Eksotus 9 - Intas Etipup

Nuarin tas alupas 9.

1 Nemehe esjilid irai iji itai eklim edo irai pece. 8 Inheuau. 13 Intas o Atua vai incopda hat. 22 Inmas vai incopda hat. 27 Et ugyi Moses a Fero, 35 ja et lep ipjin aien.

¹ IS ika a Ihova ehele Moses, Namu apan aiek ehele Fero, um ika ehelen, Et ika a Ihova Atua u nup u Hibru, Namu atcijaig ilpu atimi unyak aiek, mika eri apan ara um aheca unyak.

² Ja el et esjum aiek natcijai ra vaig, um imiisjis, um imiaaij ra,

³ etpu idim ati nikman a Ihova irai iji itai eklim edo irai pece unyum irai lelitai, nikavaig, kora marom, im togke, im kamela, im kurimatau, im siip: etpu eteuc nemehe esjilid ira ra.

⁴ Etpu atiakoai niji itai eklim edo irai pece u nup Isreel a Ihova, im lep niji itai eklim edo irai pece u nup Ijipt: inyi eti mas tah nitai u nup Isreel.

⁵ Is anvai nuarin nadiat a Ihova, um ika, Etpu ago nitai inigki a Ihova imraig an pece.

⁶ Is wat lahlah an tak apnyin is ago nitai inigki a Ihova, eris lep emesmas niji itai eklim edo irai pece asega Ijipt: ja is eti mas tah nitai eklim edo irai pece u nup Isreel.

⁷ Is abra atimi a Fero par ato, ja is eti mas tah nitai eklim edo irai pece u nup Isreel. Is lep ipjin inliinmopoi Fero, is eti atcijaig atimi aien.

⁸ Is ika a Ihova ehele Moses im Eron, Arumu ahre nohpa an cap aijaurau irai ikmamirau, etmu eduaraprap iran a Moses an nohatag an nuhup u Fero.

⁹ Etpu mah haklin an pece Ijipt asega, etpu ehlai inheuau ira atimi, im niji itai eklim edo irai pece, um atpujij, um ared, an pece Ijipt asega.

¹⁰ Eris ahre nohpa an cap arau, um aiji an nuhup u Fero; is eduaraprap iran a Moses an nohatag; is ehlai inheuau ira atimi, im niji itai eklim edo irai pece, um atpujij, um ared.

¹¹ Is ehka vai ilpu atimi araces natidai vaig an nuhup u Moses va heuau; is lep ehlai inheuau irai ilpu atimi araces, im lep irai up Ijipt asega.

¹² Is ago ipjin inliinmopoi Fero a Ihova, is eti atahaijeg intas urau aien; is idivaig is asaig a Ihova ehele Moses.

¹³ Is ika a Ihova ehele Moses, Namu auroauro aiek, um atidai an nuhialeg, um aiji an nuhup u Fero, um ika ehelen, Et ika a Ihova Atua u nup u Hibru, Namu atcijaig ilpu atimi unyak aiek, mika eri apan ara um aheca unyak.

¹⁴ Ekpu idim atijai iram ainyak an nopan inig niji itai has asega unyak, im lep irai ilpu aheca unyum, im lep irai up uran pece unyum; mika an ato aiek, nikavaig, ei eti eteuc tah et idivai nyak an nobohtan asega.

¹⁵ Ekpu atgeig yi apidi nikmak ainyak an nopan inig, um auud euc, im nup uran pece unyum an nemehe has; uhpu auahas euc an nobohtan.

¹⁶ Kis idim imiatidai euc ainyak va nitai inigki, mika ki ehvaig nemda unyak ainyak iram; va uhpu asuptecnaig nidak an nobohtan asega.

¹⁷ Na mun ago nedo ijinies aiek vai ilpu atimi unyak, um imihum pam an nopan inig, um eti atcijai ra.

¹⁸ Ekpu idim ika ainyak yi asuol incopda hat esjilid acen an nuarin nadiat inig imraig, eris eti ecetai tah nitai a nup Ijipt et idivaig nitai inigki, itu acen um imihum pam an nopan inig.

¹⁹ Va nitai inigki namu abra atimi aiek, mika eri asjapicnaig niji itai eklim edo irai pece unyum ara, im niji itai asega unyum; etpu asuol incopda hat ira atimi, im niji itai eklim edo irai pece asega, eri amen itac ara, um eti amen iraili eom, erupu emesmas ara.

²⁰ Is wat imtitaig intas o Ihova tah irai ilpu aheca u Fero, is imiapan ilpu aheca o un aien, im niji itai eklim edo irai pece o un, iraili eom:

²¹ ja is wat eti aktaktai intas o Ihova tah, is udei itac ilpu aheca o un aien, im niji itai eklim edo irai pece o un.

²² Is ika a Ihova ehele Moses, Namu adaigjai nikmam an nohatag aiek, va etpu asuol incopda hat an pece Ijipt asega, ira atimi, im niji itai eklim edo irai pece, im niji itai ededel asega an nobohtan, an pece Ijipt asega.

²³ Is adaigjai niseuc o un a Moses an nohatag: is ati inmunuka a Ihova im incopda hat, is lep aes jipe nauwainapit an nobohtan; is atladwi incopda hat an pece Ijipt asega a Ihova.

²⁴ Is asuol incopda hat, im lep nauwainapit pan is esjilid acen, is eti eteuc tah nitai is idivaig nitai inigki an pece Ijipt asega, an namen u atimi iran.

²⁵ Is asji niji itai asega itac incopda hat iyehki, nikavaig, natimi, im niji itai eklim edo irai pece, an pece Ijipt asega; is asji niji itai ededel asega an pece incopda hat, um ahtasvi nauicai asega an pece.

²⁶ Ja is ti incopda hat an pece Cosen ache, eris amen iran a nup Isreel.

²⁷ Is abra atimi a Fero mika eri ahlaig vai Moses im Eron; is ika ehele rau aien, Ek mun ago nedo has ainyak an nopan inig: et atoh nedo o Ihova, ja ek atimi auatatimi ainyak, im lep nup uran pece unyak.

²⁸ Arumu ugyi Ihova aijaurau mika yi tiih inmunuka esjilid im incopda hat, (et idim alupas); ekpu atcijai caua ainyak, akupu eti lep amen aijaua.

²⁹ Is ika a Moses ehelen, Eku wit ahes an maliyum ainyak um atga unyak, ekpu adaigjai nikmak ainyak vai Ihova; etpu tiih inmunuka, inyi eti lep eteuc incopda hat; va apu ato aiek mika et ohuun nobohtan a Ihova.

³⁰ Ja ek ato ainyak mika, napu eti imtitai Ihova Atua unyima aiek im ilpu aheca unyum.

³¹ Is has naijema im barle: is idim elwa barle, um lep tisian naijema.

³² Ja is eti has hwiit im rai: is eti fi ujupsotan.

³³ Is ahes ehele Fero a Moses um udei inmaliyum, um apan, um adaigjai nikman vai Ihova: is tiih inmunuka im incopda hat, is eti lep asuol incopda an nobohtan.

³⁴ Is wat ato a Fero mika is tiih incopda, im incopda hat, im immunuka, is lep ago nedo has aien, is ipjin inliinmopon aien, im inliinmopoi ilpu aheca o un.

³⁵ Is ipjin inliinmopoi Fero, is esjum aien naticijaig vaig nup Isreel; is idivaig is asaig a Moses.