Emos 1 - Intas Etipup

Nuarin tas alupas 1.

1 Et asuptecnaig a Emos neruvaig u Atua irai nup u Siria, 6 irai nup u Filistia, 9 irai nup u Tairus, 11 irai nup Itom, 13 irai nup Amon.

¹ NIJI tas o Emos natimi is ethi irai ilpu atimi aminjinaig niji itai eklim edo irai pece auata upene an maliyum Tekoa jik igki, is yetpam ehelen vai nup Isreel an nopan umoh u Usaia natimarid an pece Juta, im lep an nopan umoh u Jeroboam inhal u Joas natimarid an pece Isreel, is atahaijeg intas iji igki aien ja is wat ti pan itac inmesese is ero is eteuc nomoi iyehki.

² Is ika aien, Etpu esjilid nohrai Ihova an nedoon Saion, etpu tas sepam aien an maliyum Jerusalem; etpu taigtaig inlelitai u ilpu atimi asgi siip, etpu imlai inlolan nedoon Karmel.

³ Et ika a Ihova; Inki eti atipagki ainyak nimtan nedo has et dri ka et for u nup u Tamaskus; va nedo ura, nikavaig, eris auud nup u Cileat ara irai itai aiurn er auud hwiit iran:

⁴ ja ekpu ati incap an nimnim u Heseel ainyak, etpu cas niji imnim atimi u Benhetat.

⁵ Et lep ika a Ihova; Ekpu lep alcapdicraig neucse nathatahau Tamaskus ainyak, um atgei natimi alupas an niskanse Even, im lep natimarid an maliyum Bediten: eri lucsei nup u Siria um imiapan ra an pece Kir.

⁶ Et ika a Ihova; Inki eti atipagki ainyak nimtan nedo has et dri ka et for u nup u Cesa; va nedo ura, nikavaig, eris imiapan atimi asega iji ig ara eris lucsei ra ara an nedoa, par atcijai ra ehele nup Itom:

⁷ ja ekpu ati incap an nathatahau Cesa ainyak, etpu cas niji imnim atimi iran.

⁸ Et lep ika a Ihova Natimarid; Ekpu lep atgei natimi alupas an maliyum Astot ainyak, im lep natimarid an maliyum Askelon, ekpu ahidai nikmak ainyak um aat irai nup Ekron: erupu atiih a ilpu ahri nup u Filistia.

⁹ Et ika a Ihova; Inki eti atipagki ainyak nimtan nedo has et dri ka et for u nup u Tairus; va nedo ura, nikavaig, eris atcijaig ehele nup Itom atimi asega iji ig ara eris lucsei ra ara an nedoa, um eti imiehva intas etipup eris asaig ehele ilpu raimu ura ara:

¹⁰ ja ekpu ati incap an nathatahau Tairus ainyak, etpu cas niji imnim atimi iran.

¹¹ Et ika a Ihova; Inki eti atipagki ainyak nimtan nedo has et dri ka et for u nup Itom; va nedo ura, nikavaig, eris ahau ilpu etwara ara an nedoa, um eti lep aiheuc vai ra, eris ces yi oplecoplec itai ara, is eti tiih nedemda ura, eris aminjinaig intavaitap ura ara irai iji mesese:

¹² ja ekpu ati incap an maliyum Timan ainyak, etpu cas niji imnim atimi u nup u Bosra.

¹³ Et ika a Ihova; Inki eti atipagki ainyak nimtan nedo has et dri ka et for u nup Amon; va nedo ura, nikavaig, eris ahcai an nau-itoga ilpu takata opoc u nup u Cileat ara, mika yi alupas inpece ura:

¹⁴ ja ekpu atni incap an nathatahau Raba ainyak, etpu cas niji imnim atimi iran, eri lep aunyauwaig an nadiat ago nedoa, etpu eteuc nehio an nopan eteuc narakiraki.

¹⁵ Et lep ika a Ihova; Eri leh natimarid ura um imiapan yin an taka pece, aien im lep ilpu atimi alupas o un ehelen.