Emos 5 - Intas Etipup

Nuarin tas alupas 5.

1 Intas taigtaig vai nup Isreel. 4 Intas ahugni ra par adumoij an liinmopora. 21 Et esjum, a Atua va nalaigaheni efaifa ura.

¹ AK nup Isreel, akumu atahaijeg intas inigki aijaua ekpu asuptecnaig vai caua ainyak, intaigtaig vai caua marom.

² Et mun eropse a natahig an pece Isreel; inyi eti lep atidai aien: et asjeuc aien an pece o un; et ti tah par imiatidai yin.

³ Intas o Ihova Natimarid nigki; Inmaliyum inig eris apan itac iran natimi is wun dausant, erupu umumoh iran natimi inyi wun huntret ache, im inmaliyum inig eris apan itac iran natimi is wun huntret, erupu umumoh iran natimi inyi ten ache irai nup Isreel.

⁴ Intas o Ihova ehele nup Isreel nigki; Akumu ahilek nyak aijaua, ja par umumoh:

⁵ jam jim ahilek Bedel aijaua, um jim apan Cilcal, um jim yetpan Biersiba: uhpu imiapan nup u Cilcal an taka pece, erupu takitai a nup u Bedel.

⁶ Akumu ahilek Ihova aijaua, ja par umumoh; va yi jim ehcohos pam aien et idivaig incap vai ilpu mapoi Josef, um atnamud ra, etpu lep ti tah an maliyum Bedel par ahni.

⁷ Akumu, ahilek yin aijaua, ak ra sji igki eka ika aijaua yi idivaig incai acen intas alep atoh, um lep ethaigse nedo atoh an nobohtan.

⁸ Akumu ahilek yin aijaua is ago ilpu hal u Kumnyumoi im lep Nelcau aien, et lep ika aien yi idivaig nuhialeg inmehcim esjilid, um lep ika yi apat nadiat um idivaig nepig: et athoi jap aien irai jap, um atladwise an narasin nobohtan: Et idan Ihova:

⁹ et auroauro aien um ika eri auahas ilpu atimi emda, era lep apan a ilpu atimi iji ig eris atoraliak itai ura um auahas inmaliyum ipjin.

¹⁰ Era amcel vai yin ara et acaiji atimi an neucse nathatahau aien, era esjum ara vai yin et tas inveijec aien.

¹¹ Vaig inig nikavaig, eka auwihi ilpu ihki atimi aijaua, um leh ira ra inuarin u hwiit ura: va nitai inigki eka mun actai iyum irai hat eris ates aijaua, jai akupu eti amen iran aijaua; eka mun ahwaig ahapol vaine upene aijaua, jai akupu eti umnyi nide vaine iran aijaua.

¹² Ek idim ato ainyak nedo acalacal unyimia et ahinag acen, im lep nedo has unyimia et alupas acen: eka ehcerucai ilpu atimi upene aijaua, um leh nimtan par atau an nedo has o un tah, um atapnes ilpu ihki atimi an neucse nathatahau va eri jim leh niji itai ura.

¹³ Va nitai inigki eri eti tas a ilpu atimi arapakau an nopan iyehki; et idim has nopan iyehki.

¹⁴ Akumu ahilek itai upene aijaua, jam jim ahilek itai has, mika aki umumoh aijaua: ja etpu amen ehelemia a Ihova, Atua esjilid acen, et idivaig eka mun asaig aijaua.

¹⁵ Akumu esjum aijaua vai nedo has, jam merit vai nedo upene, um asaig intas alep atoh an neucse nathatahau: kit etpu aiheuc vai nahri ilpu mapoi Josef a Ihova Atua esjilid acen,

¹⁶ Va nitai inigki et ika a Ihova, Atua esjilid acen, im Natimarid; Erupu ehtigtaig ara irai iji efalaig asega; erupu ika ara irai iji efalaig alupas asega, Awe! awe! erupu ahlaig ara vai ilpu atimi ahapol mika eri ehtigtaig ara, im lep ra era ato ara par ehtigtaig mika eri taig alupas ara.

¹⁷ Et ika a Ihova; Erupu ehtigtaig ara irai ahapol vaine asega: vaig inig nikavaig, ekpu ateghe irai iji uari pece asega unyimia ainyak.

¹⁸ Kaiheuc vai caua eka merit aijaua vai nadiat u Ihova! etpu idivan he ehelemia nadiat u Ihova? etpu apat nadiat, iyehki, etpu eti lah.

¹⁹ Akupu idivaig natimi inig aijaua et ahapan aien vai laion, ja et ehtet iran beer: ka et apan anliin neom aien, um ahpaijinaig inyipin neom an nikman, jai et aces yin nimyeuv.

²⁰ Etpu idim apat nadiat u Ihova, inyi eti lah; etpu apat ahtu, um eti lah.

²¹ Ek esjum ainyak vai niji akaro unyimia, ek idim amcel vaig ainyak, inki eti imiacitak niji adiat atwakam unyimia ainyak.

²² El eka ahlap irai itai ahlap atnamud vai nyak aijaua im lep itai ahlap eh caig, inki eti leh ainyak: inki eti almoi ainyak niji itai ahlap naaurinig irai iji itai eklim edo irai pece upene unyimia.

²³ Akumu imiaha vai nyak niji ohraiitai unyimia aijaua: inki eti atahaijeg ainyak nohrai harp unyimia et acreh upene.

²⁴ Ja etmu yah intas atoh et idivaig inwai, im lep nedo atoh et idivaig nofowai alupas.

²⁵ Ak nup Isreel, akis idim ahlap vai nyak aijaua irai itai ahlap, im niji itai ahlap eh caig, an na-masacen irai mesese is forte.

²⁶ Ja akis mun apos aijaua neom itap u Molok, im inmoijeuv u Kaiun, ohwat atmasimai unyimia akis ago imi caua aijaua.

²⁷ Va nitai inigki, et ika a Ihova, et lep nidan Atua esjilid acen, ekpu ika ainyak eri imiapan caua an nedoa an nahaijin Tamaskus eahki.