Eksotus 8 - Intas Etipup

Nuarin tas alupas 8.

1 Er imiapan niji amopmop an wai. 8 Et ugyi Moses a Fero. 12 Et iknipagki ra a Moses an nalaigaheni o un. 16 Et eteuc icet inmah an nobohtan, et ehka vai ilpu atimi araces par ago nedo inigki. 20 Niji pak irai lag. 25 Et ika a Fero yi atcijaig atimi, 32 ja et lep ipjin aien.

¹ IS ika a Ihova ehele Moses, Namu apan aiek ehele Fero, um ika ehelen, Et ika a Ihova, Namu atcijaig ilpu atimi unyak aiek, mika eri ahlap vai nyak ara.

² El et esjum aiek natcijai ra vaig, ekpu idim auud inpece asega unyum ainyak ira amopmop:

³ erupu ahes an nofowai namopmop inyi ahinag, um aridjai, um apan an nimnim unyum, im lep anliin neom umjeg unyum, im lep an tinam, im lep an nimnim u ilpu aheca unyum, im lep ehele ilpu atimi unyum, im lep an mun uum unyum, im lep irai ipjiitai aplamod flaur iran unyum:

⁴ erupu athut iram namopmop, im lep irai up uran pece unyum, im lep irai ilpu aheca unyum asega.

⁵ Is ika a Ihova ehele Moses, Namu ika ehele Eron aiek, Leh niseuc unyum aiek, um atgeig yi apidi nikmam ijinies irai eucsen wai, im lep ijinies irai ofowai, im lep ijinies irai etpen, va etpu aridjai namopmop an pece Ijipt.

⁶ Is atgeig yi apidi nikman a Eron ijinies irai iji wai an pece Ijipt; eris aridjai namopmop amen an wai um apaahni an pece Ijipt.

⁷ Eris lep ago nitai inigki a ilpu atimi araces an nedo apat ura, um imiaridjai namopmop an pece Ijipt.

⁸ Is ahlaig vai Moses im Eron a Fero, um ika, Ugyi Ihova mika yi iknipagki namopmop ehelek aien, im lep ehele ilpu atimi unyak; ekpu atcijaig atimi ainyak mika eri ahlap irai iji itai ahlap vai Ihova ara.

⁹ Is ika a Moses ehele Fero, Namu imiacitak vai nyak aiek: ekpu imiaras euc ainyak an nahopan, im ilpu aheca unyum, im ilpu atimi unyum, va uhpu iknipagki namopmop ehelum, im lep iraili eom unyum, mika eri amen ara an nofowai ache

¹⁰ Is ika a Fero, Imraig. Is ika a Moses, Etmu idivaig intas unyum: va apu ato aiek mika et eti lep eteuc tah et idivaig Ihova Atua unyima.

¹¹ Erupu udei euc namopmop, im lep niji eom unyum, im ilpu aheca unyum, im inpece unyum; erupu amen ara an nofowai ache.

¹² Erus ahes ehele Fero a Moses im Eron, um alau ijo: is ugyi Ihova a Moses vai namopmop is imiapan ehele F ero aien.

¹³ Is ago a Ihova is idivaig intas o Moses; eris emesmas namopmop iraili eom, im lep irai imnim, im lep ira ahapol ura.

¹⁴ Eris asjapicnaig niji ira ra ara: is lep epeuv inpece.

¹⁵ Is wat almoi a Fero mika is lep upene, is ipjin inliinmopon aien, is eti atahaijeg intas urau aien; is idivaig is asaig a Ihova.

¹⁶ Is ika a Ihova ehele Moses, Namu ika ehele Eron aiek, Alcacsei niseuc unyum aiek, um auud inmah an nobohtan, mika yi pu icet inpece Ijipt asega.

¹⁷ Erus ago nitai inigki arau; is leh niseuc o un a Eron, um atgeig yi apidi nikman, um auud inmah an nobohtan, eris um icet natimi im lep niji itai eklim edo irai pece; is icet inmah asega an nobohtan an pece Ijipt asega.

¹⁸ Eris ika a ilpu atimi araces eri ago nitai inigki ara an nedo apat ura, ja is ehka vai ra: eris icet natimi, im niji itai eklim edo irai pece.

¹⁹ Eris ika a ilpu atimi araces ehele Fero, Nikmai Atua nigki: ja is ipjin inliinmopoi Fero, is eti atahaijeg intas urau aien; is idivaig is asaig a Ihova.

²⁰ Is ika a Ihova ehele Moses, Namu auroauro aiek um atidai an nuhialeg, um aiji an nuhup u Fero; et idim apan u inwai aien; um ika ehelen, Et ika a Ihova, Namu atcijaig ilpu atimi unyak aiek, mika eri ahlap irai iji itai ahlap vai nyak ara.

²¹ Ja el et eti atcijaig ilpu atimi unyak aiek, ekpu ikni pak irai lag iram ainyak, im lep irai ilpu aheca unyum, im lep irai ilpu atimi unyum, im lep iraili eom unyum: etpu ohua niji pak irai lag irai eom u nup Ijipt, im lep inpece ura.

²² Ja ekpu ika ainyak au nopan iyehki inyi eche inpece Cosen, era amen iran a ilpu atimi unyak, eri eti amen eahki niji pak irai lag; va apu ato aiek mika, ek Ihova ainyak an nobohtan asega.

²³ Ekpu ati natcai ainyak juju an niblai ilpu atimi unyak im ilpu atimi unyum: uhpu ago nitai asjaaicnaig inigki imraig.

²⁴ Is ago nitai inigki a Ihova; is yetpan inpak irai lag esjilid anliin neom u Fero, im lep iraili eom u ilpu aheca o un, im lep an pece Ijipt asega: is has inpece vai inpak irai lag.

²⁵ Is ahlaig vai Moses im Eron a Fero, um ika, Akumu apan aijaua, um ahlap vai Atua unyimia an pece.

²⁶ Is ika a Moses, Et eti upene vai cama nago vaig nedo inigki, um ahlap vai Ihova Atua unyima an nitai has u nup Ijipt: el ecra ahlap an nitai era amcel vaig a nup Ijipt aijama an nuhup ura, erupu lep asji cama ara irai hat.

²⁷ Ecrupu apan an namasacen aijama, um atga an nadiat inyi eseij, um ahlap vai Ihova Atua unyima, et idivaig etpu asaig aien ehelema.

²⁸ Is ika a Fero, Ekpu atcijaig caua ainyak, mika aki ahlap vai Ihova Atua unyimia aijaua an namasacen; jam jim apan itac acen: arumu ugyi vai nyak aijaurau.

²⁹ Is ika a Moses, Ekpu udei euc ainyak, um apan, um ugyi Ihova mika uhpu iknipagki niji pak irai lag ehele Fero, im lep ehele ilpu aheca o un, im lep ehele ilpu atimi o un, imraig: jam jim lep ago nedo efaifa aiek, ak Fero, um acaiji atimi, mika eri jim apan ara, um ahlap vai Ihova.

³⁰ Is ahes ehele Fero a Moses um atga o un, um ugyi Ihova.

³¹ Is ago a Ihova is idivaig intas o Moses; is iknipagki niji pak irai lag ehele Fero aien, im lep ehele ilpu aheca o un, im lep ehele ilpu atimi o un; is eti amen tah is ethi.

³² Ja is lep ipjin inliinmopoi Fero, is eti atcijaig atimi aien.