Emos 2 - Intas Etipup

Nuarin tas alupas 2.

1 Nedemda u Atua vai nup u Moab, 4 vai nup u Juta, 6 nup Isreel. 9 Et asan tas ehti a Atua va nedo ahnag ura.

¹ ET ika a Ihova; Inki eti atipagki ainyak nimtan nedo has et dri ka et for u nup u Moab; va nedo ura, nikavaig, eris atnamud niji eduei natimarid u nup Itom ara um ago nubrei iran:

² ja ekpu ati incap an pece Moab ainyak, etpu cas niji imnim atimi an maliyum Kireod: erupu emesmas a nup u Moab an motjan nedoa, im naunyauwaig, im natceteuc u intoho.

³ Et lep ika a Ihova; Ekpu auahas ilpu atimi tas alep eahki ainyak, ekpu atgei ilpu atimi alupas asega yi tup ethi ache pan ira ra ainyak.

⁴ Et ika a Ihova; Inki eti atipagki ainyak nimtan nedo has et dri ka et for u nup u Juta; va nedo ura, nikavaig, eris esjum ara van tas alep u Ihova, um eti imiaiji niji tas upyi asaig o un, eris imiahnag ra a ilpu atmas ura, eris merit vai ra a ilpu atmil ura:

⁵ ja ekpu ati incap an pece Juta ainyak, etpu cas niji imnim atimi an maliyum Jerusalem.

⁶ Et ika a Ihova; Inki eti atipagki ainyak nimtan nedo has et dri ka et for u nup Isreel; va nedo ura, nikavaig, eris ahtai ilpu atimi upene ara vai silver, im lep ilpu ihki atimi vai su is ero;

⁷ era merit alupas ara par avise idjini ilpu ihki atimi um yetpan an mah an nobohtan, um atapnes nefalaig u ilpu atimi ohocred: et ago ingeijid ehele natahig et ethi ache a natimi im lep etman, mika eri auahas nidak et itap.

⁸ Era asjeuc ara ira apelumai iji ig er ikni mika eri lep auanimtan, an nahaiji atau asega; era lep umnyi waina ara u ilpu atimi iji ig eris lucsei nimtan nedo has ura ara, an neom u ilpu atmas ura.

⁹ Ja kis auahas nup Emor an nuhup ura ainyak, eris ijinies ara um idivaig nijinies u iji ucje asega, eris lep emda ara um idivaig nemda u iji yat asega; kis um auahas nohwan ijinies ainyak, im lep neucvan sepamki.

¹⁰ Kis imiapam caua ainyak ahes an pece Ijipt, um lep atau iramia ainyak nai mesese is forte an namasacen, mika aki leh inpece u nup Emor aijaua.

¹¹ Kis ikni nahaiji ilpu hal unyimia ainyak, mika eri ilpu profeta ara, im lep nahaiji ilpu takuras unyimia mika eri ilpu atimi itap unyak ara. Et ika Ihova, Ak nup Isreel, et idim uco.

¹² Ja akis alumai ilpu atimi itap unyak waina aijaua; akis acaiji ilpu profeta aijaua, um ika, Akumu jim ahidan tas aijaua.

¹³ Ekpu idim avise iramia ainyak, et idivaig et avise itai an nobohtan tah kart et ohua nijis ilai hwiit iran.

¹⁴ Erupu idim eti aha ara era athut emda ara, erupu eti ehvaig nemda ura a ilpu atimi emda, erupu eti imiatamai ra a ilpu eucsupo:

¹⁵ erupu eti aiji aktit ara era apos efana ara; erupu eti aha ara era athut upene ara: erupu eti imiatamai ra ara era ateuc irai hors ara.

¹⁶ Et ika a Ihova, An nadiat iyehki erupu aha a ilpu eucsupo iji ig et emda inliinmopora ara, um atcijaig apelumai ira ra.