Eksotus 7 - Intas Etipup

Nuarin tas alupas 7.

1 Et ago emda inliinmopoi Moses a Atua mika yi apan ehele Fero. 7 Niji mesese irai Moses. 8 Et eteuc nimyeuv niseuc o un. 11 Era ago nitai imiali et idivaig nigki a ilpu atimi araces. 13 Er ago ipjin inliinmopoi Fero. 14 Intas o Atua imi Fero. 19 Et eteuc inja irai itai nofowai.

¹ IS ika a Ihova ehele Moses, Ek mun idim ati euc ainyak mika an Atua aiek imi Fero: etpu lep asuptecnaig intas unyum a Eron etwam.

² Namu asan tas asega iji igki aiek ek asaig ehelum ainyak: etmu lep asaig ehele Fero a Eron etwam, mika yi abraig pan nup Isreel aien an pece o un.

³ Ekpu ago ipjin inliinmopoi Fero ainyak, um ago niji itai asjaaicnaig unyak inyi ahinag, im niji itai imiali unyak an pece Ijipt.

⁴ Ja etpu eti atahaijeg intas unyimirau a Fero, mika ekpu ati nikmak ainyak an pece Ijipt, um iknipagki ilpu eucsupo unyak, im ilpu atimi unyak, nup Isreel marom, an pece Ijipt, um aru alupas ira ra.

⁵ Erupu ato a nup Ijipt mika ek Ihova ainyak, eku wit atgeig yi apidi nikmak ainyak an pece Ijipt, um iknipagki nup Isreel ehele ra.

⁶ Erus idim ago a Moses im Eron, is idivaig is asaig ehele rau a Ihova.

⁷ Is eteuc inmesese is eete irai Moses, im inmesese is eete dri irai Eron, an nopan iyehki erus tas ehele Fero arau,

⁸ Is tas a Ihova ehele Moses im Eron, um ika.

⁹ Etu wit tas ehelemirau a Fero, um ika, Arumu ehvaig nitai asjaaicnaig aijaurau: namu tas ehele Eron aiek, um ika, Leh niseuc unyum aiek, um ethaigse an nuhup u Fero, etpu imyeuv.

¹⁰ Erus apan a Moses im Eron ehele Fero, um ago is idivaig is asaig ehele rau a Ihova: is ethaigse niseuc o un a Eron an nuhup u Fero, im lep an nuhup u ilpu aheca o un, is um imyeuv.

¹¹ Is lep asjapicnaig ilpu atimi arapakau a Fero, im ilpu atimi araces: eris lep ago nitai inigki a ilpu atimi araces an pece Ijipt an nedo apat ura.

¹² Eris ethaigse niji iseuc ura ara asega, is um imyeuv: ja is atleg niji iseuc ura niseuc u Eron.

¹³ Is ago ipjin inliinmopoi Fero aien, va nitai inigki is eti atahaijeg intas urau aien; is idivaig is asaig a Atua.

¹⁴ Is ika a Ihova ehele Moses, Et ipjin inliinmopoi Fero, et acaiji atimi aien va eri jim atga ura ara.

¹⁵ Namu apan aiek ehele Fero an nuhialeg; et apan aien u inwai; namu aiji aiek an nohmun nofowai, um aitgai yin; namu lep apos an nikmam niseuc iyehki aiek is lep imyeuv.

¹⁶ Namu ika ehelen aiek, Is abraig pam nyak ehelum a Ihova Atua u nup u Hibru, um ika, Namu atcijaig ilpu atimi unyak aiek, mika eri apan ara um ahlap irai iji itai ahlap vai nyak an namasacen: ja as esjum aiek par atahaijeg um imihum pam an nopan inig.

¹⁷ Ja et ika a Ihova, Napu ato aiek mika ek Ihova ainyak, va nitai inig, nikavaig, ekpu auud inwai ainyak an nofowai an niseuc inigki an nikmak, ja etpu ja.

¹⁸ Erupu emesmas numu an nofowai, etpu lep epeuv nofowai; erupu amcel vai inwai an nofowai a nup Ijipt, um eti umnyi.

¹⁹ Is ika a Ihova ehele Moses, Namu ika ehele Eron aiek, Leh niseuc unyum aiek, um atgeig yi apidi nikmam ijinies irai iji wai Ijipt, irai eucsen wai ura, im netpen ura, im lep inwai asega ura, va etpu ja; etpu lep eteuc inja an pece Ijipt asega, irai iji elcau ura, im lep irai ipjihat.

²⁰ Erus ago nedo inigki a Moses im Eron is asaig a Ihova; is alcacsei jai niseuc o un aien, um auud inwai au nofowai, an nuhup u Fero, im lep an nuhup u ilpu aheca o un; is um ja inwai asega an nofowai.

²¹ Eris emesmas numu an nofowai; is epeuv nofowai, is ehka vai nup Ijipt numnyi vaig inwai an nofowai; is eteuc inja an pece Ijipt asega.

²² Eris lep ago nitai inigki a ilpu atimi araces an pece Ijipt an nedo apat ura: is ipjin inliinmopoi Fero, is eti atahaijeg intas urau aien; is idivaig is asaig a Ihova.

²³ Is ahidai yin a Fero um apan an neom o un, ja is lep eti aktaktai nitai inigki aien.

²⁴ Eris ucji an nahaijin nofowai a nup Ijipt asega, um ahilek inwai lumara; is ehka vai ra numnyi vaig inwai an nofowai.

²⁵ Is auud nofowai a Ihova, ja is par ti pan itac nadiat is seven.