Emos 4 - Intas Etipup

Nuarin tas alupas 4.

1 Et acaiji nup Isreel aien va nehtipidai atimi ura, 4 im nedo apat ura, 6 im lep nedo esjum ura.

¹ AKUMU atahaijeg intas inigki aijaua, ak ilpu atimi alupas, eka idivaig niji kurimatau atahig an pece Besan aijaua, eka amen an nedoon Sameria aijaua, eka ehcerucai ilpu ihki atimi aijaua, um auahas ra sji igki et ti nitai ura, eka ika aijaua ehele natimarid unyimia, Leh pam waina aiek, mika ti umnyi akaija.

² Et mun asig yi aktit intas a Ihova natimarid va nitap o un, mika, etpu yetpam niji opan vai caua, etpu iknipagki caua aien irai cauaij, im ilpu hal unyimia irai opoig.

³ Et ika a Ihova, Aki atga aijaua irai uarin eris alcapdicraig, irai uarin marom an nuhup unyimia athiathi; eri ahlo caua irai imnim atimi unyimia.

⁴ Akumu apam an maliyum Bedel aijaua, um ago nedo has; um ika yi alupas nedo imipalea an maliyum Cilcal: akumu imiapam itai ahlap unyimia aijaua irai iji uhialeg, im niji uarin tend unyimia irai iji opan etu wit ti pan itac inmesese inyi dri:

⁵ um ago nitai ahlap naaurinig irai itai caig et eteuc leven iran, um asuptecnaig nitai ahlap iji ig era ispara ago natimi, um efehtas vaig ehele atimi: et ika a Ihova Natimarid, Et upene iramia nedo inigki, ak nup Isreel.

⁶ Ek mun ati vai caua nauanadiat ainyak irai maliyum asega unyimia, im lep numlaig has irai uari pece asega unyimia: ja et ika a Ihova, Eka mun eti adumoij pam ehelek aijaua.

⁷ Is wat ti pan itac inmohoc is eseij ja is par meto nohwai itai, kis mun atapnes incopda vai caua ainyak: kis ika ainyak yi ehe an maliyum is ethi, um ika yi jim ehe an maliyum is eche: is ehe an pece is ethi, ja is imlai inpece inig is eti ehe iran.

⁸ Eris apan a nup uran maliyum is ero ka is eseij an maliyum is ethi, eris unmyi wai eahki ara, jam eti ehgin wai ara: ja et ika a Ihova; Eka mun eti adumoij pam ehelek aijaua.

⁹ Kis auahas caua ainyak an memid u itai im nimlai u itai: eris caig niji ahapol unyimia, im niji vaine unyimia, im niji ateg unyimia, im niji oliv unyimia, niji pak irai heled: ja et ika a Ihova, Eka mun eti adumoij pam ehelek aijaua.

¹⁰ Kis ati nemehe alupas vai caua ainyak is idivaig nemehe iyehki an pece Ijipt: kis atgei ilpu takuras unyimia ainyak an nedoa, um iknipagki niji hors unyimia; kis ika ainyak aki ahgei nauanipin has u imnim u ilpu eucsupo unyimia: ja et ika a Ihova, Eka mun eti adumoij pam ehelek aijaua.

¹¹ Kis auahas hal caua ainyak, et idivaig is auahas nup u Sotom im nup u Comora a Atua, akis idivaig nisincai aijaua eris ati ubos: ja et ika a Ihova, Eka mun eti adumoij pam ehelek aijaua.

¹² Va nitai inigki ekpu ago nitai iji igki vai caua ainyak, ak nup Isreel: ekpu idim ago nitai iji igki vai caua ainyak, va nitai inigki, ak nup Isreel, akumu ago upene caua aijaua par ehtet irai Atua unyimia.

¹³ Et idim ham aien is ago niji edoon aien, is lep ago nimtinjap aien, et, lep asuptecnaig naktaktai u atimi aien ehele ra, aien et ika aien yi apat an nuhialeg, um atga irai uarin ijinies an nobohtan, er anvi nidan par ika Ihova, Atua esjilid acen.