahidan tas eahki:

¹³ jam jim ahidan tas aiek Bedel: vaig inig nikavaig, et eom itap u natimarid igcaki, et lep imnim atimi o un.

¹⁴ Is um tas ehele Amasaia a Emos, um ika, Kis eti aprofeta ainyak, kis eti lep hal o un tah naprofeta ainyak; ja kis atimi asgi itai eklim edo irai pece ainyak, um atimi aminjinaig nohwai auyerop:

¹⁵ is um leh nyak a Ihova kis wat apitac irai pak irai siip ainyak, is um ika ehelek a Ihova, Namu apau aiek, um ahidan tas ehele ilpu atimi unyak, nup Isreel marom.

¹⁶ Im lep inig, namu atahaijeg intas o Ihova aiek; Nai ika ehelek aiek, Namu jim ahidan tas aiek vai nup Isreel, um jim tas pam ehele ilpu mapoi Aisak.

¹⁷ Va nitai inigki et ika a Ihova: Eri ago ingeijid ehele ehgam an maliyum, erupu emesmas an nedoa a ilpu halav atamaig unyum im ilpu halav atahig unyum, uhpu ahaig inpece unyum an ya asjaaicnaig; napu mas aiek an pece et ethi et has: eri idim iknipagki nup Isreel an pece ura, um imiapan ra an taka pece, mika eri ilpu atimi ohna.