Eksotus 6 - Intas Etipup

Nuarin tas alupas 6.

1 Et aketo a Atua um asan tas upyi asaig o un an nidai Ihova. 14 Niji idai ilpu mapoi Ruben, 15 im Simeon, 16 im Livai etpoi Moses im Eron.

¹ IS ika a Ihova ehele Moses, Napu almoi nitai inig aiek, ekpu ago ainyak irai Fero: etpu lep atcijai ra aien an nikman emda, um ahlo pan ra an pece o un an nikman emda.

² Is tas a Atua ehele Moses, um ika ehelen, Ek Ihova ainyak:

³ kis ehcohos pan ainyak ehele Ebraham, im Aisak, im Jekob, an nidak Atua emda acen, ja eris eti ato nidak et eche Ihova ara.

⁴ Kis lep ati intas etipup unyak ainyak ehele ra, mika ki alupai ra inpece Kenan ainyak, inpece inig eris amen terimterim iran ara, um tak atimi iran.

⁵ Kis lep atahaijeg ainyak nehtigtaig u nup Isreel iji igki era ehcerucai ra a nup Ijipt; ek lep imiehva intas etipup unyak ainyak.

⁶ Va nitai inigki namu asaig ehele nup Isreel aiek, mika ek Ihova ainyak, ekpu iknipagki caua ainyak va nauritai ehka u nup Ijipt, ekpu lep imicoho caua ainyak va nauaraheca ura, ekpu imiatamaig caua ainyak an nikmak emda, im lep an nedo emda esjilid unyak:

⁷ ekpu ikni caua ainyak, mika aki ilpu atimi unyak aijaua, ekpu lep Atua unyimia ainyak: akupu lep ato aijaua, nikavaig, ek Atua unyimia ainyak Ihova, ekpu imiatamaig caua ainyak va nauritai ehka u nup Ijipt.

⁸ Ekpu imiapan caua ainyak an pece inig, kis tas aktit vaig ainyak, um ika, Ekpu alupai Ebraham ainyak, im Aisak, im Jekob; ekpu alupai caua ainyak mika aki ohuun aijaua: ek Ihova ainyak.

⁹ Is asan tas inigki ehele nup Isreel a Moses: ja eris eti atahaijeg intas o Moses ara va nohocred u inliinmopora, im lep nauritai opoc ura.

¹⁰ Is tas a Ihova ehele Moses, um ika,

¹¹ Namu apan aiek, um asaig ehele Fero natimarid Ijipt mika yi atcijaig nup Isreel aien, mika eri udei inpece o un ara.

¹² Is tas a Moses an nuhup u Ihova, um ika, Eris idim eti ata-haijeg intas unyak a nup Isreel; inyi eti lep atahaijeg intas unyak a Fero, et eti upene nipjineucsek ainyak.

¹³ Is tas a Ihova ehele Moses im Eron, um asuptecnaig ehele rau intas o un ehele nup Isreel, im lep ehele Fero natimarid Ijipt, mika eru iknipagki nup Isreel an pece Ijipt arau.

¹⁴ Eris ilpu retpora ara sji igki: nikavaig, Ilpu hal u Ruben inhal u Isreel inmeto; nan, Henok, im Palu, im Hesron, im Karmai: eris ilpu mapoi Ruben ara sji igki.

¹⁵ Im lep ilpu hal u Simeon; nan, Jemuel, im Jemin, im Ohat, im Jekin, im Sohar, im Seal inhal u intakata Kenan: eris ilpu mapoi Simeon ara sji igki.

¹⁶ Nidai ehtaij hal u Livai, is idivaig eris aged ehtaij; nan, Cerson, im Kohad, im Mererai: is eteuc inmesese is wun huntret im dirte seven irai Livai, ja pah mas.

¹⁷ Ohwat hal u Cerson; nan, Libnai, im Saimai.

¹⁸ Ilpu hal u Kohad; nan, Amram, im Ishar, im Hibron, im Usiel: is eteuc inmesese is wun huntret im dirte dri irai Kohad, ja pah mas.

¹⁹ Ohwat hal u Mererai; nan, Mahelai, im Musai: eris ilpu mapoi Livai ara sji igki.

²⁰ Is leh Jokebet natahig irai etman a Amram ehgan; is apos Eron im Moses imi yin aien: is eteuc inmesese is wun huntret im dirte seven irai Amram, ja pah mas.

²¹ Im lep ehtaij hal u Ishar; nan, Kora, im Nifec, im Sidrai.

²² Im lep ehtaij hal u Usiel; nan, Miseel, im Elsafan, im Sidrai.

²³ Is leh Eliseba, inhalav atahig u Aminatab, im natahig irai Neson, a Eron ehgan; is apos Netab aien, im Abaihu, im Eliesar, im Idamar.

²⁴ Im lep ehtaij hal u Kora; nan, Asir, im Elkana, im Abaiasaf: ehtijis ahes ehele Kora ahtaij raigki.

²⁵ Is leh inhalav atahig is ethi u Putiel a Eliesar inhal u Eron ehgan; is apos Finehas imi yin aien: eris ahes ehele ra sji igki a nup u Livai.

²⁶ Eron im Moses raigki, is tas ehele rau a Ihova, um ika, Arumu iknipagki nup Isreel an pece Ijipt aijaurau, um asjaaicnaig sjipe ira ra.

²⁷ Moses im Eron raigki, erus lep tas ehele Fero natimarid Ijipt arau, um ika yi atcijaig nup Isreel aien an pece Ijipt.

²⁸ An nopan iyehki is wat tas a Ihova ehele Moses an pece Ijipt,

²⁹ is ika a Ihova ehele Moses, Ek Ihova ainyak: namu asaig aiek ehele Fero natimarid Ijipt intas asega unyak ehelum.

³⁰ Is tas a Moses an nuhup u Ihova, um ika, Et eti upene nipjineucsek ainyak, inyi eti atahaijeg intas unyak a Fero.