Emos 3 - Intas Etipup

Nuarin tas alupas 3.

1 Er idim ika yi aru nedo o nup isreel a Atua. 9 Er asuptecnaig neruvaig, im nohuun vaig.

¹ AK nup Isreel, akumu atahaijeg intas inigki aijaua et asaig a Ihova vai caua, maiya, vai nup uran nelcau asega kis imiaridji pam ra ainyak ahes an pece Ijipt, um ika,

² Kis mun ato caua ache ainyak irai up urai iji pece asega an nobohtan: va nitai inigki ekpu aru iramia ainyak va nedo has asega unyimia.

³ Et ehka va natimi et ero par ehredo, el et acheiachei jipe inliinmoporau arau.

⁴ Inyi eti aunyauwaig laion an nesei, el et ti nitai caig incan is ces yi oplecoplec aien; inyi eti aunyauwaig pan itac inhakli laion an nuarin asjeuc iran o un, el et eti fi leh tah nitai aien.

⁵ Inyi eti eucen inman an nitai apro itai an nobohtan, et wat ti nitai apro itai imi yin; inyi eti upjau nitai apro itai an nobohtan, el et ti tah nitai iran.

⁶ El eh ahlai intoho an tah maliyum, erupu idim imtitaig natimi; el et eteuc nohocred an tah maliyum, et mun idim ati a Ihova.

⁷ El et ati tah nohocred a Ihova Natimarid, etpu uhup aien um asuptecnaig naktaktai o un vaig ehele Ilpu aheca o un, ilpu profeta marom.

⁸ Et mun aunyauwaig laion, inyi eti imtitaig a di? et mun tas a Ihova Natimarid ehele ilpu profeta o un, inyi eti ahidan tas a di?

⁹ Akumu efehtas aijaua irai inmim atimi u nup Astot, im lep irai inmim atimi an pece Ijipt, um ika, Akumu asjapicnaig caua aijaua irai edoon Sameria, um atahaijeg inmotjan nohocred alupas iran, um almoi nedo ehtipidai atimi iran.

¹⁰ Et idim ika a Ihova; Era eti ato par ago nedo atoh ara sji igki, era asjapicnaig itai ara irai imnim atimi ura, eris lucsei an nedo ipjin ara, im lep an natoraliak itai vaig ura.

¹¹ Va nitai inigki et ika a Ihova Natimarid; Erupu arehed an pece unyimia a ilpu atimi edemda vai caua; erupu atipagki nemda unyimia ara, erupu atoraliak itai ara irai inmim atimi unyimia.

¹² Et ika a Ihova; Et idim atipagki an nipjineucse laion nikmai siip et ero ka nahaijin tikgan a natimi aminjinaig siip; etpu idim uco, eri imiatamaig nup Isreel iji ig era amen an maliyum Sameria ara irai tinara, im lep an maliyum Tamaskus irai itai ahled ura.

¹³ Et ika a Ihova Natimarid, Atua esjilid acen; Akumu atahaijeg aijaua, um asuptecnaig vai ilpu mapoi Jekob,

¹⁴ mika et idim inveijec intas inigki, an nadiat iyehki eku wit aru irai nup Isreel ainyak va nedo has ura, ekpu alcapdicrai niji atau an maliyum Bedel ainyak: eri ahtamud niji ipat an natau, ja etpu asuol an nobohtan.

¹⁵ Et ika a Ihova; Ekpu alcapdicraig ainyak niji eom ura van mesese im lep niji eom ura van lidija; eri auahas niji eom esjilid, etpu atiih niji eom alupas ura.