Emos 6 - Intas Etipup

Nuarin tas alupas 6.

1 Nacitak u nup Isreel. Etpu umaruma inpece ura vaig. 12 Nedo ahnag ura.

¹ KAIHEUC vai ra era tup eklim amen ara an nedoon Saion, im lep ra era ika ara era amen upene an nedoon Sameria ara, era ilpu atimi alupas irai nup urai pece esjilid ara, era yetpam ehele ra a nup Isreel!

² Akumu yetpan an maliyum Kalni aijaua, um almoi; um ahes eahki um apan Hemad inmaliyum alupas iyehki: ja par asuol an maliyum Cad u nup u Filistia: eris esjilid a nup urai pece ura irai nup urai pece iji igki, ka oʼo? et lep alupas inpece ura irai pece unyimia, ka oʼo?

³ Kaiheuc vai ra era ika ara et i itac acen nopan ohocred, um ati ubutpotet pam nitai ateuc eh tas alep ipjin iran;

⁴ um asjeuc irai tinara eris yecrei, um lep eklim asjeuc irai tinara upene ura, um caig niji hakli siip an pak irai siip, im niji hakli kurimatau eris alaa an neom u kurimatau;

⁵ um acesaces ohraiitai an nohrai harp, um ago itai ohraiitai imi i ra et idivaig Tevit;

⁶ um umnyi waina irai ipjiitai alupas, um aspi ra an narakei esjilid acen: ja era eti ohocred ara va nohocred u ilpu mapoi Josef.

⁷ Va nitai inigki eri upyi hup ara um ahced ra sji ig er lucsei pan ra an taka pece, etpu tiih intas imiacitak u ra sji ehki era eklim asjeuc ara um umnyi waina.

⁸ Et mun asig yi aktit intas a Ihova Natimarid vai yin, et ika a Ihova Atua esjilid acen, Ek amcel vai niji itai esjilid u ilpu mapoi Jekob ainyak, ek lep esjum vai niji inmim atimi ura ainyak: va nitai inigki ekpu atcijaig inmaliyum ainyak im lep niji itai asega amen iran.

⁹ Im lep inig, el era amen natimi et ten an nimnim et ethi ache, erupu idim emesmas ara.

¹⁰ Etpu leh nohun natimi mas tah natimi ehpan iran, aien marom etpu atnamud nohun aien, mika yi imialau ijo yin an neom, etpu ika aien ehele natimi inig et amen an nilpun neom aien, Et lep amen tah ehelum, ka oʼo? etpu ika a natimi iyehki, Oʼo. Ja etpu ika aien, Jim tas aiek: et idim eti upene mika tu lep aniv nidai Ihova akaijau.

¹¹ Akumu almoi aijaua, et mun idim asaig a Ihova, etpu auud niji eom alupas aien etpu achadaliek, im lep niji eom haklin etpu ameled.

¹² Era idim eti athut jipe hors ira ahoig; et eti acujitai ira ahoig tah natimi irai kurimatau o un; ja et idivaig inwai acen intas alep unyimia, et idivaig incai acen nohwan nedo atoh unyimia:

¹³ eka imiacitak takitai aijaua, um ika, Inta mun idim lucsei ipat imi caija akaija va nemda uja.

¹⁴ Et ika a Ihova Atua esjilid acen, Ak nup Isreel, ekpu idim imiatidai nup uran pece et ethi ainyak, erupu aat iramia ara; erupu ehcerucai caua ara ahes an nahaijin pece Hemad um yetpan u nofowai an namasacen.